ភ្នំពេញៈ ប្រធានចលនាសង្គ្រោះជាតិលោក សម រង្ស៊ី បានប្តេជ្ញាប្រយុទ្ធស្រោចស្រង់គណបក្សសង្គ្រោះជាតិដែលត្រូវបានរំលាយនោះយកមកវិញ ហើយប្រកាសតតាំងទល់នឹងលោកនាយករដ្ឋមន្ត្រី ហ៊ុន សែន ក្នុងសង្វៀននយោបាយឆ្នាំ ២០១៨ នេះដែលជាទឹកផ្តាច់ព្រ័ត្រ ដើម្បីរំដោះប្រទេសជាតិពីក្នុងរបបសព្វថ្ងៃ និងបានអំពាវនាវឲ្យសមាជិកបក្សកាន់អំណាចចូលរួមសង្គ្រោះជាតិជាមួយលោក។
លោក សម រង្ស៊ី ដែលជាអតីតប្រធានគណបក្សសង្គ្រោះជាតិផងដែរ និងកំពុងនិរទេសខ្លួននៅក្រៅប្រទេស ដើម្បីគេចពីការតាមចាប់ខ្លួនពីអាជ្ញាធរលោក ហ៊ុន សែន ជាគូប្រកួតនយោបាយរបស់ខ្លួននោះក្នុងជំនួបជាមួយអ្នកគាំទ្រជាង ១០០ នាក់ក្នុងវត្តមួយ ក្នុងទីក្រុងមែលប៊ន ប្រទេសអូស្ត្រាលី កាលពីថ្ងៃទី ១៥ កុម្ភៈ អតីតមេដឹកនាំគណបក្សប្រឆាំងមួយនេះ បានអំពាវនាវម្តងហើយម្តងទៀតឲ្យមន្ត្រីគណបក្សប្រជាជនកម្ពុជាដែលជាបក្សកាន់អំណាចរបស់លោកនាយករដ្ឋមន្ត្រី ហ៊ុន សែន ចុះចូលជាមួយចលនាសង្គ្រោះជាតិ ដើម្បីសង្គ្រោះប្រទេសពីការគ្រប់គ្រងរបស់ ហ៊ុន សែន ឡើងវិញ។
លោកចាត់ទុកលោកនាយករដ្ឋមន្ត្រី ហ៊ុន សែន ជាអ្នកបំផ្លាញប្រជាធិបតេយ្យនៅកម្ពុជា និងជាជនឧក្រិដ្ឋ។
លោក សម រង្ស៊ី ថ្លែងថា៖ «ដរាបណាខ្ញុំនៅមានជីវិត ដរាបណាខ្ញុំនៅមានសេរីភាព ខ្ញុំនឹងធ្វើឲ្យគណបក្សសង្គ្រោះជាតិរស់ឡើងវិញ ដំណើរការទៅមុខ អត់គាំងដាច់ខាត។ ហ៊ុន សែន មិនដឹងសប្បាយចិត្តយ៉ាងណា យួនមិនដឹងសប្បាយចិត្តយ៉ាងណា បើ សម រង្ស៊ី ឈប់ធ្វើនយោបាយ បើ សម រង្ស៊ី ឱបដៃ កឹម សុខា ជាប់គុក សមាជិកគណបក្សសង្គ្រោះជាតិរងា តែលតោល ស្ទើរតែអស់សង្ឃឹម»។
ជាមួយនឹងការអំពាវនាវនេះលោក រង្ស៊ី ក៏បានប្រាប់ទៅអ្នកគាំទ្រចលនាសង្គ្រោះជាតិទាំងអស់មិនត្រូវបង្ហាញអត្តសញ្ញាណ និងត្រូវឆ្លើយថាមិនគាំទ្របើសិនត្រូវបានគេសួរអំពីចលនានេះ។ លោកថ្លែងថា លោក កឹម សុខា ដែលកំពុងនៅក្នុងគុក គឺមិនអាចបះបោរ ឬអំពាវនាវកុំឲ្យកងទ័ពបាញ់ប្រជារាស្ត្រ និងធ្វើឲ្យផ្ទៃក្នុងគណបក្សប្រជាជនបែកខ្ញែកបាននោះទេ មានន័យថា កឹម សុខា មិនអាចនិយាយអ្វីកើតទេ។
លោកបញ្ជាក់ថា៖ «បងប្អូន អ៊ីចឹងសួរថា កឹម សុខា គាំទ្រចលនាសង្គ្រោះជាតិទេ? កឹម សុខា ច្បាស់ជាអត់ថាអ្វីទាំងអស់ ថាអី្វក្នុងកណ្តាប់ដៃគេ ហ៊ាន? សម រង្ស៊ី តតាំងជាមួយ ហ៊ុន សែន ប្រយុទ្ធជាមួយ ហ៊ុន សែន ផ្ដាច់ព្រ័ត្រ ធ្វើម៉េចរំដោះប្រទេសជាតិពីក្រញាំជនពាល ជនឃាតករ ជនក្បត់ជាតិ ហ៊ុន សែន»។
លោកបញ្ជាក់ថា៖ «ខ្ញុំប្រាប់ទៅបងប្អូនយើងក្នុងជួរគណបក្សប្រជាជន មានតែ ហ៊ុន សែន ទេដែលជាជនឧក្រិដ្ឋ បើបងប្អូននៅជាមួយ ហ៊ុន សែន បងប្អូនធ្វើតាមបញ្ជា ហ៊ុន សែន ជាពិសេសទាហាន ប៉ូលិស ទៅបាញ់ប្រជារាស្ត្រតាមបញ្ជា ហ៊ុន សែន ក្លាយទៅជាជនឧក្រិដ្ឋ។ សូមបងប្អូនកុំភ្ជាប់វាសនាបងប្អូនជាមួយជនឧក្រិដ្ឋ ហ៊ុន សែន។ ជនឧក្រិដ្ឋ ហ៊ុន សែន អស់លក្ខណ៍ហើយ បងប្អូនចាកចេញពី ហ៊ុន សែន មកចាប់ដៃជាមួយសង្គ្រោះជាតិ សង្គ្រោះជាតិរបស់យើងជាមួយគ្នា»។
លោកក៏អះអាងថា រដ្ឋាភិបាលរបស់លោក ហ៊ុន សែន កំពុងរងគំនាបរបស់សហគមន៍អន្តរជាតិជុំវិញវិបត្តិនយោបាយនៅកម្ពុជាក្រោយការចាប់ខ្លួនអតីតមេបក្សប្រឆាំងលោក កឹម សុខា និងការរំលាយគណបក្សសង្គ្រោះជាតិដែលជាគូប្រជែងតែមួយគត់របស់គណបក្សប្រជាជនកម្ពុជាសម្រាប់ការបោះឆ្នោតជាតិនាខែកក្កដាឆ្នាំនេះ។
ជាមួយគ្នានេះដែរចលនាសង្គ្រោះជាតិក៏បានចាប់ផ្ដើមយុទ្ធនាការអំពាវនាវឲ្យប្រជាពលរដ្ឋធ្វើពហិការឈប់ទិញទឹកសុទ្ធម៉ាក វីតាល់ (Vital) និងមុខទំនិញមួយចំនួនផ្សេងៗទៀតចាប់ពីសប្ដាហ៍ក្រោយដោយលើកឡើងថា ផលិតផលទាំងនោះជារបស់គ្រួសារត្រកូល ហ៊ុន និងបក្ខពួកដែលបំផ្លាញលទ្ធិប្រជាធិបតេយ្យនៅកម្ពុជា។
ប៉ុន្តែអ្នកនាំពាក្យគណបក្សប្រជាជនកម្ពុជាលោក សុខ ឥសាន អះអាងថា ពលរដ្ឋកម្ពុជានឹងមិនស្ដាប់តាមការអំពាវនាវរបស់ចលនាសង្គ្រោះជាតិដាច់ខាត ព្រោះពួកគេត្រូវការទឹកដើម្បីបរិភោគ។
លោកថ្លែងថា៖ «ខ្ញុំថា ការអំពាវនាវរបស់ក្រុមមេឧទ្ទាមក្រៅច្បាប់ វាកាន់តែបញ្ជាក់ឲ្យឃើញពីចរិតពិសពុល។ បើចង់អត់ទឹក អាហ្នឹងអត់ខ្លួនឯងទៅ ចាំបាច់អីទៅអំពាវនាវ ឬក៏អូសទាញប្រជាជនឲ្យឈប់ផឹកទឹកម៉េចកើត ហើយវាគ្មានប្រជាជនណាឆោតល្ងង់ទៅជឿពួកឧទ្ទាមនោះទេ»។
លោកក៏មិនជឿថា មន្ត្រីគណបក្សរបស់លោកនឹងរត់ទៅចូលរួមជាមួយចលនាសង្គ្រោះជាតិនោះដែរ ហើយលោកក៏ហៅ «ការប្រយុទ្ធចុងក្រោយ» របស់លោក សម រង្ស៊ីថាជាការស្លាប់របស់លោក រង្ស៊ី ផងដែរ។
លោកថ្លែងថា៖ «គណបក្សប្រជាជនមិនល្ងង់ សមាជិកគណបក្សប្រជាជនមិនភ្លើទៅតាមការញុះញង់ អូសទាញរបស់ទណ្ឌិត សម រង្ស៊ី ទេ ហើយការដែលទៅអូស្ត្រាលីលើកនេះ វាឆ្លុះបញ្ចាំងឲ្យឃើញថា វាអស់គុម្ពោតជ្រកហើយ ទៅអាមេរិកវាអត់បានការ ទៅ EU ក៏អត់បានការ រហូតដល់អំពាវនាវឲ្យអាមេរិក ទៅអូសទាញជប៉ុន និងកូរ៉េខាងត្បូង វាអត់បានការទៀត ឥឡូវទៅដល់អូស្ត្រាលីក៏អត់បានការទៀត»។
លោកបន្ថែមថា៖ «ការប្រយុទ្ធផ្ដាច់ព្រ័ត្ររបស់ទណ្ឌិត សម រង្ស៊ី វាជាការស្លាប់ចុងក្រោយរបស់ សម រង្ស៊ី តែប៉ុណ្ណោះ ឬជាបរាជ័យចុងក្រោយរបស់ សម រង្ស៊ី»។
ដោយឡែកលោក លី សុផាណា អ្នកនាំពាក្យសាលាដំបូងរាជធានីភ្នំពេញអះអាងថា ស្ថាបនិក និងសមាជិកពេញសិទ្ធិនៃចលនាសង្គ្រោះជាតិ ត្រូវបានតុលាការកំពុងស៊ើបអង្កេត និងចាត់វិធានការយ៉ាងតឹងរ៉ឹងដែលក្នុងនោះស្ថាបនិក និងសមាជិកពេញសិទ្ធិនៃចលនាសង្គ្រោះជាតិរួមមានទណ្ឌិត សម រង្ស៊ី ជាប្រធាន, លោក សុខា លី ជាអនុប្រធាន, លោក រី គា ជាអគ្គលេខាធិការ, លោក អូន ឈឹម, លោក សៀ ភារម្យ, លោក សូរី ប៉ុន និងបុគ្គលមួយចំនួនទៀតព្រមទាំងអតីតសមាជិកគណបក្សសង្គ្រោះជាតិមួយចំនួនរួមមានលោកស្រី ជូឡុង ស៊ូមួរ៉ា, លោក ហូរ វ៉ាន់, លោក តុ វ៉ាន់ចាន់, លោក នុត រំដួល និងបុគ្គលមួយចំនួនដែលជាប់ពាក់ព័ន្ធក៏កំពុងស្ថិតក្រោមការស៊ើបអង្កេតរបស់តុលាការ និងស្ថាប័នមានសមត្ថកិច្ចផងដែរ។
លោក សុផាណា បានបញ្ជាក់ថា៖ «យោងតាមសំណុំរឿងដែលបានទទួល ចលនាសង្គ្រោះជាតិនេះត្រូវបានបង្កើតឡើង ដើម្បីញុះញង់ឲ្យប្រជាពលរដ្ឋ និងកម្លាំងប្រដាប់អាវុធធ្វើការបះបោរប្រឆាំងនឹងរាជការដែលជារដ្ឋអំណាចស្របច្បាប់។ អំពើដូចនេះមិនខុសពីអំពើឧទ្ទាម ដែលជាអំពើប្រឆាំងនឹងសន្តិសុខជាតិ ខុសទៅនឹងក្រមព្រហ្មទណ្ឌនៃព្រះរាជាណាចក្រកម្ពុជាឡើយ។ អយ្យការកំពុងពិនិត្យ និងចាត់ការលើពាក្យបណ្តឹងនេះ ហើយថ្នាក់ដឹកនាំនៃចលនាខុសច្បាប់នេះរួមទាំងបណ្តាញសែរយៈនៃចលនាខុសច្បាប់នេះ ទាំងក្នុងស្រុក ទាំងក្រៅស្រុក កំពុងស្ថិតក្រោមការស៊ើបអង្កេតរបស់ស្ថាប័នមានសមត្ថកិច្ច»។
លោកបណ្ឌិត ឡៅ ម៉ុងហៃ អ្នកវិភាគនយោបាយលើកឡើងថា អង្គការក្រៅរដ្ឋាភិបាលខ្លះបានបើកយុទ្ធនាការដូចនេះកាលពី ២ ឆ្នាំមុន បន្ទាប់ពីមានការបង្ក្រាបរបស់រដ្ឋាភិបាលមកលើក្រុមអង្គការសង្គមស៊ីវិល។
លោកថា យុទ្ធនាការមុននោះមិនទទួលបានជោគជ័យទេ ប៉ុន្តែម្ដងនេះវាអាចទទួលបានជោគជ័យជាងនៅពេលដែលស្មារតី ឬគំនិតផ្លាស់ប្ដូររបស់គណបក្សសង្គ្រោះជាតិហាក់ដូចជានៅតែមានសន្ទុះខ្លាំងនៅឡើយក្នុងប្រទេស ប្រសិនបើអ្នកគាំទ្រគណបក្សសង្គ្រោះជាតិទូទាំងប្រទេសអាចទទួលបានសារអំពាវនាវនេះ។
លោកបណ្ឌិត ឡៅ ម៉ុងហៃ ថ្លែងថា៖ «ពេលគាត់មានវត្តមាននៅក្នុងស្រុកគាត់មានអង្គភាពមួយគឺគណបក្សសង្គ្រោះជាតិដើម្បីជួយ មានសេរីភាពក្នុងការធ្វើប្រតិបត្តិការ និងមានអ្នកបោះឆ្នោតជិតពាក់កណ្ដាលនៅគាំទ្រគាត់។ ជាមួយនឹងការប្រយុទ្ធផ្ដាច់ព្រ័ត្ររបស់លោក សម រង្ស៊ី ជាមួយនឹងលោក ហ៊ុន សែន អាចនឹងមិនទទួលបានជោគជ័យទេ។ តែទោះជាយ៉ាងណាក៏ដោយនេះគឺជាកម្ពុជា ហើយអ្វីៗក៏អាចកើតឡើងបានដែរនៅក្នុងប្រទេសនេះ»៕