ទិដ្ឋភាពនៅក្នុងផ្សារបន្លែមួយកន្លែងក្នុងទីក្រុងម៉ូស្គូ ប្រទេសរុស្ស៊ី។ រូបថត AFP
ក្រុងសេនភេធើប៊ឺកៈ នៅក្រៅស្ថានីយរថភ្លើងក្រោមដីនៅមួយកន្លែងនាទីក្រុងសេនភេធើប៊ឺក អ្នកស្រី Irina Semyonova វ័យ ៧០ ឆ្នាំកំពុងលក់អាហារដែលគាត់ធ្វើដោយខ្លួនឯង ដើម្បីរកប្រាក់ចំណូលបន្ថែមលើប្រាក់សោធននិវត្តន៍របស់អ្នកស្រីដែលគាត់ថា មិនគ្រប់គ្រាន់ដើម្បីផ្គត់ផ្គង់ជីវភាព។
.jpg)
បន្ទាប់ពីបានចំណាយលើជីវភាពប្រចាំថ្ងៃ និងទិញថ្នាំរួច គាត់បានថ្លែងថាគាត់សល់ប្រាក់ត្រឹមតែ ៤ ពាន់រូប (៧០ ដុល្លារ) ប៉ុណ្ណោះនៃចំនួនប្រាក់សោធននិវត្តន៍របស់គាត់ចំនួន ១២ ០០០ រូប។
អ្នកស្រីមានប្រសាសន៍ថា៖ «តើមនុស្សម្នាក់អាចរស់នៅដោយពឹងផ្អែកលើប្រាក់ ៤ ពាន់រូបបានទេ ជាពិសេសក្នុងទីក្រុងមួយដែលត្រូវចំណាយខ្ពស់ដូចជាទីក្រុងសេនភេធើប៊ឺកនេះ?»។
លោកប្រធានាធិបតីរុស្ស៊ី Vladimir Putin ដែលរំពឹងថានឹងទទួលជោគជ័យក្នុងការបោះឆ្នោតអាណត្តិទី ៤ ជាប្រវត្តិសាស្រ្តក្នុងការបោះឆ្នោតនៅថ្ងៃទី ១៨ ខែមីនាម្សិលមិញបានជួយឲ្យមានកំណើនសេដ្ឋកិច្ចមួយរយៈពេលក្នុងអំឡុង ២ អាណត្តិដំបូងរបស់លោក (ឆ្នាំ ២០០០-២០០៨) ដែលបានជំរុញឲ្យប្រាក់ចំណូលផ្ទាល់ខ្លួនបានកើនឡើង បន្ទាប់មានអស្ថិរភាពហិរញ្ញវត្ថុទសវត្សរ៍ឆ្នាំ ១៩៩០ នៅពេលប្រជាជនរុស្ស៊ីជាច្រើនបាត់បង់ប្រាក់សន្សំរបស់ខ្លួន។
តែអាណត្តិលើកទី ៣ របស់លោកនៅក្នុងវិមានក្រឹមឡាំងដែលបានចាប់ផ្តើមកាលពីឆ្នាំ ២០១២ បន្ទាប់ពីបានកាន់តំណែងជានាយករដ្ឋមន្ត្រីអស់រយៈពេល ៤ ឆ្នាំមុននោះបានបង្ហាញពីការធ្លាក់ចុះគុណភាពជីវិតរបស់ប្រជាជនសាមញ្ញ។
ប្រទេសរុស្ស៊ីបាននិងកំពុងមើលឃើញការធ្លាក់ចុះអំណាចទិញជាបន្តបន្ទាប់ក្នុងរយៈពេល ៤ ឆ្នាំចុងក្រោយនេះ បន្ទាប់ពីសេដ្ឋកិច្ចរបស់ប្រទេសនេះបានរងផលប៉ះពាល់ដោយសារទណ្ឌកម្មអន្តរជាតិដែលបានពិន័យរដ្ឋាភិបាលក្រុងម៉ូស្គូចំពោះការរឹបអូសយកតំបន់គ្រីមៀរកាលពីឆ្នាំ ២០១៤ និងក្រោយពេលដែលតម្លៃប្រេងពិភពលោកធ្លាក់ចុះក្នុងឆ្នាំ ២០១៦។
អត្រាក្រីក្រនៅរុស្ស៊ីដែលបានធ្លាក់ចុះពី ២៩ ភាគរយនៅឆ្នាំ ២០០០ មកត្រឹម ១០, ៧ ភាគរយនៅឆ្នាំ ២០១២ បានកើនឡើងវិញដល់ ១៣,៥ ភាគរយនៅឆ្នាំ ២០១៦។ នេះបើយោងតាមតួលេខផ្លូវការប្រចាំឆ្នាំចុងក្រោយបំផុត។
កាលពីខែវិច្ឆិកា ធនាគារពិភពលោកបានចេញរបាយការណ៍មួយដែលបានឲ្យដឹងថា ប្រជាជនតិចជាងពាក់កណ្តាលនៃប្រជាជនសរុបរបស់រុស្ស៊ីពោលគឺ ៤៦,៣ ភាគរយបានរួចផុតពីការធ្លាក់ចុះចូលក្នុងភាពក្រីក្រដោយបានលើកឡើងពីតួលេខមួយដែលមានកម្រិតទាបជាងតួលេខក្នុងឆ្នាំ ២០១៤ ចំនួន ១០ ភាគរយ។
គ្មានលទ្ធភាពទិញអ្វីៗ
ជាពិសេសស្ថានភាពនេះ គឺអាក្រក់នៅតាមខេត្ត ជាទីដែលប្រជាជនសាមញ្ញរស់នៅពឹងផ្អែកលើប្រាក់បៀវត្សរ៍ទាបខ្លាំង ហើយគ្រួសារក្មេងៗជាញឹកញាប់ត្រូវបានជួយដោយប្រាក់សោធនតិចតួចរបស់អ្នកចូលនិវត្តន៍។
លោក Vyacheslav ជាមេកានិកចូលនិវត្តន៍រស់នៅទីក្រុង Maloyaroslavets ដែលជាទីក្រុងមួយនៅតំបន់ Kaluga ស្ថិតនៅភាគនិរតីនៃទីក្រុងម៉ូស្គូថ្លែងថា៖ «តម្លៃទំនិញពិតជាឆ្កួតណាស់»។ លោកបន្តថា៖ «ខ្ញុំគ្មានលទ្ធភាពទិញទំនិញអ្វីៗនោះទេ»។
យោងតាមការសិក្សាមួយរបស់ធនាគារ Credit Suisse bank បានបង្ហាញថា អ្នកមានទ្រព្យសម្បត្តិច្រើនបំផុតជាជនជាតិរុស្ស៊ីចំនួន ១០ ភាគរយគ្រប់គ្រងទ្រព្យសម្បត្តិចំនួន ៧៧ ភាគរយដោយបានធ្វើឲ្យប្រទេសរុស្ស៊ីមានវិសមភាពក្នុងកម្រិតដូចគ្នាទៅនឹងសហរដ្ឋអាមេរិកក្នុងចំណោមប្រទេសអភិវឌ្ឍន៍។
លោក Chris Weafer បម្រើការនៅក្នុងក្រុមហ៊ុន Macro Advisory consultancy បានឲ្យដឹងថា៖ «នៅចន្លោះឆ្នាំ ២០០០ ដល់ឆ្នាំ ២០១៣ រដ្ឋាភិបាលមិនព្រួយបារម្ភច្រើនអំពីសេដ្ឋកិច្ចទេ»។
លោកបន្តថា៖ «កំណើនតម្លៃប្រេងប្រចាំឆ្នាំរួមជាមួយនឹងកំណើនខ្ពស់នៃប្រាក់ចំណូលនៅសេសសល់ និងឥណទានដែលអាចផ្តល់បានស្ទើរតែជំរុញសេដ្ឋកិច្ចរុស្ស៊ីដោយពុំចាំបាច់មានអន្តរាគមន៍របស់រដ្ឋាភិបាលច្រើន»។
តែគំរូសេដ្ឋកិច្ចដែលពឹងផ្អែកលើការបូមថាមពលនេះទំនងជាបានមកដល់ទីបញ្ចប់នៃមាគ៌ារបស់ខ្លួនហើយ។
ទោះជាសេដ្ឋកិច្ចរុស្ស៊ីបានសម្រេចកំណើនវិញកាលពីឆ្នាំមុនក្តីក៏ការព្យាករពីកំណើនសេដ្ឋកិច្ចក្នុងរយៈពេលមធ្យមនៅតែមិនខ្ពស់ជាង ១ ឬ ២ ភាគរយដដែលពោលគឺមានកម្រិតទាបខ្លាំងបើធៀបនឹងកំណើនកាលពីដើមទសវត្សរ៍ឆ្នាំ ២០០០។
លោក Weafer បានមានប្រសាសន៍ថា៖ «កំណើនសេដ្ឋកិច្ចនេះគឺមិនគ្រប់គ្រាន់ដើម្បីលើកកម្ពស់ជីវភាពរស់នៅរបស់ប្រជាជន ឬផ្តល់នូវមូលនិធិបន្ថែមសម្រាប់វិស័យអប់រំ និងសុខាភិបាល។ល។» ឡើយ។
ចក្ខុវិស័យអនាគត
ទោះជាភាពក្រីក្រហាក់បីដូចជាមិនបានប៉ះពាល់ខ្លាំងដល់ប្រជាប្រិយភាពរបស់លោក Putin ក្នុងប្រទេសក្តី ក៏ប្រធានាធិបតីរូបនេះបានលើកឡើងពីបញ្ហានេះក្នុងសុន្ទរកថារបស់លោកកាលពីដើមខែនេះ។
លោកបានប្តេជ្ញាកាត់បន្ថយតួលេខក្រីក្រ «ដែលមិនអាចទទួលយកបាននេះ» ចំនួនពាក់កណ្តាលក្នុងរយៈពេល ៦ ឆ្នាំខាងមុខ និងជំរុញកំណើនសេដ្ឋកិច្ចដល់ ៤ ភាគរយ។
តែនៅពេលលោកបានសន្យាវិនិយោគក្នុងវិស័យហេដ្ឋារចនាសម្ព័ន្ធ សុខាភិបាល និងលំនៅឋាននោះលោកក៏ពុំបានផ្តល់ព័ត៌មានលម្អិតអំពីថា តើថវិកាវិនិយោគទាំងនោះនឹងបានមកពីណា ហើយលោកក៏ពុំបានបញ្ជាក់ផងដែរពីកំណែទម្រង់នាពេលអនាគតដែលនឹងដោះស្រាយបញ្ហាប្រឈមបែបរចនាសម្ព័ន្ធរបស់រុស្ស៊ីដូចជាបញ្ហាប្រជាសាស្ត្រជាដើម។
លោក Neil Shearing សេដ្ឋវិទូបម្រើការនៅក្រុមហ៊ុន Capital Economics បានឲ្យដឹងថា៖ «អស់រយៈពេលមួយទសវត្សរ៍ចុងក្រោយនេះ យើងបានឮពាក្យដ៏កក់ក្តៅទាំងនេះអំពីកំណែទម្រង់ហើយពាក្យទាំងនោះមិនដែលបង្ហាញពីអត្ថន័យអ្វីទេ»។
លោកស្រី Natalia Orlova សេដ្ឋវិទូប្រចាំក្រុមហ៊ុន Alfa Bank បានមានប្រសាសន៍ថា កំណើនសេដ្ឋកិច្ចកាលពីឆ្នាំមុនអាចកើតឡើងដោយសារការវិនិយោគធំៗក្នុងគម្រោងហេដ្ឋារចនាសម្ព័ន្ធដូចជាបណ្តាញបំពង់ចែកចាយថាមពល Power of Siberia និងស្ពានតភ្ជាប់ឧបទ្វីបគ្រីមៀរទៅកាន់ប្រទេសរុស្ស៊ី»។
លោកស្រីបានប្រាប់ទីភ្នាក់ងារព័ត៌មាន AFP ថា៖ «យុទ្ធសាស្រ្តប្រសើរបំផុតនេះគឺត្រូវយកចិត្តទុកដាក់លើស្ថិរភាពថវិកា» ដោយសារទណ្ឌកម្មកំពុងបញ្ចេញឥទ្ធិពល។
រដ្ឋាភិបាលរុស្ស៊ីបានកំណត់ទិសដៅអតិផរណាទាបក្នុងពេលប៉ុន្មានឆ្នាំចុងក្រោយនេះដោយធនាគារកណ្តាលរុស្ស៊ីបន្តអនុវត្តគោលនយោបាយសារពើពន្ធ និងរូបិយវត្ថុដ៏តឹងរ៉ឹងដែលមនុស្សមួយចំនួនបានឲ្យដឹងថា បានធ្វើឲ្យប៉ះពាល់ដល់ចក្ខុវិស័យកំណើនសេដ្ឋកិច្ច។
តែលោក Oleg Kouzmin សេដ្ឋវិទូប្រចាំក្រុមហ៊ុន Renaissance Capital បានឲ្យដឹងថា វិធីសាស្រ្តដ៏តឹងរ៉ឹងនេះហើយបានជួយប្រទេសនេះចៀសផុតពីស្ថានភាពអាក្រក់នោះ៕ BP
