ភ្នំពេញៈ ភាពចម្រូងចម្រាសនៃការផ្តល់ប្រាក់រង្វាន់ទៅឲ្យម្ចាស់មេដាយមាសពិភពលោក សំបូរ សុភណ្ឌ វាបានរីកដាលកាន់តែធំ បើទោះបីជាមន្ត្រីក្រសួងអប់រំ យុវជន និងកីឡាបានធ្វើសន្និសីទកាសែតបកស្រាយទៅលើការផ្តល់ប្រាក់រង្វាន់ឲ្យ សំបូរ សុភណ្ឌ ត្រឹម ២០ លានរៀលគឺខុសពីអ្នកទទួលបានមេដាយមាសជើងឯកពិភពលោកមុនៗដែលទទួលបានដល់ ១២០ លានរៀលក៏ដោយ។
ខេមរៈសហព័ន្ធកីឡាកាយវប្បកម្ម និងលំហាត់ប្រាណហៅកាត់ថា CBBFF បានច្រានចោលការបកស្រាយរបស់លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡាដែលបានធ្វើនៅក្នុងសន្និសីទកាសែតកាលពីថ្ងៃសៅរ៍កន្លងមកដោយបានចេញសេចក្តីប្រកាសថា៖ «យើងខ្ញុំជាគណៈកម្មការប្រតិបត្តិ និងសមាជិកនៃខេមរៈសហព័ន្ធកីឡាកាយវប្បកម្ម និងលំហាត់ប្រាណមិនអាចទទួលយកបាន ចំពោះការបកស្រាយរបស់ឯកឧត្តម អ៊ុក សិទ្ធិជាតិ នោះទេដែលថា សំបូរ សុភ័ណ្ឌ ដណ្តើមបានមេដាយពីប្រទេសថៃ គឺមានវិញ្ញាសាច្រើនរហូតដល់ទៅ ៥១ ហើយមេដាយខ្លះប្រកួតត្រឹម ២ ទៅ ៣ ប្រកួតក៏ទទួលបានមេដាយដែរ ហេតុនេះក្រសួងមិនបានចាត់ទុកមេដាយនេះជាមេដាយមាសពិភពលោកពេញលេញ ដើម្បីទទួលបានប្រាក់រង្វាន់ ១២០ លានរៀល»។
នៅក្នុងសេចក្តីប្រកាសដ៏វែងអន្លាយដដែលនោះបានឲ្យដឹងទៀតថា៖ «ស្តាប់មើលទៅហាក់ដូចជាឯកឧត្តមមិនបានសិក្សាឲ្យគ្រប់ជ្រុងជ្រោយពីរបៀបនៃការប្រកួតរបស់កីឡាកាយវប្បកម្មទេគឺធ្វើការតាមអារម្មណ៍នឹកឃើញរបស់បុគ្គលខ្លួនឯង មិនយល់ពីរបៀបឲ្យពិន្ទុ ហើយហ៊ានវាយតម្លៃមេដាយមាសពិភពលោកដែលយើងទទួលបានថា មិនពេញលេញ ចុះហេតុអ្វីបានជាប្រទេស ៥០ ផ្សេងទៀតគេឲ្យតម្លៃ? អ៊ីចឹងពួកយើងខ្ញុំសម្រេចចិត្តថា សហព័ន្ធនឹងផ្អាករាល់ការចូលរួមប្រកួតទាំងថ្នាក់តំបន់អាស៊ាន អាស៊ី និងពិភពលោកមួយរយៈពេល ដោយរង់ចាំការដោះស្រាយពីក្រសួង និងស្ថាប័នពាក់ព័ន្ធជាមុនសិន»។
បន្ថែមលើបញ្ហានេះកីឡាករ សំបូរ នន់ ដែលជាបងប្រុសបង្កើតរបស់ សំបូរ សុភណ្ឌ និងកីឡាករ ណុំ សុបិន្ត សុទ្ធតែបានប្រកាសនៅលើហ្វេសប៊ុករបស់ខ្លួនឈប់ប្រកួតតំណាងឲ្យប្រទេសកម្ពុជា។ សំបូរ នួន បានសរសេរថា៖ «ខ្ញុំបាទ សំបូរ នន់ ជាអ្នកកីឡាកាយវប្បកម្មតំណាងជាតិតាំងតែពីឆ្នាំ ២០១២ រហូតមកដល់បច្ចុប្បន្ន ខ្ញុំសូមប្រកាសជាសាធារណៈថា ខ្ញុំឈប់ប្រកួតជាកីឡាករតំណាងជាតិទៀតហើយ ពីព្រោះក្រសួងអបរំ យុវជន និងកីឡា មិនបានឲ្យតម្លៃដល់កីឡាមួយនេះសូម្បីតែបន្តិច។ អរគុណបងប្អូនដែលបានគ្រាំទ្រខ្ញុំបាទរហូតមក»។
ចំណែកកីឡាករ ណុំ សុបិន្ត បានប្រកាសថា៖ «ខ្ញុំបាទ ណុំ សុបិន្ត (Ra James ) ជាកីឡាករតំណាងជាតិ និងជាគ្រូបង្វឹកផ្នែកកីឡាកាយវប្បកម្ម សូមប្រកាសជាសាធារណៈថា ខ្ញុំសុំបញ្ចប់នូវអាជីពមួយនេះ ហើយនិងមិនចូលរួមប្រកួតតំណាងជាតិទៀតនោះទេ»។
យ៉ាងណាក៏ដោយជុំវិញបញ្ហានេះលោក អ៊ុក សិទ្ធិជាតិ ធ្លាប់បានប្រាប់ ភ្នំពេញប៉ុស្តិ៍ថា៖ «សាមីខ្លួនក៏ដូចជាសហព័ន្ធ មិនដឹងពីទំហំប្រាក់រង្វាន់នេះច្បាស់ គឺមានការយល់ច្រឡំ ព្រោះតាមប្រកាសអន្តរក្រសួងលេខ ៧១៦ តាំងពីឆ្នាំ ២០១៥ គឺប្រាក់រង្វាន់អ្នកឈ្នះជើងឯកពិភពលោកគឺមេដាយមាស ២០ លានរៀល ប្រាក់ ១៦ លានរៀល និងសំរឹទ្ធ ១៣ លានរៀល។ ចំណែកប្រភេទកីឡាមួយចំនួនដែលឈ្នះបានមេដាយជើងឯកពិភពលោកកន្លងមកហើយទទួលបានប្រាក់រង្វាន់គឺមេដាយមាសបាន ១២០ លានរៀល ប្រាក់ ៨០ លានរៀល និងសំរឹទ្ធ ៦៤ លានរៀលនោះគឺធ្វើតាមករណីពិសេស ដោយសម្តេចតេជោនាយករដ្ឋមន្ត្រីមិនមែនធ្វើតាមប្រកាសអន្តរក្រសួង ឬអនុក្រឹត្យនោះទេគឺជាការលើកទឹកចិត្តបន្ថែមរបស់រាជរដ្ឋាភិបាល»៕