សកម្មភាពប្រមូលផ្តុំគ្នាហាត់ប្រាណ នៅតាមទីសាធារណៈ នៅក្នុងប្រទេសកម្ពុជាកន្លងមក។ ភ្នំពេញ ប៉ុសិ៍្ត
.jpg)
ភ្នំពេញ៖ ក្រសួងអប់រំ យុវជន និងកីឡា បានឈានដល់ផ្អាកការលេងកីឡា ឬការហាត់ប្រាណគ្រប់ប្រភេទ ដែលមានលក្ខណៈប្រមូលផ្តុំនៅតាមទីតាំងកីឡដ្ឋានសាធារណៈ និងឯកជនជាបណ្តោះអាសន្ន ដើម្បីចូលរួមប្រយុទ្ធប្រឆាំងការរីករាលដាលជំងឺឆ្លងកូវីដ ១៩ នៅកម្ពុជា។ នេះបើតាមសេចក្តីណែនាំរបស់ក្រសួង ដែលបានជម្រាបជូនទៅដល់លោក លោកស្រីអភិបាល នៃគណៈអភិបាលរាជធានី ខេត្ត កាលពីថ្ងៃអង្គារ។
សេចក្តីណែនាំដែលមានការចុះហត្ថលេខាពីលោកបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា នេះ គឺជាការវិធានការកាន់តែតឹងតែង ព្រោះកន្លងមកក្រសួងអប់រំបានចេញសេចក្តីណែនាំ ត្រឹមផ្អាកដំណើរការអាជីវកម្មក្លិបហាត់ប្រាណ និងកំណត់ការលេងកីឡា និងហាត់ប្រាណ មិនឲ្យមានគ្នាលើសពី ១០ នាក់ប៉ុណ្ណោះ ប៉ុន្តែលើកនេះ គឺផ្អាកការលេងកីឡា ឬការហាត់ប្រាណគ្រប់ប្រភេទទាំងអស់តែម្តង។
នៅក្នុងសេចក្តីណែនាំថ្មីនេះ បានបញ្ជាក់ថា៖ «តបតាមកម្មវត្ថុខាងលើ ខ្ញុំសូមជម្រាបជូនឯកឧត្តម លោកជំទាវ ជ្រាបថា កន្លងមកក្រសួងអប់រំ យុវជន និងកីឡា បានចេញសេចក្តីណែនាំស្តីពីការផ្អាកដំណើរការអាជីវកម្មក្លិបហាត់ប្រាណជាបណ្តោះអាសន្ន និងការកំណត់ការលេងកីឡា ឬហាត់ប្រាណ ដែលមានលក្ខណៈប្រមូលផ្តុំ មិនឲ្យលើសពី ១០ នាក់ រួចមកហើយ»។
សេចក្តីណែនាំដដែលនេះ បានបញ្ជាក់ថា៖ «ក្នុងស្មារតីបង្កើតការចូលរួមបង្ការ និងទប់ស្កាត់ការរីករាលដាលនៃជំងឺកូវីដ ១៩ ក្រសួង អប់រំ យុវជន និងកីឡា សូមស្នើផ្អាកការលេងកីឡា ឬការហាត់ប្រាណគ្រប់ប្រភេទ ដែលមានលក្ខណៈប្រមូលផ្តុំ ជាបណ្តោះអាសន្ននេះ ចាប់ពីពេលនេះតទៅ រហូតដល់ស្ថានភាពនៃការរីករាលដាលនេះ ត្រូវបានបញ្ចប់។ សេចក្តីដូចបានជម្រាបជូនខាងលើ សូមឯកឧត្តម លោកជំទាវជ្រាប និង មានចំណាត់ការបន្ត ស្របតាមសមត្ថកិច្ចរបស់ខ្លួន ឲ្យមានប្រសិទ្ធភាពខ្ពស់»៕
