សកម្មភាពប្រកួតកីឡាអុកចត្រង្គជ្រើសរើសជើងឯកថ្នាក់ជាតិ កាលពីឆ្នាំ២០១៧ កន្លងមក។ ស្រេង ម៉េងស្រ៊ុន
.jpg)
ភ្នំពេញៈ សហព័ន្ធកីឡាអុកចត្រង្គកម្ពុជា នឹងចាប់ដំណើរការប្រកួតជម្រុះនៅតាមមណ្ឌលទាំង ៧ នៅថ្ងៃអង្គារនេះ ហើយមណ្ឌលខេត្តព្រះសីហនុ នឹងចាប់ដំណើរការប្រកួតមុនគេ រួចទើបបន្តទៅកាន់មណ្ឌលផ្សេងៗទៀត ទៅតាមការបរិច្ឆេទ ដែលបានគ្រោងទុក។ នេះបើតាម លោក ឈាវ បូរ៉ា បានប្រាប់ភ្នំពេញ ប៉ុស្តិ៍ នៅថ្ងៃចន្ទនេះ។
អតីតស្តេចអុក ២ សម័យកាល លោក ឈាវ បូរ៉ា ជាអគ្គលេខាធិការសហព័ន្ធកីឡាអុកចត្រង្គកម្ពុជា បានប្រាប់ថា៖ «មណ្ឌលខេត្តព្រះសីហនុ មានខេត្ត នៅជាប់មាត់សមុទ្រចំនួន ៣ ត្រូវចូលរួមប្រកួត ក្នុងនោះមានខេត្តកំពត ខេត្តកោះកុង និងខេត្តកែប ប៉ុន្តែគិតមកដល់ពេលនេះ មានបេក្ខជនត្រឹម ២ ខេត្តទេ បានដាក់ពាក្យចូលរួមប្រកួត គឺមាន ៥ នាក់ មកពីខេត្តកំពត និង ៨ នាក់មកពីខេត្តកោះកុង សរុប ១៣ នាក់ប៉ុណ្ណោះ ឯខេត្តកែប គ្មានទេ ដោយសារពួកគេហាក់បីដូចជាខ្លាចតាំងពីមុនការប្រកួតម្ល៉េះ»។
បន្ថែមលើព័ត៌មាននេះ លោក គ្រួច ចន្ថារិទ្ធ មន្ត្រីបច្ចេកទេសរបស់សហព័ន្ធកីឡាអុកចត្រង្គកម្ពុជា បានឲ្យដឹងថា គ្រប់ការប្រកួតនៅតាម ៧ មណ្ឌល ទូទាំងប្រទេស គឺមានគណៈកម្មការតែមួយក្រុមទេ ទៅពីភ្នំពេញ ដើម្បីធានាបាននូវសុក្រឹតភាព យុត្តធម៌ និងរូបមន្តប្រកួតតែមួយដូចគ្នា។
លោកបន្តថា៖ «គណៈកម្មការទាំងនោះ មានរូបខ្ញុំ លោក ឈាវ បូរ៉ា លោក ណាវ សុខឃឿន ដោយក្នុងនោះចំណាត់ថ្នាក់លេខ ១ លេខ ២ និងលេខ ៣ នៅតាមមណ្ឌលនីមួយៗ សុទ្ធតែទទួលបានប្រាក់រង្វាន់ ពីសហភាពសហព័ន្ធយុវជនកម្ពុជា ដូចៗគ្នា តែនៅមិនដឹងពីចំនួនទឹកប្រាក់ពិតប្រាកដនូវឡើយទេ»។
តាមលោក គ្រួច ចន្ថារិទ្ធ ដដែល បានឲ្យដឹងទៀតថា បន្ទាប់ពីបញ្ចប់ការប្រកួត ពេញមួយថ្ងៃ នៅមណ្ឌលខេត្តព្រះសីហនុ នឹងបន្តទៅប្រកួតជម្រុះ នៅមណ្ឌលខេត្តកំពង់ស្ពឺ ដែលមានបេក្ខជន ១៣ នាក់ រួចបន្តទៅមណ្ឌលខេត្តកំពង់ចាម មានបេក្ខជន ១២ នាក់ មណ្ឌលខេត្តបាត់ដំបង មានបេក្ខជន ១៦ នាក់ មណ្ឌលខេត្តសៀមរាប មានបេក្ខជន ១៥ នាក់ មណ្ឌលខេត្តក្រចេះ មានបេក្ខជន ៦ នាក់ ហើយចុងក្រោយត្រឡប់មកមណ្ឌលភ្នំពេញវិញ ដែលជាមណ្ឌលចុងក្រោយ មានបេក្ខជន ៦៧ នាក់។
លោក គ្រួច ចន្ថារិទ្ធ បានបញ្ជាក់ថា៖ «រូបមន្តប្រកួត ត្រូវធ្វើដូចមុន ប៉ុន្តែមានការសំណូមពរទៅដល់សហភាពសហព័ន្ធយុវជនកម្ពុជា ឲ្យជ្រើសរើសយកបេក្ខជនចំនួន ៦ នាក់ នៅមណ្ឌលភ្នំពេញ ដើម្បីឡើងទៅប្រកួតថ្នាក់ជាតិ ព្រោះមណ្ឌលភ្នំពេញ មានបេក្ខភាពចូលរួមចំនួន ៦៧ នាក់ច្រើនជាងគេ និងប្រជុំសុទ្ធតែជើងខ្លាំង អ៊ីចឹងយើងគួរតែផ្តល់ឲ្យច្រើនជាងមណ្ឌលដទៃទៀត»។
គួរបញ្ជាក់ថា សម្រាប់ការប្រកួតជម្រុះនៅតាមមណ្ឌលទាំង ៧នេះ គឺក្នុងមួយមណ្ឌល ត្រូវបានកំណត់ប្រកួតជម្រុះយកតែ៣នាក់ប៉ុណ្ណោះ ដើម្បីឡើងទៅប្រកួតជម្រុះថ្នាក់ជាតិ ដោយទុកជើងខ្លាំងត្រឹម៨នាក់ប៉ុណ្ណោះ សម្រាប់ឡើងទៅប្រកួតនៅជុំផ្តាច់ព្រ័ត្រ ដែលនឹងត្រូវធ្វើនៅមហាសង្គ្រាន មុខប្រាសាទអង្គរវត្ត ខេត្តសៀមរាប ក្នុងថ្ងៃបុណ្យចូលឆ្នាំ ប្រពៃណី ជាតិខ្មែរ៕
