ទាហានអារ៉ាប៊ី សាអ៊ូឌីត ឈរការពារ ខណៈយន្តហោះដឹកជំនួយចុះនៅវាលយន្តហោះមួយក្នុងទឹកដីយេម៉ែន។ AFP
.jpg)
ក្រុងអាដែន: មន្ត្រីយោធាម្នាក់បានឲ្យដឹងថា ក្រុមទាហានចំនួន ៨ នាក់ និងក្រុមជនសង្ស័យជាសមាជិកអាល់កៃដា ១៩ នាក់ ត្រូវបានសម្លាប់នៅក្នុងទឹកដីយេម៉ែន កាលពីថ្ងៃអាទិត្យ ខណៈកងយោធាបានបើកការវាយប្រហារមួយទៅលើទីតាំងឈរជើងសំខាន់ៗ របស់ក្រុមជ្រុលនិយម។
ឧត្តមសេនីយ៍ Faraj al-Bahsani អភិបាលខេត្ត Hadramawt បានថ្លែងប្រាប់ AFP ថា យោធា បានត្រួតត្រាតំបន់ Mesini នៅភាគខាងលិចរដ្ឋធានី Mukalla ជាទីតាំងចំណុចកណ្តាលសម្រាប់ក្រុមអាល់កៃដានៅក្នុងភាគអាគ្នេយ៍នៃប្រទេសនេះ។
ក្រុង Mukalla គឺជាទីក្រុងយេម៉ែនមួយ ដែលមានពលរដ្ឋរស់នៅច្រើនជាងគេបំផុតស្ថិតការត្រួតត្រាដោយផ្ទាល់ពីក្រុមអាល់កៃដា ចាប់ពី ២០១៥ ដល់ឆ្នាំ ២០១៦ ខណៈយោធា និងក្រុមសម្ព័ន្ធមិត្តក្នុងតំបន់របស់ខ្លួន បានដណ្តើមត្រួតត្រាក្រុងជាប់ឆ្នេរមួយនេះ។
ក្រុមកងកម្លាំងពិសេស ដែលទទួលការហ្វឹកហ្វឺនពីអារ៉ាប់ អេមីរ៉ាត (UAE) ជាសមាជិកដ៏សំខាន់មួយរបស់ក្រុមចម្រុះអារ៉ាប៊ី សាអ៊ូឌីត ដែលកំពុងរួមប្រយុទ្ធជាមួយក្រុមកងទ័ព រដ្ឋាភិបាលយេម៉ែន កាលពីចុងសប្តាហ៍ បានបើកប្រតិបត្តិការវាយប្រហារមួយមានឈ្មោះសម្ងាត់ «Al-Faisal» ប្រឆាំងក្រុមអាល់កៃដានៅក្នុងខេត្ត Hadramawt ដែលសម្បូរកំណប់ប្រេងនោះ។
ទាហាន ២ នាក់ ត្រូវបានសម្លាប់ កាលពីថ្ងៃសៅរ៍អំឡុងការវាយប្រហារមួយ ដែលមានគោលដៅលើតំបន់ Mesini និងតំបន់ជ្រលង Amed ដែលទាំង ២ នេះ ស្ថិតនៅក្នុងខេត្ត Hadramawt ដែលមានផ្ទៃដីទូលំទូលាយ និងជាកន្លែងជ្រកកោនរបស់ក្រុមអាល់កៃដានៅក្នុងឧបទ្វីបអារ៉ាប់ (AQAP)។
តំបន់ជ្រលងភ្នំទាំង ២ នេះសំខាន់ខ្លាំងណាស់ចំពោះការ ត្រួតត្រាលើតំបន់ឆ្នេរសមុទ្រភាគអាគ្នេយ៍ក្នុងទឹកដីរបស់ យេម៉ែន។
ពលរដ្ឋជាង ៩២០០ នាក់ត្រូវបានស្លាប់អំឡុងសង្គ្រាមនៅយេម៉ែន ចាប់តាំងពីឆ្នាំ ២០១៥ ខណៈក្រុមចម្រុះអារ៉ាប៊ីសាអ៊ូឌីត បានរួមជាមួយរដ្ឋាភិបាលប្រឆាំងក្រុមឧទ្ទាមហ៊ូធីគាំទ្រដោយអ៊ីរ៉ង់៕
