អតីត​ប្រធាន​អង្គរក្ស​សព​លោក​ ជា ស៊ីម ត្រូវ​បាន​តុលាការ​លើក​មក​ជម្រះ

Content image - Phnom Penh Post
អតីត​ផ្កាយ​ ៣ ​លោក​ ឈឿន ចាន់ថន ​ពេល​ត្រូវ​នាំ​សវនាការ​សាលា​ឧទ្ធរណ៍​កាល​ពី​ឆ្នាំ ២០១៥។ ផា លីណា

ភ្នំពេញ: អតីត​ផ្កាយ​ ៣ ​លោក​ ឈឿន ចាន់ថន ​ប្រធាន​កង​អង្គរក្ស​ និង​ក៏​ជា​នាយរង​សេនាធិការ​ចម្រុះ​នៃ​កងយោធពល​ខេមរភូមិន្ទ​នៃ​សព​លោក​ ជាស៊ីម ​អតីត​ប្រធាន​ព្រឹទ្ធសភា​ត្រូវ​បាន​តុលាការ​កំពូល​ពី​ម្សិលមិញ​កោះ​ហៅ​មក​ជំនុំជម្រះ​ជា​លើក​ទី​ ២ ​ពាក់ព័ន្ធ​បទ​ចោទ​ ៧ ​ករណី​បន្ទាប់ពី​ត្រូវ​តុលាការ​ថ្នាក់​ក្រោម​ផ្តន្ទាទោស​ដាក់​គុក​សរុប​ ៣៦ ​ឆ្នាំ​។

នៅ​ក្នុង​អង្គ​សវនាការ​ដែល​មាន​សមាសភាព​ចៅក្រម​ ៩ ​រូប​លោក ឈឿន ចាន់ថន អាយុ​ ៤៧ ​ឆ្នាំ​ដែល​ត្រូវ​បាន​ផ្តល់​សិទ្ធិ​ឲ្យ​ឡើង​ឆ្លើយ​បំភ្លឺ​នោះ​បាន​ឆ្លើយ​ប្រាប់​ចៅក្រម​ថា​៖ «​នៅ​ពេល​នេះ​ដោយសារ​តែ​ខ្ញុំ​ជាប់គុក​ជាង​ ៧ ​ឆ្នាំ​ទៅ​ហើយ​នោះ​ខ្ញុំ​ហាក់​គ្មាន​អ្វី​និយាយ​ច្រើន​ទេ​។ ​ប៉ុន្តែ​ខ្ញុំ​ប្តឹង​សារទុក្ខ​មក​តុលាការ​កំពូល​ពេល​នេះ​ព្រោះ​តែ​ខ្ញុំ​មិន​សុខ​ចិត្ត​ទៅ​នឹង​តុលាការ​យោធា​ដែល​ចោទ​ខ្ញុំ​ខណៈ​ខ្ញុំ​មិន​បាន​ប្រព្រឹត្ត​សោះ​។ ការ​ចោទ​នេះ​ប្រសិន​ចោទ​មិន​ត្រូវ​ ឬ ក៏​ប៊ិះ​នឹង​ត្រូវ​ក៏​ខ្ញុំ​សុខចិត្ត​ទទួល​យក​ដែរ​តែ​ការ​ចោទ​នេះ​ខុស​។ ​យ៉ាង​ណា​ខ្ញុំ​ទុក​សិទ្ធិ​ឲ្យ​មេធាវី​របស់​ខ្ញុំ​ឡើង​សន្និដ្ឋាន​ជំនួស​ខ្ញុំ​ចុះ​»​។

ទោះ​យ៉ាង​ណា​លោកស្រី​ចៅក្រម គឹម សត្ថាវី ក្នុង​ចំណោម​ចៅក្រម​ទាំង​ ៩ ​រូប​បាន​ពន្យល់​ទៅ​ជន​ជាប់ចោទ​ ខណៈ​អវត្តមាន​លោក​មេធាវី​ណាចទ្រី​តំណាង​ឲ្យ​ដើម​បណ្តឹង​រដ្ឋប្បវេណី​ថា​៖ «​នៅ​ក្នុង​សំណុំ​រឿង​របស់​លោក​នេះ​គឺ​មាន​តុលាការ​យោធា​ចោទប្រកាន់​ផង​ និង​មាន​តុលាការ​ស៊ីវិល​ចោទប្រកាន់​ផង​។ ​ឯ​នៅ​តុលាការ​ស៊ីវិល​លោក​ជាប់ទោស​ ១៥ ​ឆ្នាំ​»​។

លោក ឈឿន ចាន់ថន ត្រូវ​កម្លាំង​កងរាជ​អាវុធហត្ថ​ចាប់​ខ្លួន​កាលពី​ថ្ងៃ​ទី​ ១៣ ខែ​សីហា​ឆ្នាំ​ ២០១១ នៅ​ក្នុង​ភូមិគ្រឹះ​លេខ​ ៦៥ ​ផ្លូវ​លេខ​ ៩៥ ​​សង្កាត់​បឹងកេងកង​ទី​ ៣ ​ខណ្ឌ​ចំការមន​។

សំណុំ​រឿង​នេះ​ត្រូវ​បាន​តុលាការ​យោធា​បើក​សវនាការ​ និង​ប្រកាស​សាលក្រម​នៅ​ថ្ងៃ​ ២៤ ​កុម្ភៈ​ ២០១២ ​ផ្តន្ទាទោស​ដាក់គុក​ ២៦ ​ឆ្នាំ​ចោទ​ពី​បទ​ «​រំលោភ​លើ​ទំនុក​ចិត្ត​, បំផ្លិច​បំផ្លាញ​ដោយ​ចេតនា​, គៃ​បំបាត់​ដោយ​ទុច្ចរិត​, លក់ដូរ និង​ចែកចាយ​អាវុធ​, បំផ្លិច​បំផ្លាញ​នូវ​សម្ភារ​យោធា​សម្រាប់​បម្រើការ​ប្រយុទ្ធ​ និង​ខ្វះ​ស្មារតី​ទទួល​ខុសត្រូវ​ក្នុង​ការ​ដឹកនាំ​គ្រប់គ្រង​អង្គភាព ​” តាម​បញ្ញត្តិ​មាត្រា​ ៦០១ ​មាត្រា​ ៤៤៧ ​មាត្រា​ ៣៩២ ​នៃ​ក្រម​ព្រហ្មទណ្ឌ​មាត្រា​ ២០ ​នៃ​ច្បាប់​ស្ដីពី​ការ​គ្រប់គ្រង​អាវុធ​ជាតិ​ផ្ទុះ​ និង​គ្រាប់​រំសេវ និង​មាត្រា​ ៩ ​នៃ​ក្រឹត្យ​ច្បាប់​លេខ​ ០៤ ​ឆ្នាំ​​ ១៩៨១ ​ប្រព្រឹត្ត​នៅ​រាជធានី​ភ្នំពេញ​។

សំណុំ​រឿង​នេះ​ជន​ជាប់ចោទ​ក៏​ត្រូវ​បាន​សាលាដំបូង​បំបែក​ជា​សំណុំ​រឿង​ស៊ីវិល​មួយ​ករណី​ទៀត​ដោយ​សម្រេច​ផ្តន្ទាទោស​ដាក់គុក​ ១០ ​ឆ្នាំ​ពាក់ព័ន្ធ​បទ​ចោទ​ ៣ ​ករណី «​កាន់កាប់​អាវុធ​ និង​គ្រាប់រំសេវ​ដោយ​គ្មាន​ការ​អនុញ្ញាត ការ​ចេញ​ប័ណ្ណ​អនុញ្ញាត​ឲ្យ​ប្រើប្រាស់​អាវុធ​ និង​គ្រាប់​រំសេវ​ដែល​ពុំ​មែន​ជា​សមត្ថកិច្ច​របស់​ខ្លួន ការ​ក្លែងបន្លំ​ឯកសារ​សាធារណៈ និង​ការ​ប្រើប្រាស់​ឯកសារ​សាធារណៈ​ហើយ​ត្រូវ​បាន​ផ្ដន្ទាទោស​ដាក់​ពន្ធនាគារ​ ១០ ​ឆ្នាំ​ និង​ពិន័យ​ប្រាក់​ ១០ ​លាន​រៀល​ចូល​ថវិការដ្ឋ និង​បង្គាប់​ឲ្យ​ជន​ជាប់ចោទ​សង​​សរុប​ជាង​ ១៧២ ​ម៉ឺន​ដុល្លារ​ទៅ​ដើម​បណ្តឹង​ ៣ ​នាក់ ។

លោក​ព្រះរាជអាជ្ញា ឌុច គឹមសន តំណាង​មហាអយ្យការ​សន្និដ្ឋាន​ថា​សំណុំ​រឿង​នេះ​បើ​តាម​ឯកសារ និង​អង្គហេតុ​បង្ហាញ​ថា​ជន​ជាប់ចោទ​ពិតជា​បាន​ប្រព្រឹត្ត​ដូច​ការ​ចោទប្រកាន់​មែន​។ ​ចំពោះ​សាលា​ឧទ្ធរណ៍​កែប្រែ​ទោស​ពី​ ២៦ ​ឆ្នាំ​មក​ ១៥ ​ឆ្នាំ​វិញ​នោះ​ជា​ការ​ត្រឹមត្រូវ​ហើយ​។ «​ដូច្នេះ​ខ្ញុំ​រក្សា​សាលដីកា​របស់​សាលា​ឧទ្ធរណ៍​នៅ​ដដែល​»​។

លោក ពុធ ធាវី មេធាវី​ការពារ​សិទ្ធិ​ឲ្យ​ជន​ជាប់ចោទ​សន្និដ្ឋាន​ថា​តាមពិត​ទៅ​កូនក្តី​របស់​លោក​ដែល​តុលាការ​ថ្នាក់​ក្រោម​ដាក់គុក​ ១០ ​ឆ្នាំ​នោះ​កាល​ដីកា​របស់​គាត់​បាន​ចូល​ជា​ស្ថាពរ​ហើយ​ ខណៈ​គាត់​ក៏​អនុវត្ត​ទោស​បាន​ជាង​ ៧ ​ឆ្នាំ​ហើយ​ដែរ ​«​ឯ​ទណ្ឌកម្ម​ទោស​របស់​គាត់​ ១៥ ​ឆ្នាំ​សូម​តុលាការ​តម្រឹម​ត្រឹម​ ១០ ​ឆ្នាំ​បាន​ហើយ​»​។

ក្រោយ​ជំនុំជម្រះ លោក​ចៅក្រម ឃឹម ប៉ុណ្ណ ប្រធាន​ក្រុមប្រឹក្សា​ជំនុំជម្រះ​នៃ​អង្គ​សវនាការ​បាន​ប្រកាស​ថា​សាល​ដីកា​នេះ​ប្រកាស​នៅ​ថ្ងៃ​ទី​ ៩ ខែ តុលា ឆ្នាំ​ ២០១៧៕