ព្រះវិហារៈ ស្ត្រីជាប្រពន្ធបានស្លាប់នៅនឹងកន្លែងកើតហេតុ ខណៈប្ដីបានសន្លប់ស្ដូកស្ដឹង និងកំពុងស្ថិតក្រោមការជួយសង្គ្រោះព្យាបាលពីក្រុមគ្រូពេទ្យខេត្តព្រះវិហារ បន្ទាប់ពីពួកគេបានចេញទៅរកឆក់ត្រីនៅតាមដងអូរក្បែរវាលស្រែ ក្នុងភូមិរបស់ពួកគេកាលពីរសៀលថ្ងៃសៅរ៍ ហើយមិនប្រយ័ត្នត្រូវឆក់ខ្លួនឯង។
លោក ជុំ សាវិន នាយប៉ុស្តិ៍ឃុំយាងបានឲ្យដឹងថា ស្ត្រីដែលបានស្លាប់ក្នុងករណីខាងលើឈ្មោះ សាមួន នេន អាយុ ២៨ ឆ្នាំ ជាកសិករនៅភូមិជាំស្រែ ឃុំយាង ស្រុកជាំក្សាន្ត ចំណែកបុរសជាប្តីដែលសន្លប់ស្ដូកស្ដឹង និងកំពុងសម្រាកព្យាបាលនៅក្នុងមន្ទីរពេទ្យខេត្តនៅឡើយ ឈ្មោះ វ៉ាត ហុង អាយុ ៣៧ ឆ្នាំ។ ពួកគេមានកូនប្រុសស្រីចំនួន ៣ នាក់ដែលមានអាយុចន្លោះពី ៦ ខែដល់ ៨ ឆ្នាំ។
លោក សាវិន បានបញ្ជាក់ថា៖ «នៅក្បែរកន្លែងកើតហេតុ យើងបានប្រទះឃើញឧបករណ៍ឆក់ត្រី ដូច្នេះយើងសន្និដ្ឋានថា ពួកគេស្លាប់ដោយសារឆក់ខ្សែភ្លើង ដែលឆ្លងពីឧបរណ៍ឆក់ត្រីរបស់ពួកគេនោះតែម្ដង»។
បើតាមការអះអាងរបស់អ្នកភូមិនៅវេលាម៉ោង ៣:៣៥ នាទីរសៀលថ្ងៃសៅរ៍ គេឃើញកុមារា ហុង ម៉ានិត អាយុ ៨ ឆ្នាំដែលជាកូនប្រុសច្បងជនរងគ្រោះទាំង ២ បានរត់មកប្រាប់អ្នកភូមិថា ឪពុកម្ដាយរបស់គេកំពុងប្រកាច់នៅក្នុងទឹកអូរ។
លុះអ្នកភូមិទៅដល់កន្លែងកើតហេតុមិនឃើញស្ដ្រីជាប្រពន្ធទេ តែឃើញបុរសជាប្ដីដួលផ្ងាប់មុខនៅក្នុងទឹកអូរក៏នាំគ្នាចុះស្រង់មកលើគោក រួចហើយក៏នាំគ្នាចុះរាវក្នុងទឹកអូរម្ដងទៀតក៏ប្រទះឃើញសពស្ត្រីរងគ្រោះ។ បន្ទាប់មកក៏បាននាំបុរសជាប្ដីទៅកាន់មណ្ឌលសុខភាពឃុំយាង ហើយត្រូវបុគ្គលិកសុខាភិបាលក្នុងមណ្ឌលសុខភាពបញ្ជូនបន្តទៅកាន់មន្ទីរពេទ្យ ខេត្តព្រះវិហារ។
កាលពីម្សិលមិញលោក រួន យ៉េត អធិការស្រុកជាំក្សាន្តបានថ្លែងថា បុរសរងគ្រោះនៅមិនទាន់ដឹងខ្លួននៅឡើយទេ ហើយកំពុងស្ថិតនៅក្រោមការត្រួតពិនិត្យព្យាបាលពីក្រុមវេជ្ជបណ្ឌិត។
ជាមួយគ្នានេះផងដែរលោក យ៉េត បានស្តីបន្ទោសថា៖ «ទាំងនេះជាលទ្ធផលដែលមិនចូលរួមអនុវត្តតាមការណែនាំរបស់អាជ្ញាធរ។ សមត្ថកិច្ចយើងជាញឹកញាប់បានសហការជាមួយក្រុមមន្ត្រីរដ្ឋបាលជលផល ចុះណែនាំពលរដ្ឋឲ្យបញ្ឈប់ការនេសាទត្រីដោយប្រើឧបករណ៍ឆក់ល្មើសច្បាប់ ពីព្រោះវាមិនត្រឹមតែបង្កមហន្តរាយទៅដល់មច្ឆជាតិ និងជីវចម្រុះតែប៉ុណ្ណោះទេ គឺវាថែមទាំងបង្កឲ្យមានគ្រោះថ្នាក់ដល់អាយុជីវិតមនុស្សផងដែរ»៕