ក្រុងប៉ារីសៈ លោក Pierre Moscovici គណៈកម្មាការកិច្ចការសេដ្ឋកិច្ចរបស់សហភាពអឺរ៉ុប បានឲ្យដឹងកាលពីថ្ងៃអាទិត្យថា លោកមិនរំពឹងថា នឹងមានកិច្ចព្រមព្រៀង «ដ៏ប្រសើរ» មួយស្តីពីកំណែទម្រង់នៅតំបន់រូបិយប័ណ្ណតែមួយនៅកិច្ចប្រជុំកំពូលរបស់សហភាពអឺរ៉ុបក្នុងខែមិថុនា ខាងមុខនេះនោះទេ។
លោកបានប្រាប់វិទ្យុបារាំង RFI នៅមុនកិច្ចប្រជុំរបស់រដ្ឋមន្ត្រីហិរញ្ញវត្ថុអឺរ៉ុបនាទីក្រុង ព្រុចសែល ថា៖ «យើងនឹងមិនទទួលបានអ្វីនោះទេ។ យើងនឹងមិនមានកិច្ចព្រមព្រៀងដ៏ល្អមួយឡើយ ប៉ុន្តែបើមានវឌ្ឍនភាពស្តីពីការគ្រប់គ្រងវិបត្តិ សមត្ថភាពប្រយុទ្ធប្រឆាំងនឹងវិបត្តិនោះ យើងនឹងអាចបោះជំហ៊ានទៅមុខដ៏ប្រសើរមិនខាន»។
ខណៈតំបន់ប្រើប្រាស់រូបិយប័ណ្ណតែមួយដែលមានប្រទេសជាសមាជិកចំនួន ១៩ នៅទីបំផុតងើបចេញពីវិបត្តិអស់រយៈពេលជាច្រើនឆ្នាំនោះ មានការព្រមព្រៀងនៅក្នុងចំណោមរដ្ឋាភិបាលជាច្រើនរបស់តំបន់នេះថា ខ្លួនត្រូវតែទទួលបានការពង្រឹង ដើម្បីជម្នះបានកាន់តែប្រសើរនូវវិបត្តិសេដ្ឋកិច្ចនាពេលអនាគត តែមិនមែនប្រទេសទាំងអស់សុទ្ធតែឯកភាពចំពោះរបៀបដ៏ប្រសើរបំផុតដើម្បីធ្វើការងារនេះនោះឡើយ។
លោក Moscovici មានប្រសាសន៍ថា៖ «កាលានុវត្តភាពជាក់ស្តែង» បានបើកកាលពីឆ្នាំមុន ដោយមានការបោះឆ្នោតជ្រើសរើសលោក Emmanuel Macron ឲ្យធ្វើជាប្រធានាធិបតីបារាំង ដែលលោកគឺជាអ្នកកំណែទម្រង់មួយរូប។
មេដឹកនាំបារាំងរូបនេះបានបង្កើតនូវទស្សនវិស័យប្រកបដោយមហិច្ឆិតាសម្រាប់កំណែទម្រង់របស់អឺរ៉ុប ដូចជា ការដែលមានដាច់ដោយឡែកពីគ្នានូវរដ្ឋមន្ត្រីហិរញ្ញវត្ថុ និងរៀបចំថវិកានៅតំបន់ប្រើប្រាស់ប្រាក់អឺរ៉ូ។
ឱកាសនេះ «អាចនឹងបិទ» ក្នុងការបោះឆ្នោតសភាអឺរ៉ុបនៅឆ្នាំក្រោយនេះ។
ការបង្កើតបាន «រដ្ឋាភិបាលចម្រុះ» និយមឆ្វេង និងស្តាំ កាលពីសប្តាហ៍មុននៅប្រទេសអាល្លឺម៉ង់ ដែលជាមហាអំណាចសេដ្ឋកិច្ចនៅតំបន់អឺរ៉ុ រវាងលោកស្រី Angela Merkel អធិការបតីអាល្លឺម៉ង់ និងគណបក្សប្រជាធិបតេយ្យសង្គមនិយម គឺជាការគាំទ្រដ៏ប្រុងប្រយ័ត្ននៃគម្រោងធ្វើកំណែទម្រង់របស់លោក Macron។
លោក Moscovici អតីតរដ្ឋមន្ត្រីហិរញ្ញវត្ថុបារាំងបានឲ្យដឹងកាលពីថ្ងៃអាទិត្យថា បើទោះជារូបលោកគាំទ្រ «គម្រោងថវិកាតំបន់ប្រើប្រាស់ប្រាក់អឺរ៉ូពិតប្រាកដមួយក្តីនោះ ក៏យើងដឹងថាយើងនឹងមិនមានគម្រោងនេះនោះទេ»។
ទោះជាយ៉ាងនេះក្តី លោកបានឲ្យដឹងបន្តថា លោកសង្ឃឹមថា «យើងនឹងបោះជំហ៊ានដំបូងទៅមុខយ៉ាងពិតប្រាកដនៅក្នុងកិច្ចប្រជុំកំពូលក្នុងខែ មិថុនា ខាងមុខនេះ៕ BP