Moussa Sissoko (កណ្តាល) របស់ក្រុម Tottenham ត្រូវបានឡោមព័ទ្ធដោយខ្សែការពារនៃក្រុម Rochdale។ AFP
.jpg)
ក្រុងឡុងដ៍: ក្រុម Rochdale បានរកគ្រាប់បាល់នៅនាទីបន្ថែមដើម្បីរារាំងមិនឲ្យក្រុម Tottenham Hotspur ខណ្តើមបានជ័យជម្នះ ខណៈដែលការប្រកួតពាន FA Cup ជុំទី៥របស់ពួកគេ បានបញ្ចប់ក្នុងលទ្ធផលស្មើ ២-២ កាលពីថ្ងៃអាទិត្យ។
វាហាក់បង្ហាញថា ក្រុម Spurs ដណ្តើមបានជ័យជម្នះដើម្បីកក់កៅអីរបស់ពួកគេក្នុងវគ្គ៨ក្រុមចុងក្រោយទៅហើយ នៅពេលដែលខ្សែប្រយុទ្ធឆ្នើម Harry Kane ដែលបានចូលលេងក្នុងនាមជាកីឡាករបម្រុង បានរកគ្រាប់បាល់ប៉េណាល់ទីក្នុងពេលនៅសល់រយៈពេល២នាទីចុងក្រោយ ដើម្បីជួយឲ្យក្រុមខ្លួននាំមុខ ២-១។
ប៉ុន្តែ Rochdale ដែលបានរកគ្រាប់បាល់បើកឆាកនៅជិតបញ្ចប់តង់ទី១ តាមរយៈកីឡាករ Ian Henderson បានរកគ្រាប់បាល់តាមស្មើវិញ នៅពេលដែលខ្សែប្រយុទ្ធ Steve Davies បានរកគ្រាប់បាល់បំប៉ោងសំណាញ់ទីក្នុងប្រអប់គ្រោះថ្នាក់ នៅនាទីទី៣នៃនាទីបន្ថែម។
លទ្ធផលនេះ មានន័យថា ក្រុម Rochdale ដែលស្ថិតនៅបាតតារាងនៃក្របខ័ណ្ឌ League One អាចសម្លឹងឆ្ពោះទៅកាន់ការប្រកួតនាកីឡដ្ឋាន Wembley ខណៈដែលកីឡដ្ឋានជាតិរបស់អង់គ្លេសមួយនេះ គឺជាទឹកដីបណ្តោះអាសន្នរបស់ក្រុម Tottenham នៅមុនពេលកីឡដ្ឋាន White Hart Lane ត្រូវជួសជុលរួចរាល់ជាផ្លូវការ៕ IS
ខ្សែបម្រើអន្តរជាតិអង់គ្លេស Dele Alli ត្រូវបានធ្វើឲ្យដួលក្នុងប្រអប់គ្រោះថ្នាក់ដោយខ្សែការពារនក្រុម Rochdale។ AFP
