កំពង់ស្ពឺៈ ដីដែលគេរំលោភយកជាង ២ ពាន់ហិកតានៅដែនជម្រកសត្វព្រៃភ្នំឱរ៉ាល់ក្នុងស្រុកឱរ៉ាល់ត្រូវបានអាជ្ញាធរខេត្តកំពង់ស្ពឺសម្រេចចេញដីកាដកហូត បន្ទាប់ពីបានចុះស្រាវជ្រាវ និងកោះហៅមន្ត្រីជាច្រើននាក់សួរនាំកាលពីថ្ងៃសុក្រសប្តាហ៍មុន ប៉ុន្តែជនល្មើសមិនទាន់ត្រូវបានវែកមុខនៅឡើយទេ។
ការសម្រេចនេះគឺយោងតាមរដ្ឋធម្មនុញ្ញ ព្រះរាជក្រឹត្យ ព្រះរាជក្រម បទបញ្ជា និងលិខិតបទដ្ឋាននានាសរុបចំនួន ១១ ដែលរួមមានទាំងកំណត់ហេតុរបស់ក្រុមការងារចុះពិនិត្យ និងផ្ទៀងផ្ទាត់ជាក់ស្តែងលើទីតាំងទន្ទ្រានយកចុះថ្ងៃទី ៣០ ខែមករាឆ្នាំនេះ។
ដីកាដែលចុះហត្ថលេខាដោយអភិបាលខេត្តកំពង់ស្ពឺលោក វ៉ី សំណាង បានសម្រេច៖ «ប្រកាសបដិសេធ និងដកហូតដីព្រៃដែលទទួលរងនូវការកាប់គាស់រុករានទន្ទ្រានយក ឆ្ការដុត និងឈូសឆាយដើម្បីធ្វើជាកម្មសិទ្ធិទំហំ ២០៨៩ ហិកតាត្រូវបានជនអនាធិបតេយ្យចូលកាប់ទន្ទ្រានយក...»។ ដីកានេះក៏បានបង្គាប់ឲ្យផ្នែកពាក់ព័ន្ធយកទៅអនុវត្តឲ្យមានប្រសិទ្ធភាពខ្ពស់ផងដែរ។
លោក ឈឺន សុធន ប្រធានមន្ទីរបរិស្ថានខេត្តដែលគ្រប់គ្រងដែនជម្រកនេះបានឲ្យដឹងថា មន្ទីរបរិស្ថាន និងអាជ្ញាធរពាក់ព័ន្ធនឹងផ្សព្វផ្សាយពីដីកានេះរួមទាំងការលើកស្លាកសញ្ញា និងបិទដីកានេះ ដើម្បីឲ្យពលរដ្ឋបានយល់ដឹងផងដែរ។ ក្រៅពីនោះគម្រោងស្តារព្រៃឡើងវិញក៏នឹងត្រូវធ្វើឡើងទៀតផង។
មន្ត្រីមូលដ្ឋានយ៉ាងហោចណាស់ ៦ រូបត្រូវបានមន្ទីរបរិស្ថានកោះហៅសួររឿងទន្ទ្រានយកដីនេះកាលពីខែមករា។ ក្នុងនោះរួមមាន អធិការរងស្រុកឱរ៉ាល់ ២ នាក់ មានលោក ប្រាក់ មូល, លោក ម៉ម អាន,មេឃុំតាសាល លោក ឌុល សុខុម និងមេភូមិ ៣ នាក់ផ្សេងទៀត។
នៅមុនសុំមិនធ្វើអត្ថាធិប្បាយបន្ថែមលោក សុធន បានអះអាងថាមន្ត្រីបរិស្ថានមិនពាក់ព័ន្ធនឹងបទល្មើសនេះទេ។ ក្រៅពីការដកហូតដីកានេះក៏បានទុកពេល ៣០ ថ្ងៃនៃថ្ងៃធ្វើការដើម្បីឲ្យមានការតវ៉ាផងដែរ។
លោកអភិបាលខេត្តបានថ្លែងថាក្នុងពេល ៣០ ថ្ងៃនេះអ្នកដែលថាជាម្ចាស់កម្មសិទ្ធិ ឬមានឯកសារកាន់កាប់ មានសិទ្ធិប្តឹងជំទាស់ ហើយនេះក៏ជាឱកាសមួយដែលសមត្ថកិច្ចអាចស្រាវជ្រាវរកអ្នកទន្ទ្រានយកដីនោះផងដែរ។
លោកបានថ្លែងថា៖ «យើងទុកពេលស្រាវជ្រាវ និងឲ្យចូលខ្លួន។ គោលដៅរបស់យើងគឺសំខាន់រកអាអ្នកដែលវាប្រព្រឹត្តធ្វើឲ្យខូចព្រៃឈើដើម្បីឲ្យសងលើការខូចខាត...បើចេញមុខមកល្អជាង។ យើងដឹងថាអ្នកណាហើយ»។ លោកបន្ថែមថាអ្នកកាប់ឆ្ការឈើដ៏កម្រក៏ត្រូវប្រឈមមុខនឹងជាប់ពន្ធនាគារផងដែរ ប្រសិនបើរកឃើញ។
លោកបានឲ្យដឹងដែរថា រហូតមកទល់នឹងសប្តាហ៍មុន គ្មានអ្នកណាចេញមុខថាជាកម្មសិទ្ធិទេ ហើយក៏គ្មាន ជនសង្ស័យណាម្នាក់ត្រូវបានឃាត់ខ្លួន ដោយសារបទល្មើសនេះនៅឡើយដែរ។
លោក ជា ហ៊ាន ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋក្នុងខេត្តកំពង់ស្ពឺដែលបានចុះអង្កេតករណីនេះបានថ្លែងថា បទល្មើសនេះពាក់ព័ន្ធជាប្រព័ន្ធចាប់ពីអាជ្ញាធរមូលដ្ឋានឡើងទៅ។ បើមិនដូច្នេះទេ ក៏គេមិនអាចមានឱកាសកាប់ឆ្ការព្រៃអស់រហូតដល់រាប់ពាន់ហិកតាតាំងពីឆ្នាំ ២០១៤ មកនោះដែរ។
លោកថាផ្នែកខ្លះនៃព្រៃឈើទាំងនោះត្រូវបានគេកាប់ធ្វើធ្យូង មុនរៀបចំពលរដ្ឋខ្យល់ឲ្យចូលកាន់កាប់ ហើយក្រោយមកពួកឈ្មួញចុះទៅទិញដីនោះយកវិញ។
លោកបន្តថា បន្ទាប់ពីខេត្តចេញដីកាដកហូតហើយ លោកនឹងដាក់សំណើទៅរដ្ឋមន្ត្រីក្រសួងបរិស្ថានដើម្បីស្នើសុំដាំដើមគ្រញូង បេង នាងនួន និងធ្នង់ លើដីនោះឡើងវិញ៕