នាយក​រដ្ឋ​មន្ត្រី​៖​ រដ្ឋ​ខាត ​$៤០ ​លាន​ពី​ការ​ជួយ​កម្មករ

Content image - Phnom Penh Post
សកម្មភាព​កម្មករ​កំពុង​ធ្វើ​ការ​ក្នុង​រោង​ចក្រ​កាត់​ដេរ​មួយ​នៅ​ភ្នំពេញ។ ភ្នំពេញ ប៉ុស្តិ៍

ភ្នំពេញៈ លោក​នាយក​រដ្ឋ​មន្ត្រី​ហ៊ុន សែន អះអាង​ថា រដ្ឋាភិបាល​នឹង​ខាត​បង់​ជាង ​៤០ លាន​ដុល្លារ​ក្នុង​មួយ​ឆ្នាំ លើ​ការ​អនុគ្រោះ​ដល់​វិស័យ​កាត់​ដេរ ដែល​ជា​ការ​បន្ធូរ​បន្ថយ​បន្ទុក​ដល់​និយោជក ឬ ម្ចាស់​រោងចក្រ​ពី​សម្ពាធ​នៃ​ការ​ដំឡើង​ប្រាក់​ឈ្នួល ខណៈ​ជាមួយ​គ្នា​នេះ លោក​ក៏​បាន​ប្រកាស​ថា មូលដ្ឋាន​គិត​ពន្ធ​លើ​ប្រាក់​បៀវត្សរ៍​នឹង​បង្កើន​ដល់ ​៣០០ ​ដុល្លារ​ផង​ដែរ​។

លោក​នាយក​រដ្ឋ​មន្ត្រី​មាន​ប្រសាសន៍​ថា ក្នុង​ចំណោម​ថវិកា​ដែល​ខាត​បង់​ជាង​ ៤០ លាន​ដុល្លារ​នោះ គឺ​ដោយ​សារ​ការ​អនុគ្រោះ​លើ​ពន្ធ​កាន់​ទុក ​(​ដោយ​ពន្យារ​ពេល​រហូត​ដល់​ឆ្នាំ​ ២០២២) និង​កម្រៃ​ការ​ត្រួត​ពិនិត្យ​លើ​ការ​នាំ​ចេញ ដែល​កាំកុង​ត្រូល​ត្រូវ​បាត់បង់​ប្រមាណ​ជាង​ ២៤​ លាន​ដុល្លារ ដើម្បី​ដោះ​បន្ទុក​ពី​និយោជក ជា​ម្ចាស់​រោងចក្រ​នានា​ពី​សម្ពាធ​នៃ​ការ​ដំឡើង​ប្រាក់​ឈ្នួល​។

ការ​អះអាង​របស់​លោក​នាយក​រដ្ឋ​មន្ត្រី ហ៊ុន សែន ធ្វើ​ឡើង​មួយ​សប្តាហ៍​បន្ទាប់​ពី សមាគម​រោងចក្រ​កាត់​ដេរ​នៅ​កម្ពុជា (GMAC) កាលពី​សប្តាហ៍​មុន​បាន​ស្នើ​ឲ្យ​រដ្ឋាភិបាល​ជួយ​សម្រួល​លើ​ ៣ ​ចំណុច រួម​មាន​ការ​កាត់​បន្ថយ​កម្រៃ​គ្រប់គ្រង​ការ​នាំ​ចេញ ឲ្យ​បាន​ពាក់​កណ្ដាល​ពី​តម្លៃ​បច្ចុប្បន្ន ( EMF) កាត់​បន្ថយ​តម្លៃ​អធិការកិច្ច​ពី​កាំកុងត្រូល​ឲ្យ​មក​ដូច​គ្នា​នឹង​តម្លៃ​អធិការ​កិច្ច​របស់​គយ និង​ទី​បី​ពន្យារ​ពេល​អនុវត្ត​ការ​បង់​មុន​នៃ​ពន្ធ​លើ​ប្រាក់​ចំណេញ​ ១​ ភាគរយ​រយៈពេល​ ៥ ​ឆ្នាំ​ទៀត គឺ​ពី​ឆ្នាំ ២០១៨-២០២២​។

មិន​អាច​ទាក់ទង​មន្ត្រី GMAC បានទេ​កាលពី​ថ្ងៃ​ម្សិលមិញ​។

ប្រាក់​ឈ្នួល​អប្បបរមា​សម្រាប់​ឆ្នាំ​ ២០១៨ បាន​កើន​ឡើង​ដល់ ​១៧០ ​ដុល្លារ ក្នុង​នោះ​ ១៦៥​ ដុល្លារ​ត្រូវ​បាន​ឯកភាព​រវាង​កម្មករ និង​និយោជិត ខណៈ​ ៥ ​ដុល្លារ​ជា​ការ​បន្ថែម​របស់​រដ្ឋាភិបាល ដែល​លោក​នាយក​រដ្ឋ​មន្ត្រី​អះអាង​ថា​ការ​បន្ថែម​ ៥​ ដុល្លារ​នេះ​នឹង​ធ្វើ​ឲ្យ​រដ្ឋាភិបាល​ខាតបង់​ជាង​៤០​លាន​ដុល្លារ​ក្នុង​មួយ​ឆ្នាំ​។

លោក​ថ្លែងថា​៖ «​ដើម្បី​បាន​ទៅដល់​ ១៧០ ​ដុល្លារ​អាមេរិក​នេះ គឺ​រាជរដ្ឋាភិបាល​ក៏ត្រូវ​បន្ថែម​ជូន​ចំនួន​ ៥ ​ដុល្លារ ៥ ​ដុល្លារ​តើ​បាន​មកពីណា​ ដើម្បី​យើង​ជូនទៅ​ឲ្យ​វិស័យ​ឯកជន មាន​ផ្នែក​ ២ ដែល​រាជរដ្ឋាភិបាល​ត្រូវ​លះបង់​ប្រមាណ​ជា​ ៤០ ​លាន​ដុល្លារ​ក្នុង​មួយឆ្នាំ​នោះ​គឺ​ពន្ធ​កាត់​ទុក ដែល​ត្រូវ​ពន្យារ​រហូត​ទៅដល់​ឆ្នាំ​ ២០២២ នេះ​ជា​ចំណុច​ទី​ ១ ហើយ​ចំណុច​ទី​ ២ ​គឺ អំពី​កម្រៃ​នៃ​ការ​ត្រួត​ពិនិត្យ​លើ​ការ​នាំចេញ ដែល​កាំកុងត្រូល​ត្រូវ​បាត់បង់​ប្រមាណ​ជាង​ ២៤ ​លាន​ដុល្លារ ដូច្នេះ​២​ផ្នែក​នេះ រាជរដ្ឋាភិបាល​ត្រូវ​បាត់បង់​ដើម្បី​កុំ​ឲ្យ​ទម្ងន់​នេះ​ធ្លាក់​ធ្ងន់​ពេក​ទៅលើ​និយោជក ម្ចាស់​រោងចក្រ​»​។​

ការ​លើក​ឡើង​របស់​លោក​នាយក​រដ្ឋ​មន្ត្រី​នេះ​ធ្វើឡើង​នៅ​ពិធី​ផ្សព្វផ្សាយ​គោលនយោបាយ​ជាតិ ស្តីពី​ការ​អប់រំ និង​បណ្តុះ​បណ្តាល​វិជ្ជាជីវៈ ឆ្នាំ​ ២០១៧-២០២៥ នៅ​វិមាន​សន្តិភាព​។

លោក ម៉ី កល្យាណ ទីប្រឹក្សា​ជាន់ខ្ពស់​ឧត្តម​ក្រុម​ប្រឹក្សា​ជាតិ បាន​លើក​ឡើង​កាល​ពី​ម្សិលមិញ​ថា ការ​ដំឡើង​ប្រាក់​ឈ្នួល​គោល​អប្បបរមា​ដល់​បុគ្គលិក​ឲ្យ​ដល់​ ១៧០ ដុល្លារ​ក្នុង​មួយ​ខែ​ជា​ការ​ល្អ ដែល​នឹង​រួមចំណែក​កែលម្អ​ស្ថានភាព​នៃ​ការ​រស់នៅ​របស់​បុគ្គលិក​ក្នុង​ឧស្សាហ​កម្ម​នេះ ព្រម​ទាំង​ជួយ​បង្កើន​ផលិតភាព និង​ប្រសិទ្ធភាព​ការងារ​របស់​ពួក​គេ​។

តែ​ទន្ទឹម​នេះ លោក​បញ្ជាក់​ថា ម្ចាស់​រោងចក្រ​នឹង​ត្រូវ​ប្រឈម​ថ្លៃ​ធ្វើ​អាជីវកម្ម​ខ្ពស់​ជាង​មុន និង​ការ​រ៉ាប់រង​បន្ទុក​ធំ​ជាង​មុន​។

​លោក​បន្តថា​៖ «​ការ​ដំឡើង​ប្រាក់​ខែ​ដល់​បុគ្គលិក ជា​បន្ទុក​របស់​វិនិយោគិន ដូច្នេះ​វា​ជាការ​សម​ហេតុផល​ដែល​រដ្ឋាភិបាល​សម្រេច​ចិត្ត​ខាតបង់​ខ្លះ ដើម្បី​ជួយ​បន្ទាប​ថ្លៃ​ធ្វើ​ពាណិជ្ជកម្ម​ដើម្បី​រក្សា​ឧស្សាហ​កម្ម​នេះ​ឲ្យ​បន្ត​រីក​ចម្រើន​»​។

លោក​ថ្លែងថា​៖«​ខ្ញុំ​ជឿថា ចំនួន​នេះ​មិន​ច្រើន​ទេ​សម្រាប់​រដ្ឋាភិបាល ហើយ​គាត់​នឹង​មាន​វិធីសាស្ត្រ​ផ្សេង​ដើម្បី​ប៉ះប៉ូវ​ការ​ខាតបង់​នេះ​»​។

លោក​នាយក​រដ្ឋ​មន្ត្រី ហ៊ុន សែន ក៏​លើក​ឡើង​ដែរ​ថា រដ្ឋាភិបាល​នឹង​ដំឡើង​មូលដ្ឋាន​គិត​ពន្ធ​ពី​ ២០០ ​ដុល្លារ ទៅ ៣០០​ ដុល្លារ​សម្រាប់​ឆ្នាំ​ ២០១៨​។ មាន​ន័យ​ថា ប្រាក់​ខែ​ពី​ ៣០០ ​ដុល្លារ​ឡើង​ទៅ​ទើប​ជាប់ពន្ធ​។

លោក​បន្ត​ថា​៖«​អត្ថប្រយោជន៍​នេះ​មិន​មែន​តែ​មន្ត្រី​រាជការ កង​កម្លាំង​ប្រដាប់​អាវុធ​នោះទេ ប៉ុន្តែ​វា​បាន​ទូទៅ​ទៅដល់​កម្មករ ទៅដល់​គ្រប់​ផ្នែក​ដែលមាន​បៀវត្សរ៍ វា​ក៏​ផ្ដល់​ផង​ដែរ​នៅ​ក្នុង​វិស្ស័យ​ឯកជន​។ ឥឡូវ​អាច​និយាយ​បាន​ថា ចាប់ពី​ ៣០០ ដុល្លារ​ចុះក្រោម​គឺ​អត់​មាន​ជាប់ពន្ធ​ទេ​»​។

មូលដ្ឋាន​គិត​ពន្ធ​បាន​កើន​ឡើង​ជា​បន្ត​បន្ទាប់​ចាប់​តាំង​ពី​ ៥០ ​ម៉ឺន​រៀល ដល់​ ៨០​ ម៉ឺន រៀល​ក្នុង​ឆ្នាំ​ ២០១៦ និង​ទៅ​ដល់ ​១,២​ លាន​រៀល​នៅ​ក្នុង​ឆ្នាំ​ ២០១៧​។

លោក​នាយក​រដ្ឋ​មន្ត្រី​បាន​ថ្លែង​ថា​៖ «​អ៊ីចឹង​នេះ​គឺជា​ការ​សម្រួល​មួយ​សម្រាប់​ប្រាក់​ចំណូល​ដែល​ទទួល​បាន​ពី​ការ​ដំឡើង​[​ប្រាក់​បៀវត្សរ៍​] ដែល​មិន​ត្រូវ​បាន​បង់​ត្រឡប់​មក​វិញ​សម្រាប់​រដ្ឋ​នោះទេ​»​។

លោក​បន្ថែម​ថា​ រដ្ឋាភិបាល​នឹង​បញ្ជូន​សំណើ​របស់​ខ្លួន​ទៅ​សភា​ដើម្បី​សម្រេច​អនុម័ត​ជា​ចុង​ក្រោយ​។

លោក​បាន​ថ្លែង​បន្ថែម​ទៀត​ថា​៖ «​សង្ឃឹម​ថា ​សមាជិក​រាជ​រដ្ឋាភិបាល​គឺ​ត្រូវតែ​គាំទ្រ តែ​សំខាន់​គឺ​រដ្ឋសភា​ដែល​នឹង​ផ្ដល់​ការ​គាំទ្រ​លើ​បញ្ហា​នេះ ព្រោះ​វា​ត្រូវ​ស្ថិតក្នុង​ច្បាប់​ថវិកា​ហ្នឹង​តែ​ម្ដង ហើយ​យើង​នឹង​អនុវត្ត​ចាប់​ពី​ខែ​មករា ២០១៨ តទៅ​»​។

តំណាង​រាស្ត្រ​គណបក្ស​ប្រឆាំង​ធំ​ជាង​គេ​នៅ​កម្ពុជា​ដែល​កំពុង​ប្រឈម​នឹង​ជោគវាសនា​មិន​ប្រា​ដក​ប្រជា ដែល​នឹង​អាច​ឈាន​ដល់​ការ​រំលាយ​ចោល​បាន​ស្វាគមន៍​ចំពោះ​វិធានការ​នេះ​។

លោក អ៊ូ ច័ន្ទ​រ័ត្ន តំណាងរាស្ត្រ​គណបក្ស​សង្គ្រោះ​ជាតិ​ថ្លែងថា​៖ «​ខ្ញុំ​យល់​ថា​មិន​មាន​អី​ខុស​ទេ ព្រោះ​ជីវភាព​អ្នក​ប្រាក់ខែ​ ១​ លាន ឬ​ត្រឹម​ ១​ លាន​ ២ ​សែន​នេះ វា​តិច​មែនទែន​»​។

តែ​លោក​ថា រដ្ឋាភិបាល​គួរ​គិត​ពន្ធ​លើ​ប្រាក់​បៀវត្សរ៍​នេះ​ចាប់ពី ​១៥០០ ០០០​ រៀល ទើប​សមាមាត្រ​ទៅ​នឹង​ស្ថានភាព​សេដ្ឋកិច្ច​កម្ពុជា ​បច្ចុប្បន្ន​៕