ភ្នំពេញ: អ្នកប្រដាល់កម្ពុជា ឃីម ឌីម៉ា ក្លិបកងរាជអាវុធហត្ថរាជធានីភ្នំពេញ ដែលជាម្ចាស់មេដាយមាស ស៊ីហ្គេម ឆ្នាំ ២០១៧ នឹងបង្ហាញវត្តមានជាថ្មី ដោយបើកឱកាសឲ្យកីឡាករចំណូលថ្មីរបស់ថៃឈ្មោះ Kim Young មកប្រកួត ក្នុងលក្ខណៈមិត្តភាពវាស់ស្ទង់សមត្ថភាពនៅលើសង្វៀន SEATV នាល្ងាចថ្ងៃសៅរ៍ក្នុងកម្មវិធីជំនួសគូប្រកួតដណ្តើមខ្សែក្រវាត់ខារ៉ាបាវ ដែលត្រូវសម្រាក ២ សប្តាហ៍។
កីឡាករ Kim Young មិនធ្លាប់មកប្រកួតនៅប្រទេស កម្ពុជា សោះ ហើយត្រូវបានក្រុមអ្នកតាមដានការប្រដាល់លាន់មាត់ថា កីឡាករថៃរូបនេះទំនងមកប្រកួតផ្សងសំណាងច្រើនជាង ដើម្បីចង់ឈ្នះជើងខ្លាំងរបស់កម្ពុជា ប៉ុន្តែប្រភពពីអ្នកនាំកីឡាករថៃមកប្រកួតបានអះអាងថា ការចាញ់ ឬឈ្នះនឹងមានលក្ខណៈតឹងតែង ឯប្រភពខ្លះទៀតពីភាគីថៃលាន់មាត់ថា ឃីម ឌីម៉ា ទោះឈ្នះ ឬចាញ់ក៏រូបគេនឹងគ្រាំគ្រាជាមិនខាន។
ប្រភពពីគណៈកម្មការផ្គូផ្គងបានបង្ហើបឲ្យដឹងថា៖ «Kim Young ជាអ្នកប្រដាល់ថៃលំដាប់ខ្លាំងម្នាក់ ទើបតែមានឈ្មោះបោះសំឡេង និងទើបតែឈ្នះការប្រកួតក្នុងព្រឹត្តិការណ៍ដ៏ធំ ១ នៅខេត្តឈៀងរ៉ៃប្រទេស ថៃ ថ្មីៗកន្លងមក ហើយការហ៊ានដាក់ពាក្យមកសុំប្រកួតជាមួយម្ចាស់មេដាយមាសស៊ីហ្គេមកម្ពុជា ឃីម ឌីម៉ា ក៏គេមានសមត្ថភាពមិនខ្សោយនោះទេ»។
ចំណែកលោក ថៃ អ៊ូ ជាអ្នកដឹកនាំអ្នកប្រដាល់ថៃមកប្រកួតនៅ SEATV បាននិយាយថា៖ «ខ្ញុំមិនធ្លាប់បានឃើញអ្នកប្រដាល់ថៃរូបនេះប្រកួតទេ តែតាមប្រធានក្លិប និងគ្រូបង្វឹករបស់គេប្រាប់ថា វាខ្លាំងគួរសម ហើយប្រសិនបើគេចាញ់ ឬឈ្នះក៏ ឃីម ឌីម៉ា ទ្រមខ្លួនដូចគ្នាដែរ»។
កីឡាករថៃ Kim Young មានកម្ពស់ ១,៦៩ ម៉ែត្រទម្ងន់ ៦៣,៥ គីឡូក្រាមធ្លាប់ប្រកួត ៧២ ដង ឈ្នះ ៥៩ ចាញ់ ១១ និងស្មើ ២ ដង ហើយសម្រាប់ប្រកួតចុងក្រោយនៅក្នុងព្រឹត្តិការណ៍ចម្រុះជាតិសាសន៍នៅខេត្តឈៀងរ៉ៃទឹកដីថៃ គេបានឈ្នះ។ រីឯជើងខ្លាំង ឃីម ឌីម៉ា ធ្លាប់ប្រកួត ១០៧ ដង ឈ្នះ ៩៣ ចាញ់ ១២ និងស្មើ ២ ដង ហើយគិតត្រឹមក្រោយឈ្នះមេដាយមាស កីឡាស៊ីហ្គេម ឆ្នាំ ២០១៧ ឌីម៉ាប្រកួតចាញ់ចំនួន ៣ ដង ក្រៅពីនេះឈ្នះទាំងអស់ប្រហែល ១៥ ដង។
លោក ហេង ប៊ុនឃីម ដែលជាពុក និងជាគ្រូបង្វឹករបស់ ឃីម ឌីម៉ា បានប្រាប់ថា៖ «ឌីម៉ាកំពុងហ្វឹកហាត់យកកម្លាំងត្រៀមប្រកួតមិនឲ្យចាញ់ទេ ប៉ុន្តែយើងមិនត្រូវមើលងាយដៃគូឡើយព្រោះគេក៏ហាត់ យើងក៏ហាត់។ ទោះជាយ៉ាងណាខ្ញុំមានជំនឿចិត្តថា កូនប្រុសរបស់ខ្ញុំនឹងប្រឹងវាយឲ្យអស់ពីសមត្ថភាព ប៉ុន្តែគ្នាមិនចេះនិយាយច្រើនទេ»។
លោក ហេង ប៊ុនឃីម បានបន្ថែមថា៖ «ការប្រកួតចាញ់កន្លងមក ឌីម៉ា មិនដែលខឹង ឬតវ៉ាជាមួយនឹងគណៈកម្មការនោះទេ ប៉ុន្តែបណ្តាញព័ត៌មានមួយចំនួននិយាយពន្លើសបន្ថែមធ្វើឲ្យគេខឹងវា។ រឿងចាញ់ ឬឈ្នះ វាជារឿងធម្មតារបស់អ្នកកីឡា បើយើងខ្សោយគឺគេឈ្នះ តែបើយើងខ្លាំងអ្វីៗគឺទទួលបានលទ្ធផលល្អ»។ ចំណែក ឌីម៉ា និយាយថាដឹងតែពីវ៉ៃអស់ពីសមត្ថភាព រឿងលទ្ធផលមិនហ៊ាននិយាយទេ។
ចំណែកកីឡាករ ប៊ុន សុធា ត្រូវជួបថៃ Chhart Phat ក្នុងទម្ងន់ ៥៤ គីឡូក្រាម។ សុធា ដែលល្អជង្គង់ និងកែងនោះធ្លាប់ប្រកួតបាន ៥៣ ដង ឈ្នះ ៤៧ ចាញ់៥ និងស្មើ ១ ដង ចំណែក Chhart Phat ធ្លាប់ប្រកួតបាន ៤៨ ដង ឈ្នះ ៤០ ចាញ់ ៧ និងស្មើ ១ ដង៕