តំណាងពលរដ្ឋ លើកលិខិតកោះហៅ ឲ្យចូលខ្លួននៅប៉េអឹមខេត្តកណ្តាល នាព្រឹកមិញនេះ ពេលចូលរួមតវ៉ាមុខសាលាខេត្តកណ្តាល។ ផា លីណា
ភ្នំពេញៈ ប្រជាពលរដ្ឋប្រមាណជិត ២០០ នាក់មកពី ៤ ឃុំនៅខេត្តកណ្តាល ដែលរងផលប៉ះពាល់របស់ក្រុមហ៊ុន ហេង អភិវឌ្ឍន៍ របស់លោកស្រី សៀង ចាន់ហេង បានលើកគ្នាមកសាលាខេត្តកណ្តាល ដើម្បីស្វែងរកកិច្ចអន្តរាគមន៍ពីលោកអភិបាលខេត្ត ឲ្យពិនិត្យទៅការលើការកោះហៅតំណាងរបស់ខ្លួន ៦ នាក់ដោយចោទប្រកាន់ពួកគេពីបទញុះញង់ និង រារាំងគ្រឿងចក្រនិងពន្លឿនការដោះស្រាយដីធ្លីជូនពួកគាត់។
ការតវ៉ានេះ កើតមានបន្ទាប់ពីមន្ត្រីកងរាជអាវុធហត្ថខេត្តកណ្តាល បានធ្វើការកោះហៅតំណាង ៦ នាក់នៅឃុំព្រែកស្លែង ដែលក្រុមហ៊ុនបានចោទប្រកាន់ថា បានពាក់ព័ន្ធនិងការបំផុសបំផុលនិងការដឹកនាំក្រុមប្រជាជនធ្វើការរារំាងគ្រឿងចក្រមិនឲ្យដំណើរការកាយដីកម្មសិទ្ធស្របច្បាប់របស់ក្រុមហ៊ុន។
.jpg)
កាលពីដើមខែកុម្ភៈ អ្នកភូមិប្រមាណជាង ១០០ នាក់មកពីឃុំព្រែកស្លែង ស្រុកកណ្តាលស្ទឹង បានរារាំងក្រុមហ៊ុនធ្វើការឈូសឆាយ និងជីកទំនប់នៅលើដីដែលមានជម្លោះដែលនៅជិតគម្រោងអភិវឌ្ឍន៍ព្រលានយន្តហោះដ៏ធំមួយ ដែលបានប្រកាស កាលពីខែ មករា ហើយជម្លោះដីធ្លីដ៏រ៉ាំរ៉ៃជាច្រើនឆ្នាំនៅក្នុងឃុំមួយចំនួន នៃស្រុក កណ្តាលស្ទឹង បានចាប់តាំងឡើងវិញបន្ទាប់រាជរដ្ឋាភិបាលបានប្រកាសរបស់ពីគម្រោងរបស់ខ្លួន។
អ្នកស្រី អឿង សារី តំណាងឲ្យប្រជាជនក្នុងឃុំព្រែកស្លែងដែលត្រូវបានកោះហៅដោយកងរាជអាវុធហត្ថ ថាលោកស្រីនិងតំណាងផ្សេងទៀតមិនទៅបំភ្លឺនៅកងរាជអាវុធហត្ថខេត្តកណ្តាលទេដោយសារស្ថាប័នទាំងនោះមិនអាចជួយអន្តរាគមន៍និងដោះស្រាយជូនពួកគាត់តែថែមទាំងដាក់សម្ពាធលើពួកគាត់។
អ្នកស្រី បានមានប្រសាសន៍ថា ៖ «យើងមិនទៅដោយសារតែពួកយើងរងនៅការដែលគេរំលោភយកដីហើយបែរជាអ្នកយកដីប្តឹងពួកយើងវិញ ដូច្នេះយើងមិនទៅស្រាយបំភ្លឺទេ។ បើគេចាប់ខ្លួន តាមដំណើរទៅ។ ហើយចាប់ប្រជាជនទាំងអស់ដាក់គោកទៅពីប្រជាជនទាំងអស់ក៍ជាម្ចាស់ដីដែរ… បង្ហាញថារដ្ឋាភិបាលមិនជួយដោះស្រាយជូនប្រជាជនតែបែរជាចាប់ប្រជាជនដាក់គុក ហើយរដ្ឋាភិបាលលំអៀងទៅកាន់ក្រុមដែលយកដីប្រជាជន»។
ជម្លោះដីធ្លីដ៏ជូរចត់ រវាងក្រុមហ៊ុន ហេង អភិវឌ្ឍន៍ របស់លោកស្រី សៀងចាន់ហេង និងអ្នកភូមិបានវិលត្រឡប់មកវិញសាជាថ្មី ក្រោយមានការប្រកាសគម្រោងព្រលានយន្តហោះ ដ៏ធំនៅស្រុកកណ្តាលស្ទឹងនេះ។
កាលពីនៅឆ្នាំ ២០០៩ ជម្លោះផ្ទុះឡើងទៅជាអំពើហិង្សាបន្ទាប់ពីកំលាំងកងរាជអាវុធហត្ថខេត្តបានបាញ់ទៅលើក្រុមអ្នកតវ៉ាដែលធ្វើឱ្យរងរបួសពីរនាក់៕
