ក្រុងស៊ូវ៉ា៖ កីឡាករបាល់ឱបជម្រើសជាតិប្រទេស ហ្វ៊ីជី ចំនួន ២ រូប ត្រូវបានចាប់ខ្លួនពីបទមិនគោរពតាមច្បាប់របស់ជាតិប៉ាស៊ីហ្វិក ដែលតម្រូវឲ្យនៅដាច់ពីគ្នា ដើម្បីទប់ស្កាត់វីរុសកូរ៉ូណា ដោយអាជា្ញធរមូលដ្ឋានបាននិយាយថា អាកប្បកិរិយាព្រងើយកន្តើយនេះ នឹងត្រូវផ្ដល់ព័ត៌មានឲ្យទៅស្ថាប័នគ្រប់គ្រងបាល់ឱបរបស់ពិភពលោក។
ទោះបីយ៉ាងណា កីឡាករទាំង ២ រូបនោះមិនត្រូវបានគេបង្ហាញអត្តសញ្ញាណឲ្យដឹងនោះទេ ប៉ុន្តែសមាគមបាល់ឱបនៃប្រទេស ហ្វ៊ីជី បានអះអាងថា ពួកគេជាកីឡាករអាជីព ខណៈប្រព័ន្ធផ្សព្វផ្សាយបានធ្វើការរាយការណ៍ផ្សេងថា ជាកីឡាករលេងនៅកម្មវិធីប្រកួត ដែលកំណត់អ្នកលេងត្រឹម ៧ នាក់ (sevens players) និងជាកីឡាករក្រុមជម្រើសជាតិ។
ក្រុមជម្រើសជាតិហ្វ៊ីជី គឺជាម្ចាស់មេដាយមាសអូឡាំពិករដូវក្ដៅ កាលឆ្នាំ ២០១៦ នៅប្រេស៊ីលសម្រាប់វិញ្ញាសាបាល់ឱបកីឡាករ ៧ នាក់ និងកំពុងឈរនៅចំណាត់ថ្នាក់ទី ៣ នៅក្នុងព្រឹត្តិការណ៍ World Rugby Sevens Series រដូវកាលឆ្នាំ ២០១៩-២០២០ ដែលពេលនេះត្រូវបានផ្អាកហើយ ដោយសារការរាលដាលវីរុសកូរ៉ូណា។
លោកនាយករដ្ឋមន្ត្រី Frank Bainimarama បានចោទប្រកាន់កីឡាករទាំង ២ នោះថា បានដាក់ប្រទេស ហ្វ៊ីជី ទាំងមូលទៅក្នុងគ្រោះថ្នាក់។ លោកនាយករដ្ឋមន្រ្តីមានប្រសាសន៍ថា៖ «កីឡាករម្នាក់ដែលបានមកពីប្រទេស សិង្ហបុរី មានហានិភ័យខ្ពស់បំផុត ក្នុងការឆ្លងវីរុស ពេលនៅបរទេសនោះ ហើយបន្ទាប់មកបានគេចពីការដាក់ឲ្យនៅដោយឡែកពីគេ នៅមន្ទីរពេទ្យហ្វ៊ីជី»។
លោក Bainimarama បានមានប្រសាសន៍បន្តទៀតថា៖ «សំណាងមិនល្អ ដែលជំហានរបស់គាត់មិនអាចទៅណាឆ្ងាយពីកម្លាំងប៉ូលិស។ គាត់ត្រូវបានចាប់ខ្លួន ហើយដាក់ឲ្យនៅដាច់ពីគេឯង នៅឯមន្ទីរពេទ្យ Nadi»។
នាយកប្រតិបត្តិសហព័ន្ធបាល់ឱបហ្វ៊ីជី លោក John O''Connor បាននិយាយថា៖ «សហព័ន្ធកីឡាបាល់ឱបហ្វ៊ីជី នឹងចាត់វិធានការវិន័យសមស្របទល់នឹងកីឡាករបាល់ឱបអាជីពទាំងអស់រួមទាំងការរាយការណ៍អំពីអាកប្បកិរិយា ដែលមិនមានការទទួលខុសត្រូវនេះដល់ក្លិបរបស់ពួកគេ និងសហព័ន្ធបាល់ឱបពិភពលោក»។
លោក O''Connor បានបន្តទៀតថា៖ «គ្រួសារបាល់ឱបរបស់ប្រទេស ហ្វ៊ីជី ចង់លុបបំបាត់ការខកចិត្តដ៏ធំ ចំពោះអាកប្បកិរិយាដ៏ខ្ជីខ្ជារបស់កីឡាករទាំង ២ នាក់ ដែលកំពុងធ្វើឲ្យក្រុមគ្រួសាររបស់ពួកគេ និងប្រជាជនហ្វ៊ីជីផ្សេងទៀតស្ថិតក្នុងគ្រោះថ្នាក់»។
លោកនាយកប្រតិបត្តិ John O''Connor បាននិយាយបន្ថែមចុងក្រោយថា៖ «អំពើដែលខ្វះភាពចាស់ទុំនេះ គឺខុសឆ្គងទាំងស្រុង ហើយយើងអត់មានការជំទាស់អ្វីឡើយ ចំពោះការអនុវត្តរបស់សមត្ថកិច្ច ដែលចាប់ខ្លួនគេទាំង ២ នាក់ ហើយក៏គាំទ្រផងដែររាល់វិធានការទាំងឡាយណា ដែលនឹងត្រូវធ្វើឡើងចំពោះពួកគេ»៕ AFP/VN