រឿង សោភ័ណ្ឌ បានម៉ាត់ទៅលើកីឡាករថៃ Rong Keat។ ផា លីណា
.jpg)
ភ្នំពេញៈ កីឡាករជើងខ្លាំង រឿង សោភ័ណ្ឌ បានផ្តួលគូសត្រូវចាស់ Rong Keat ឲ្យសន្លប់ធំ លឿនបំផុត សម្រាប់ការវិលមកជួបគ្នា កាលពីថ្ងៃអាទិត្យ ចំណែក ពុទ្ធ ឆាយរិទ្ធី បានរកឃើញការឈ្នះក្នុងការប្រកួតសន្សំពិន្ទុ ដណ្តើមពានអន្តរជាតិ កាលពីម្សិលមិញនោះដែរ ប៉ុន្តែ ឆៃ សារ៉ា បានចាញ់ Noeng Trakan។
វាមិនមែនជាលើកទី ១ នោះទេ ដែល រឿង សោភ័ណ្ឌ បានផ្តួលជើងខ្លាំងថៃ Rong Keat ឲ្យសន្លប់ ប៉ុន្តែការបុកជង្គង់ឲ្យសន្លប់ ទឹកទី ២ ក្នុងការប្រកួតផ្តាច់ព្រ័ត្រដណ្តើមប្រាក់លាន កាលឆ្នាំ ២០១៧ ត្រូវបាន Rong Keat អះអាងថា ដោយសាររូបគេភ្លាត់ស្នៀត ពិសេសមានទម្ងន់តិចជាង សោភ័ណ្ឌ ឆ្ងាយពេក។
យ៉ាងណាក៏ដោយ ការវិលមកជួបគ្នាជាថ្មី នៅលើសង្វៀន CNC កាលពីល្ងាចម្សិលមិញ Rong Keat មិនទាន់តែបានវាយបកមកលើ រឿង សោភ័ណ្ឌ ផង ក៏ត្រូវបាន សោភ័ណ្ឌ ទាត់ចូលពេញៗ រួចស្ទុះចូលបុកកែងឆ្វេងចំថ្គាមស្តាំបណ្តាលឲ្យសន្លប់ត្រឹមពាក់កណ្តាលទឹកទី ១។ រីឯ ហ៊ីម សេរី ក៏បានឈ្នះ Loukyod ក្នុងទឹកទី ១ ដែរ ដោយសារថៃម្នាក់ បានជាប់សរសៃស្មាស្តាំ ពេលរូបគេស្ទុះចូលប្តូរកែងជាមួយ សេរី។
ការប្រកួតនៅសង្វៀន CNC នារសៀលថ្ងៃអាទិត្យ នោះដែរ ពុទ្ធ ឆាយរិទ្ធី បានរកឃើញការឈ្នះជាលើកដំបូង ក្នុងការប្រកួតសន្សំពិន្ទុដណ្តើមពានអន្តរជាតិ កំពូលអ្នកប្រដាល់កណ្តាប់ដៃដែក ISI PALM ទម្ងន់ ៦៧ គីឡូក្រាម តាមរយៈការវាយកែង និងម៉ាត់ឡាវ Phan Chhai ឡើងគាំងរហូតអាជ្ញាកណ្តាលបញ្ឈប់នៅចុងទឹកទី ៤ តែម្តង។
ការចាញ់ពិន្ទុជើងខ្លាំង Noeng Trakan ក្នុងការប្រកួតបើកឆាក កាលពីថ្ងៃទី ៤ ខែកុម្ភៈ បានជំរុញឲ្យ ពុទ្ធ ឆាយរិទ្ធី ខំប្រឹងប្រកួតខ្លាំង សម្រាប់ការជួប Phan Chhai លើកទី ២ នេះ ហើយការវាយកែង និងម៉ាត់ផ្ទួនៗជាច្រើនដៃរបស់គេ ធ្វើឲ្យឡាវម្នាក់នេះគាំងតដៃមិនកើត និងត្រូវបានអាជ្ញាកណ្តាលរាប់ នៅចុងទឹកទី ៣។
ឈានចូលទឹកទី ៤ ឆាយរិទ្ធី បានបង្កើតការម៉ាត់ និងវាយកែង កាន់តែខ្លាំង ធ្វើឲ្យ Phan Chhai គាំង និងត្រូវបានអាជ្ញាកណ្តាលរាប់ជាលើកទី ២ និងឈានដល់បញ្ឈប់ការប្រកួតនៅចុងទឹកទី ៤ នេះតែម្តង ខណៈ ឆាយរិទ្ធី បានបន្តវាយកែង និងម៉ាត់ បណ្តាលឲ្យ Phan Chhai ងើបមុខលែងរួច ជាមួយអាការស្ទើតែសន្លប់ឈរនោះ។
ជាមួយលទ្ធផលនេះ ជួយឲ្យ ពុទ្ធ ឆាយរិទ្ធី មានសង្ឃឹមឡើងវិញ ក្នុងការប្រជែងយកឱកាសឡើងទៅប្រកួតនៅវគ្គបន្ត ប៉ុន្តែ ឆៃ សារ៉ា ដែលឈ្នះ Phan Chhai ដោយពិន្ទុ កាលពីប្រកួតបើកឆាកនោះ បានមកចាញ់ Noeng Trakan ដោយពិន្ទុដាច់ សម្រាប់ការប្រកួតលើកទី ២ នេះ ធ្វើឲ្យរូបគេមាន ៤ ពិន្ទុស្មើ ឆាយរិទ្ធី ឯ Noeng Trakan ឡើងទៅឈរនៅលេខ ១ ជាបណ្តោះអាសន្ន ដោយមាន ៦ ពិន្ទុពេញ៕
