ភ្នំពេញ៖ ក្រុមបាល់ទះក្រសួងមហាផ្ទៃ និងក្រុមវិសាខា នឹងត្រូវប្រកួតប្រជែងគ្នា នៅរសៀលថ្ងៃព្រហស្បតិ៍នេះ ដើម្បីប្រជែងគ្នាយកតំបន់កំពូលតារាងនៃការប្រកួតពានរង្វាន់បាល់ទះមិត្តភាពអបអរសាទរ «ទិវាជ័យជម្នះ ៧ មករា» ដែលកំពុងដំណើរការ នៅលើទីលានបាល់ទះវិសាខា។
ការវិលមកជួបគ្នាជុំទី២ រវាងក្រុមក្រសួងមហាផ្ទៃ និងក្រុមវិសាខា នារសៀលម៉ោង ៤ ថ្ងៃនេះ បានក្លាយជាការប្រកួតដ៏គួរឲ្យចាប់អារម្មណ៍បំផុត ព្រោះក្រុមទាំង ២ សុទ្ធតែខ្លាំង និងទើបទទួលបានជ័យជម្នះ លើក្រុមកងពលធំអន្តរាគមន៍លេខ ៣ និងក្រុមបញ្ជាការដ្ឋានអង្គរក្ស នៅក្នុងការប្រកួតបើកឆាក កាលពីថ្ងៃពុធដូចគ្នា ហេតុនេះក្រុមដែលឈ្នះ នៅថ្ងៃនេះ នឹងមានឱកាសកាន់តែច្រើនក្នុងការឈានទៅរកការឈ្នះពាន។
យ៉ាងណាក៏ដោយនៅពេលនេះ ក្រុមវិសាខា កំពុងឈរនៅលេខរៀងទី១ ជាបណ្តោះអាសន្ននៅក្នុងចំណោមក្រុមចូលរួមទាំង ៥ ក្រុម ព្រោះកាលពីថ្ងៃពុធនោះ ពួកគេបានយកឈ្នះក្រុមកងពលធំអន្តរាគមន៍លេខ ៣ ចំនួន ៣ សិតដាច់តែម្តង (៣-០) ជាមួយគ្រាប់បាល់ ២៥-២២, ២៥-២១, ២៥-១៦ ដើម្បីទទួលបាន ៣ ពិន្ទុពេញ។
ចំណែកក្រសួងមហាផ្ទៃ ដែលបានយកឈ្នះក្រុមបញ្ជាការដ្ឋានអង្គរក្ស ៣-២ ជាមួយគ្រាប់បាល់ ២៥-១៧, ២៨-៣០,១១-២៥, ២៥-២៣, ១៦-១៤ នោះ ទទួលបានត្រឹម ២ ពិន្ទុទេ ព្រោះតាមលក្ខខណ្ឌនៃការគិតពិន្ទុ គឺក្រុមឈ្នះ ៣-០ និង ឈ្នះ ៣-១ ទទួលបាន ៣ ពិន្ទុពេញ តែបើឈ្នះ ៣-២ ទទួលបានត្រឹម ២ ពិន្ទុ ខណៈក្រុមចាញ់ ៣-២ បាន ១ ពិន្ទុ និងក្រុមចាញ់ ៣-០ និងចាញ់ ៣-១ បានសូន្យពិន្ទុ។
ជាមួយគ្នានេះ ក្រុមស្នងការដ្ឋាននគរបាលរាជធានីភ្នំពេញ នឹងត្រូវប្រកួតបើកឆាករបស់ខ្លួន នៅរសៀលម៉ោង ២ នាថ្ងៃនេះដែរ ដោយពួកគេត្រូវជួបក្រុមកងពលធំអន្តរាគមន៍លេខ ៣ ខណៈការប្រកួតពានរង្វាន់មិត្តភាពនេះ មានការលក់សំបុត្រ សម្រាប់អ្នកចូលទស្សនាផ្ទាល់ គឺសំបុត្រ ១ តម្លៃ ៥ ០០០ រៀល ប៉ុន្តែគណៈកម្មការបានកំណត់ឲ្យមានអ្នកចូលរួមត្រឹម ៣០០ នាក់ប៉ុណ្ណោះ។
ទាក់ទងទៅនឹងរូបមន្តនៃការប្រកួតពានរង្វាន់នេះ លោក ទែន ឡន ប្រធានគណៈកម្មការបច្ចេកទេសនៃការរៀបចំការប្រកួតបានឲ្យដឹងថា៖ «ក្រុមទាំង ៥ ដែលបានចូលរួម នៅក្នុងការប្រកួតនេះ ត្រូវប្រកួតគ្នាតាមរូបមន្តវិលជុំ (១ ជុំ) គឺមានន័យថា ក្រុមនីមួយៗ ត្រូវជួបគ្នាចំនួន ១ ដង ហើយក្រោយបញ្ចប់ការប្រកួតវិលជុំនេះ ក្រុមមានពិន្ទុលើគេ ដែលឈរនៅចំណាត់ថ្នាក់លេខ ១ គឺជាម្ចាស់ក្រុមជើងឯកតែម្តង»។
គួរបញ្ជាក់ថា ការប្រកួតពានរង្វាន់បាល់ទះមិត្តភាពអបអរសាទរទិវាជ័យជម្នះ ៧ មករា នេះ រៀបចំដោយសហព័ន្ធកីឡាបាល់ទះកម្ពុជាសហការជាមួយក្រុមហ៊ុន Forward ដោយមាន ៥ ក្រុមចូលរួម ហើយការប្រកួតបានចាប់ផ្តើម កាលពីថ្ងៃទី ២០ ខែមករា នឹងគ្រោងបញ្ចប់នៅថ្ងៃទី ២៥ ខែ មករា ឆ្នាំ ២០២១ ខាងមុខនេះ៕