ក្រុងអាយឡូឡូៈ សាច់ញាតិ និងក្រុមអ្នកគាំទ្រស្ត្រីបម្រើតាមផ្ទះហ្វីលីពីន ដែលសាកសពរបស់អ្នកនាងត្រូវបានរកឃើញនៅក្នុងទូក្លាស្សេ បានកាន់បដា ដោយបានទាមទាររកយុត្តិធម៌ ខណៈមឈូសរបស់អ្នកស្រី ត្រូវបានបញ្ជូនត្រឡប់មកដល់ផ្ទះវិញកាលពីថ្ងៃសៅរ៍។
គ្រួសាររបស់អ្នកស្រី Joanna Demafelis បានធ្វើការតវ៉ាជាចំហខណៈមឈូសពណ៌ ស ត្រូវបានដាក់ចុះពីយន្តហោះនៅព្រលានយន្តហោះក្នុងក្រុងអាយឡូឡូ។ «យុត្តិធម៌សម្រាប់អ្នកស្រី Joanna D. Demafelis» ត្រូវបានសរសេរនៅលើបដា និងអាវយឺតរបស់អ្នកចូលរួមតវ៉ាដែលនៅក្នុងនោះមានសមាជិកសភាម្នាក់ និងមន្ត្រីតំបន់ជាច្រើន ដែលសម្តែងកំហឹងរបស់ពួកគេជុំវិញការស្លាប់របស់អ្នកស្រី Filipina ដែលសាកសពរបស់អ្នកស្រី ត្រូវបានរកឃើញនៅកូវ៉ែតនៅដើមខែនេះ។
ឧប្បត្តិហេតុនោះបានធ្វើឲ្យទំនាក់ទំនងការទូតរវាងហ្វីលីពីន និងកូវ៉ែត ធ្លាក់ចុះយ៉ាងខ្លាំងដោយប្រធានាធិបតីលោក Rodrigo Duterte ចោទប្រកាន់ថា និយោជកអារ៉ាប់ ចាប់រំលោភពលករហ្វីលីពីន បង្ខំឲ្យពួកគេធ្វើការ ២១ ម៉ោងក្នុងមួយថ្ងៃ និងផ្តល់អាហារដល់ពួកគេមិនគ្រប់គ្រាន់។
លោក ក៏បានហាមមិនឲ្យដាក់បញ្ជូនអ្នកធ្វើការទៅកូវ៉ែតទេ និងបានបញ្ជាឲ្យក្រុមហ៊ុនអាកាសចរណ៍ដឹកប្រជាជនហ្វីលីពីនប្រមាណ ២៥២០០០ នាក់ដែលធ្វើការងារនៅទីនោះត្រឡប់មកវិញ។
ប្រជាជនហ្វីលីពីនប្រហែល ១០ លាននាក់ធ្វើការងារនៅក្រៅប្រទេសនិងលុយដែលពួកគេរកបាននោះបានជួយទ្រទ្រង់សេដ្ឋកិច្ចរបស់ហ្វីលីពីន។ ការយកចិត្តទុកដល់ពួកគេនៅបរទេស គឺជាបញ្ហានយោបាយនៅក្នុងស្រុកដែរ។
រដ្ឋមន្ត្រីការបរទេសកូវ៉ែតធ្លាប់ថ្កោលទោសការបង្កើនបញ្ហារបស់ក្រុងម៉ានីល ប៉ុន្តែរដ្ឋមន្ត្រីការបរទេសហ្វីលីពីនលោក Alan Peter Cay-etano បានថ្លែងកាលពីថ្ងៃសុក្រថាឯកអគ្គរដ្ឋទូតកូវ៉ែត បានបញ្ជាក់ចំពោះលោកថា រដ្ឋាភិបាលរបស់លោកមានកំហឹងជុំវិញការសម្លាប់មនុស្ស និងប្តេជ្ញារកឲ្យឃើញអ្នកដែលទទួលខុសត្រូវ៕