កីឡាករ Modric (ឆ្វេង) របស់ Real ប្រជែងជាមួយ Maksimovic របស់ Getafe អំឡុងការប្រកួត La Liga កាលពីថ្ងៃអាទិត្យ។
.jpg)
ក្រុងម៉ាឌ្រីដ: ក្រុមអធិរាជស Real Madrid បានផ្ដល់ឱ្យក្រុមគូប្រជែងរួមក្រុង Atletico Madrid នូវកម្លាំងជំរុញដ៏ធំមួយ សម្រាប់ក្ដីសង្ឃឹមក្នុងការក្លាយជាម្ចាស់ជើងឯកក្របខ័ណ្ឌ La Liga ដោយសារប្រកួតបានត្រឹមស្មើ ០-០ ជាមួយក្រុមម្ចាស់ផ្ទះ Getafe កាលពីថ្ងៃអាទិត្យ។
ក្រុម Atletico បានបំបាក់ក្រុម Eibar ៥-០ ដើម្បីធ្វើឱ្យការប្រជែងពាន ដែលរលាយបាត់របស់ខ្លួន មានជីវិតជីវ៉ាឡើងវិញ ហើយជ័យជម្នះរបស់ពួកគេនេះ បង្ហាញថារឹតតែមានតម្លៃខ្លាំងឡើងទៀត ក្រោយក្រុម Real លេងស្មើដោយគ្មានគ្រាប់បាល់ នៅឯកីឡដ្ឋាន Coliseum Alfonso Perez។
នេះមានន័យថា ក្រោយបញ្ចប់ហ្គេមទី ៣១ នេះ ក្រុម Atletico បានបន្លាយការនាំមុខ នៅលើកំពូលតារាង ដោយមានចំនួន ៣ ពិន្ទុ លើក្រុមលេខ ២ Real ដែលមាន ៦៧ ពិន្ទុ ខណៈក្រុមអ្នកមានបុណ្យ Barcelona ដែលពេលនេះ នៅសល់ ១ ប្រកួតក្នុងដៃ និងទើបឈ្នះពាន Copa del Rey កាលពីថ្ងៃសៅរ៍នោះកំពុងតាមពីក្រោយ ៥ ពិន្ទុ។
កីឡាករ Llorente (ស្ដាំ) សម្ដែងក្ដីរីករាយជាមួយមិត្តរួមក្រុម ក្រោយស៊ុតបញ្ចូលទីឱ្យ Atletico នាំមុខ Eibar នាការប្រកួត កាលពីថ្ងៃអាទិត្យ។
ក្រុម Real មាន ២ សប្ដាហ៍ដ៏សែនរីករាយ ដោយសារដណ្ដើមជ័យជម្នះពីក្រុម Barca បានក្នុងជំនួប El Clasico កាលពីចុងសប្ដាហ៍កន្លងទៅក្នុងចន្លោះនៃការទម្លាក់ក្រុមហង្សក្រហម Liverpool ពីក្របខ័ណ្ឌ Champions League ត្រឹមវគ្គ ៨ ក្រុមចុងក្រោយ ដោយការយកឈ្នះទាំង ២ ជើង ៣-។
តែបញ្ជីឈ្មោះ ដែលពេញដោយកីឡាកររបួស និងការអវត្តមានកីឡាករឆ្នើមៗ មានន័យថា ក្រុមមួយនេះ ខ្វះភាពរឹងមាំ ហើយប្រាកដណាស់ ដែលចុងក្រោយទៅ ពួកគេអាចនឹងទទួលបានលទ្ធផលមិនសមប្រកប។
តែយ៉ាងណាក្ដី គ្រូបង្វឹករបស់ក្រុម Real Madrid លោក Zinedine Zidane បានពោលថា៖ «ខ្ញុំគ្មានការបារម្ភអ្វីឡើយ។ មានរឿងជាច្រើនទៀត ដែលនឹងកើតឡើង តែអ្វីដែលវាប្រុងនឹងកើត វានឹងកើត យើងបន្តដំណើរទៅមុខ»៕ VN
