ភ្នំពេញ៖ អ្នកជំនាញរបស់សហព័ន្ធកីឡាបាល់ទាត់កម្ពុជា (FFC) និងមន្រ្តីកីឡាតំណាងឲ្យក្រសួងអប់រំយុវជន និងកីឡា បានធ្វើការគាំទ្រយ៉ាងពេញទំហឹងចំពោះការបើកឲ្យដំណើរការរបស់សាលាបាល់ទាត់អន្តរជាតិប្រេស៊ីលនៅកម្ពុជា ហៅកាត់ថា BIFA Cambodia ដោយពួកគាត់សុទ្ធតែយល់ថា សាលាដែលប្រមូលផ្តុំដោយគ្រូបង្វឹកជាអ្នកជំនាញ និងជាអតីតកីឡាល្បីៗមកពីប្រេស៊ីលមួយនេះ នឹងរួមចំណែកជួយឲ្យវិស័យបាល់ទាត់នៅកម្ពុជាកាន់តែមានភាពរីកចម្រើនស្របទៅតាមស្តង់ដាអន្តរជាតិយ៉ាងពិតប្រាកដ។
លោក កែវ សារ៉េត អគ្គលេខាធិការ FFC បានថ្លែងថា៖ «ក្នុងនាមឲ្យ FFC ខ្ញុំសូមអបអរសាទរជាមួយនឹងក្រុមហ៊ុនរៀលលាននែរ ដែលបានខិតខំរៀបចំឲ្យមានសាលាបាល់ទាត់អន្តរជាតិប្រេស៊ីលប្រចាំនៅកម្ពុជាយើង ដូច្នេះយើងសង្ឃឹមថា ទៅថ្ងៃអនាគតយុវជនរបស់យើងនឹងមានរបៀបលេងបាល់ទាត់មួយ ទៅតាមទម្រង់របស់ប្រេស៊ីល អ៊ីចឹងភាពអវិជ្ជមានក្នុងវ័យយុវជន នឹងត្រូវកាត់បន្ថយហើយកីឡាបាល់ទាត់ប្រាកដជាមានការរីកចម្រើនខ្លាំង»។
ចំណែកលោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡាតំណាងឲ្យក្រសួងអប់រំយុវជន និងកីឡា បានថ្លែងថា៖ «ខ្ញុំសូមកោតសរសើរ និងវាយតម្លៃខ្ពស់ចំពោះ ក្រុមហ៊ុនរៀលលាននែរ ដែលបានសហការជាមួយ BIFA បង្កើតឲ្យមាន BIFA Cambodia នៅក្នុងគោលបំណងផ្តល់សេវាកម្មបណ្តុះបណ្តាលបាល់ទាត់ទៅតាមស្តង់ដាប្រេស៊ីល អ៊ីចឹងក្រសួងអប់រំ សូមអបអរសាទរកោតសរសើរ និងសូមឲ្យ BIFA Cambodia ដំណើរការបានល្អប្រសើរ និងផលិតបានកីឡាករល្អៗសម្រាប់កម្ពុជា និងក្នុងតំបន់»។
យ៉ាងណាក៏ដោយ នៅក្នុងពិធីបើកសម្ពាធជាផ្លូវការរបស់ BIFA Cambodia នៅសណ្ឋាគារណាហ្គាវើលកាលពីព្រឹកថ្ងៃពុធម្សិលមិញ ទាំងលោក គុយ ប៉ាន់ឆ័យ អគ្គនាយកក្រុមហ៊ុនរៀលលាននែរ (Riellionaire) ដែលជាក្រុមហ៊ុននាំយក BIFA មកកាន់ប្រទេស កម្ពុជា លោក Ricardo Alves Fernandes ជាស្ថាបនិករបស់សាលាបាល់ទាត់អន្តរជាតិប្រេស៊ីល (BIFA) និង លោក D.W Daniel នាយកគ្រប់គ្រងទូទៅក្រុមហ៊ុន Riellionaire សុទ្ធតែបានសម្តែងការសោកស្តាយ និងសូមទោសចំពោះការខកខានមិនបានមកកម្ពុជារបស់វីរបុរសបាល់ទាត់ប្រេស៊ីល លោក Roberto Carlos ទៅតាមអ្វីដែលបានគ្រោងទុក។
លោក គុយ ប៉ាន់ឆ័យ បានថ្លែងថា៖ «ខ្ញុំមានការសោកស្តាយ និងសូមទោសទៅដល់ភ្ញៀវកិត្តិយសទាំងអស់សម្រាប់ការខកខានរបស់ លោក Roberto Carlos ដែលជាតួឯកនៅក្នុងកម្មវិធីរបស់យើង។ ទោះយ៉ាងណាក្រុមហ៊ុនរៀលលាននែរ មានកិត្តិយសខ្លាំងណាស់ ដែលបានធ្វើការជាមួយ BIFA ក្នុងការនាំយក សាលាបាល់ទាត់អន្តរជាតិប្រេស៊ីលមកកាន់ប្រទេស កម្ពុជា ដើម្បីចូលរួមចំណែកជាមួយ FFC និងក្រសួងអប់រំក្នុងការជំរុញឲ្យវិស័យមួយនេះ អាចឈានទៅដល់កម្រិតមួយ ដែលអាចប្រកួតប្រជែងជាមួយគេបានពិសេសការត្រៀមខ្លួន ក្នុងស៊ីហ្គេម ឆ្នាំ ២០២៣ ដែលត្រូវធ្វើនៅកម្ពុជា»។
យ៉ាងណាក៏ដោយ លោក Roberto Carlos ដែលគ្រោងមកដល់កម្ពុជាកាលពីយប់ថ្ងៃអង្គារក៏បានបង្ហាញការសោកស្តាយ ចំពោះការខកខាននេះដែរ។ លោកបានថ្លែងតាមរយៈវីដេអូឡាយថា លោកបានជួបបញ្ហាលំបាកមួយក្នុងពេលផ្លាស់ប្តូរជើងហោះហើរនៅឌូបៃ ដែលមិនអាចឲ្យលោកបន្តដំណើរមកកាន់ប្រទេស កម្ពុជា បាន។
អតីតកីឡាករដ៏ឆ្នើមប្រេស៊ីលមានរហស្សនាមជើងឆ្វេងគ្មានស្រមោល លោក Roberto Carlos បានបន្ថែមថា៖ «ខ្ញុំពិតជាមានការសោកស្តាយ ចំពោះការខកខាននេះ និងសូមទោសដល់អ្នកឧបត្ថម្ភទាំងអស់ ពិសេសគណៈគ្រប់គ្រងរបស់ BIFA Cambodia ព្រោះនេះជាការខកខានដ៏ធំមួយ ដែលខ្ញុំមិនធ្លាប់ជួបប្រទះស្ថានភាពណា ដែលពិបាកបែបនេះនោះទេ ប៉ុន្តែខ្ញុំនឹងរៀបចំកាលវិភាគថ្មី ដើម្បីធ្វើដំណើរមកកាន់ប្រទេស កម្ពុជា នៅពេលក្រោយ»៕