.jpg)
លោក Jose Mourinho ប្រឈមមុខនឹងការរង់ចាំដ៏អន្ទះសាមួយដើម្បីឲ្យដឹងថា Paul Pogba អាចចូលរួមលេងក្នុងការប្រកួតក្របខ័ណ្ឌ Champions League វគ្គ ១៦ ក្រុមចុងក្រោយរបស់ក្រុម Manchester United នៅលើទឹកដីក្រុម Sevilla នៅពាក់កណ្តាលសប្តាហ៍នេះ ឬយ៉ាងណា ក្រោយពីរូបគេបានអវត្តមានពួកគេទទួលជ័យជម្នះលើក្រុម Huddersfield Town ក្នុងពាន FA Cup។
បញ្ហាជំងឺមិនជាក់លាក់មួយបានធ្វើឲ្យ Pogba ដកខ្លួនចេញសម្រាប់ការប្រកួតកាលពីថ្ងៃសៅរ៍ នៅលើទឹកដីក្រុម Huddersfield ខណៈដែល Man Utd បានទទួលជ័យជម្នះ ២-០ តាមរយៈគ្រាប់បាល់ទាំង ២ គ្រាប់ពីខ្សែប្រយុទ្ធ Romelu Lukaku ដើម្បីឈានទៅវគ្គ ៨ ក្រុមចុងក្រោយ។
លោក Mourinho គ្រូបង្វឹករបស់ Man Utd បានបញ្ជាក់ថា លោកមិនបានដឹងសូម្បីតែប្រភេទជំងឺដែល Pogba កំពុងតែជួបប្រទះ ក៏ដូចជារយៈពេលដែលតារាឆ្នើមអន្តរជាតិបារាំងរូបនេះអាចនឹងត្រូវអវត្តមាន៕
