ក្រុងដាក្កាៈ ប្រទេសបង់ក្លាដែសកាលពីថ្ងៃសុក្រ បាន ប្រគល់បញ្ជីឈ្មោះជនជាតិរ៉ូហ៊ីយ៉ាប្រហែលជាង ៨០០០ នាក់ទៅឲ្យប្រទេសមីយ៉ាន់ម៉ាខណៈប្រទេសនេះ បម្រុងនឹងចាប់ផ្ដើមសប្ដាហ៍នៃការបញ្ជូនជនភៀសខ្លួនរ៉ូហ៊ីងយ៉ា បន្ទាប់ពីអាក់ខាន ដោយសារខ្វះការរៀបចំប្រុងប្រៀបជាមុន។
រដ្ឋមន្ត្រីក្រសួងមហាផ្ទៃរបស់ក្រុងដាក្កាលោក AsaduzzamanKhan បានប្រគល់បញ្ជីឈ្មោះជាផ្លូវការទៅភាគីមីយ៉ាន់ម៉ាលោកឧត្តមសេនីយ៍ KyawSwe បន្ទាប់ពីមន្ត្រីនៃប្រទេសទាំង ២ បានជួបប្រជុំនៅរដ្ឋធានីបង់ក្លាដែស។
លោកថ្លែងថា៖ «យើងបានប្រគល់បញ្ជីឈ្មោះជនភៀសខ្លួន ៨០៣២ មកពី ១៦៧៣ គ្រួសារទៅឲ្យពួកគេ។ គណ:ប្រតិភូ បានទទួលយកដោយភាពស្និទ្ធស្នាល និងបានប្រាប់យើងថា ពួកគេអាចចាប់ផ្ដើមដំណើរការទទួលយកជនភៀសខ្លួនបានហើយ»។
បង់ក្លាដែស បានសម្រេចកិច្ចព្រមព្រៀងជាមួយនឹង ប្រទេសមីយ៉ាន់ម៉ាកាលពីចុងឆ្នាំមុនក្នុងការបញ្ជូនជនភៀសខ្លួនរ៉ូហ៊ីងយ៉ា ប្រមាណជា ៧០ ម៉ឺននាក់ ដែលបានរត់ភៀសខ្លួនឆ្លងដែនចូលទៅកាន់ប្រទេសបង់ក្លាដែស តាំងពីខែសីហាដើម្បីគេចពីការបង្ក្រាបយ៉ាងសាហាវឃោរឃៅរបស់កងទ័ពមីយ៉ាន់ម៉ា៕