ក្រុងប៉េកាំងៈ ប្រទេសចិនបានព្រមានថានឹងចាត់វិធានការចាំបាច់ដើម្បីការពារផលប្រយោជន៍របស់ខ្លួន បើសហរដ្ឋអាមេរិកប្រើប្រាស់ទណ្ឌកម្មពាណិជ្ជកម្មខ្លាំងប្រឆាំងនឹងការនាំចេញដែក និងអាលុយមីញ៉ូមរបស់ខ្លួន។
.jpg)
កាលពីថ្ងៃសុក្រកន្លងទៅនេះ ក្រសួងពាណិជ្ជកម្មអាមេរិក បានផ្តល់អានុសាសន៍យកពន្ធខ្ពស់លើប្រទេស ចិន និងប្រទេសផ្សេងទៀត ដើម្បីដោះស្រាយបញ្ហាផ្គត់ផ្គង់ដែក និងអាលុយមីញ៉ូមលើទីផ្សារហួសកម្រិត ដោយបានគិតគូរពីជម្រើសដែលអាចអនុវត្តបាននៅក្នុងរបាយការណ៍មួយផ្ញើជូនលោកប្រធានាធិបតី ដូណាល់ ត្រាំ។
វិធានការនេះបានផ្តល់ឱកាសឲ្យលោក ត្រាំ ដោះស្រាយបញ្ហាសាធារណៈ ដោយប្រើប្រាស់គោលនយោបាយពាណិជ្ជកម្ម «អាមេរិកជាអាទិភាព» ពោលគឺលោកដល់ពេលត្រូវសម្រេចចិត្តស្តីពីវិធានការមួយចំនួននៅខែក្រោយនេះ តែវាបានជំរុញឲ្យមានក្តីបារម្ភពីការសងសឹក និងសង្គ្រាមពាណិជ្ជកម្មរវាងមហាអំណាចសេដ្ឋកិច្ចធំៗទាំង ២ របស់ពិភពលោកនេះ។
លោក Wang Hejun ប្រធាននាយកដ្ឋាននៃក្រសួងពាណិជ្ជកម្ម ចិន បានឲ្យដឹងក្នុងសេចក្តីថ្លែងការណ៍មួយឆ្លើយតបទៅនឹងរបាយការណ៍របស់សហរដ្ឋអាមេរិកថា៖ «បើការសម្រេចចុងក្រោយរបស់សហរដ្ឋអាមេរិក ប៉ះពាល់ដល់ផលប្រយោជន៍របស់ប្រទេសចិននោះ យើងនឹងចាត់វិធានការចាំបាច់ដើម្បីការពារសិទ្ធិរបស់យើង»។
របាយការណ៍របស់ សហរដ្ឋអាមេរិក បានលើកឡើងពីក្តីបារម្ភអំពីការផលិតហួសកម្រិតរបស់ប្រទេសចិនទាក់ទងនឹងសន្តិសុខ និងការការពារជាតិ ពោលគឺជាវិធីសាស្ត្រមួយដែលត្រូវបានបង្ហាញពីការមិនពេញចិត្តពីសំណាក់លោក Wang។
លោកមានប្រសាសន៍ថា៖ «ការរកឃើញនៃការស៊ើបអង្កេត (របស់ក្រសួងពាណិជ្ជកម្មអាមេរិក) គ្មានហេតុផលច្បាស់លាស់ ហើយពុំអាចឆ្លើយតបទៅនឹងស្ថានភាពជាក់ស្តែងទេ»។
លោកបានបន្តឲ្យដឹងថា រដ្ឋាភិបាលក្រុងវ៉ាស៊ីនតោន «មិនគប្បីប្រើប្រាស់វិធានការរឹតត្បិត ក្រោមលេស«សន្តិសុខជាតិ» ដែលជារូបមន្តមិនច្បាស់លាស់មួយដែលអាចជំរុញឲ្យមានការរំលោភបំពានដោយងាយនោះទេ»។
ប្រទេសចិនផលិតដែកប្រមាណពាក់កណ្តាលនៃដែកពិភពលោក តែផ្គត់ផ្គង់តិចជាង ២ ភាគរយនៃដែកដែលត្រូវបាននាំចូលដោយសហរដ្ឋអាមេរិក។
សហរដ្ឋអាមេរិក និងសហភាពអឺរ៉ុបបានលើកឡើងថា ការផលិតហួសកម្រិតរបស់ប្រទេសចិន ត្រូវបានផ្តល់ឧបត្ថម្ភធនច្រើនពីរដ្ឋ និងបានធ្វើឲ្យតម្លៃដែកពិភពលោកធ្លាក់ចុះ ដែលបានធ្វើឲ្យប៉ះពាល់ដល់ផលិតកម្មដែកក្នុងស្រុករបស់ខ្លួន។
កាលពីថ្ងៃអង្គារ លោក ត្រាំ បានចោទរដ្ឋាភិបាលក្រុងប៉េកាំងពីបទបំផ្លាញឧស្សាហកម្មដែក និងអាលុយមីញ៉ូមរបស់អាមេរិក ដោយលោកបានលើកឡើងថា លោកកំពុង «ពិចារណាគ្រប់ជម្រើសទាំងអស់»៕ BP
