ភ្នំពេញៈ បន្ទាប់ពីទទួលទានអាហារពេលព្រឹក កញ្ញា ប៊ិន មុយជាង វ័យ ២៤ ឆ្នាំ បានដំឡើងឆត្រស្តង់ និងតុបត់មួយនៅមុខផ្ទះរបស់នាងដែលស្ថិតនៅលើមហាវិថីម៉ៅសេទុង។ ជាទូទៅ នៅថ្ងៃធម្មតា មុយជាង ជួយការងារនៅហាងលក់ឥដ្ឋការ៉ូរបស់គ្រួសារនាង ក៏ប៉ុន្តែនៅសប្តាហ៍នេះ នាងនឹងឆ្លៀតឱកាសរកចំណូលបន្ថែមទៀត។
មុយជាង បានយកបាច់ផ្កា ដែលមានទាំងផ្កាស្រស់និងផ្កាក្រដាស ពីក្នុងផ្ទះមកដាក់លើតុ ដែលនាងបានចំណាយពេលជិតមួយខែដើម្បីធ្វើ តាមរូបភាពណែនាំក្នុងទស្សនាវដ្តីសិល្បៈតុបតែងផ្កា ជាមួយនឹងវត្ថុអនុស្សាយរីយ៍ជាច្រើនទៀតដូចជា សូកូឡា និងតុក្កាតាខ្លាឃ្មុំ។
ឆ្នាំនេះគឺជាឆ្នាំទី ៧ ដែលនាងលក់របស់ទាំងនេះនៅក្នុងអំឡុងសប្តាហ៍ថ្ងៃ ១៤ កុម្ភៈ ឬ ថ្ងៃបុណ្យនៃសេចក្តីស្រឡាញ់ (Valentines Day)។
កញ្ញាកូនខ្មែរកាត់ចិននេះនិយាយថា៖ «ថ្ងៃ ១៤ កុម្ភៈគឺជាថ្ងៃបុណ្យនៃសេចក្តីស្រឡាញ់សម្រាប់អ្នកជាច្រើន ក៏ប៉ុន្តែសម្រាប់ខ្ញុំ វាគឺជាថ្ងៃរកលុយ»។
មុយជាងបន្ថែមថា កាលពីឆ្នាំមុនៗ កញ្ញាធ្លាប់បានចំណាយទុនរហូតដល់ជាង ១ ពាន់ដុល្លារ ក៏ប៉ុន្តែនៅតែបានចំណេញពី ២០ ទៅ ៣០ភាគរយ ទោះបីជាមានលក់សល់ក្តី។
មុយជាង គឺជាម្នាក់ក្នុងចំណោមអាជីវករជាច្រើនទៀតដែល លក់ផ្កាកុលាប បាច់ផ្កា និងវត្ថុអនុស្សារីយ៍សម្រាប់ទិវាបុណ្យនៃសេចក្តីស្រឡាញ់ ដែលជាបុណ្យបែបបច្ចឹមប្រទេសមួយ ដែលមានការពេញនិយមជាខ្លាំងនៅប្រទេសកម្ពុជា បើទោះបីជាមានការព្រមានជារៀងរាល់ឆ្នាំពីសំណាក់រដ្ឋាភិបាលថា មិនមែនជា «តម្លៃខ្មែរ»ក៏ដោយក្តី។
កំពុងអង្គុយនៅមុខតុមួយ ដែលពោរពេញដោយទងផ្កាកុលាប នៅជិតផ្សារធំថ្មី លោក ហេង រឹម បាននិយាយថា បុណ្យនៃក្តីស្រឡាញ់បានផ្តល់មកឲ្យគាត់នូវឱកាសរកចំណូលបន្ថែម។ បុរសវ័យ ២៩ ឆ្នាំ រូបនះមានរបរជាអ្នករត់ម៉ូតូឌុបនៅថ្ងៃធម្មតារក៏ប៉ុន្តែនៅសប្តាហ៍នេះ លោកនិងភរិយារបស់លោកបានទិញផ្កាបោះដុំពីអ្នកលក់ដែលយកផ្កាមកពីប្រទេសវៀតណាម ដើម្បីយកមកលក់បន្ត។
លោក រឹម និយាយថា៖ «មានអ្នកមកទិញច្រើន ហើយយើងមិនបាច់ខ្លាចខាតទេ តែយើងត្រូវប្រើ់ពេលយ៉ាងតិចមួយអាទិត្យដើម្បីរៀបចំលក់»។
អាជីវករភេទប្រុសម្នាក់ទៀត ដែលលក់នៅលើផ្លូវ ២៨៦ ដែលសុំមិនបញ្ចេញឈ្មោះ បានថ្លែងថា ប្រសិនចង់លក់ដាច់ អ្នកលក់ត្រូវតែមានសម្រស់ទាក់ទាញ។
គាត់និយាយទាំងសើចថា៖ «ប្រុសចាស់ដូចខ្ញុំអញ្ចឹង អ្នកណាមកទិញ? អ្នកដែលមកទិញផ្កាភាគច្រើនគឺជាមនុស្សប្រុស ហើយទិញតែពីស្រីស្អាតៗ ក្មេងៗ ទេ។ ខ្ញុំបានជួលក្មេងស្រីពីរនាក់មកលក់ ឲ្យមួយថ្ងៃ ៥០ ដុល្លារ តែខ្ញុំនៅតែចំណេញ»។
តាមការឲ្យដឹងរបស់ក្រុមអ្នកលក់ អតិថិជនភាគច្រើនគឺជា ក្រុមបុរសជាអ្នកធ្វើការ ដែលមកទិញកាដូឲ្យសង្សារ ឬប្រពន្ធរបស់ពួកគេ ហើយមិនសូវមានអ្នកទិញជាសិស្សសាលានោះទេ ហើយបើមានគឺមកទិញយកទៅជូនឪពុកម្តាយ ឬលោកគ្រូអ្នកគ្រូ។ ទោះជាយ៉ាងនេះក្តី ក៏ក្រុមមនុស្សចាស់នៅតែ មានសេចក្តីបារម្ភចំបោះឥទ្ធិពលនៃបុណ្យបរទេសនេះមកលើយុវជនកម្ពុជា។
កាលពីថ្ងៃសុក្រសប្តាហ៍មុន ក្រសួងអប់រំបានចេញសេចក្តីណែនាំម្តងទៀតដូចដែលបានអនុវត្តជារៀងរាល់ឆ្នាំដែលមានសេចក្តីថា ក្រុមយុវជនប្រឈមនឹងការបាត់បង «កិត្តិយសនិងសេចក្តីថ្លៃថ្នូររបស់ខ្លួនឯង និងក្រុមគ្រួសារ» ប្រសិនជាពួកគេប្រើប្រាស់ពិធីបុណ្យនេះជា «បុណ្យសង្សារ» និងជាឱកាសនៃការរួមភេទ «ដែលប្រាស់ចាកពីវប្បធម៌និងប្រពៃណីដ៏ផូរផង់របស់ជាតិ»។
កាលពីថ្ងៃម្សិលមិញនេះដែរ លោកនាយករដ្ឋមន្រ្តី ហ៊ុន សែន ក៏បានចូលរួមក្នុងការណែនាំនេះដែរ ដោយបានសរសេរលើទំព័រហ្វេសបុករបស់លោកថា បុណ្យនៃក្តីស្រឡាញ់នេះ មានន័យ«ផ្តល់ជូនឪពុកម្តាយ ជីដូន ជីតា អុំ ពូមីង បងប្អូន ក្រុមគ្រួសារ ប្តីប្រពន្ឋ មិត្តភ័ក្តិ និងប្រទេសជាតិយើងឲ្យបានច្រើនបំផុត»។
លោកសរសេរទៀតថា៖«សុំកូនក្មួយកុំងាយប្រគល់ខ្លួនឲ្យបុរសណាទាំងអស់ ក្នុងថ្ងៃនេះចៀសវាងវិប្បដិសារីអស់មួយជីវិត»។
សូមរំលឹកផងដែរថា ចាប់តាំងពីឆ្នាំ ២០១៥ មក រដ្ឋាភិបាលកម្ពុជាបានហាមយុវជនជាអនីតិជនចូលស្នាក់នៅផ្ទះសំណាក់ប្រសិនជាមិនមានការយល់ព្រមពីអាណាព្យាបាល។
ជាមួយគ្នានេះដែរ លោក កុយ សេដា ជានាយកវិទ្យាល័យទួលទំពូងបានឲ្យដឹងថា លោកបានចាត់វិធានការយ៉ាងម៉តចត់ក្នុងការទប់ស្កាត់ឥទ្ធិពលនៃថ្ងៃ ១៤ កុម្ភៈ ដែលក្នុងនោះរួមមានការប្រាប់សមត្ថកិច្ចឲ្យហាមមិនឲ្យលក់ផ្កានៅជាប់សាលារបស់លោកផងដែរ។
លោកបន្ថែមថា៖ «នៅពេលថ្ងៃនោះខិតចូលមកដល់ ខ្ញុំតែងតែពន្យល់ប្រដៅកូនសិស្សនៅពេលគោរពទង់ជាតិ។ ក៏ប៉ុន្តែខ្ញុំសប្បាយចិត្តណាស់នៅពេលដែលឃើញកូនសិស្សទិញអំណោយជូនគ្រូនៅថ្ងៃនេះ ដើម្បីបង្ហាញពីការស្រឡាញ់ និងដឹងគុណលោក ដែលជាតម្លៃខ្មែរពិតៗ»។
ជាមួយគ្នានេះវិញ យុវជនខៀវ ឧត្តម ជាបុគ្គលិកផ្នែករចនាក្រាហ្វិកម្នាក់ ដែលកំពុងតែទិញតុក្កាតាធំមួយឲ្យសង្សាររបស់ខ្លួនកាលពីម្សិលមិញបានលើកឡើង មិនគួរណាសង្កត់ធ្ងន់លើថ្ងៃ ១៤ កុម្ភៈ ជាមូលហេតុជំរុញឲ្យយុវជនរួមភេទខ្លាំងពេកទេ។
រូបគេនិយាយថា៖ «គេចង់ធ្វើវាពេលណាក៏បានដែរ។ ខ្ញុំយល់ថា គ្មានអ្វីខុសនោះទេ ដែលគ្រាន់តែទិញកាដូឲ្យគូស្នេហ៍៍នៅថ្ងៃ ១៤ កុម្ភៈ ដើម្បីបង្ហាញពីក្តីស្រឡាញ់របស់យើងនោះ»៕