ក្រុងប៊ែរឡាំង: ក្រុម Bayern Munich ទំនង​ជា​អាច​ក្លាយ​ជា​ម្ចាស់​ជើងឯក​ក្របខ័ណ្ឌ Bundesliga នៅ​ចុង​សប្តាហ៍​នេះ​ហើយ បន្ទាប់ពី​មាន​លទ្ធភាព​​នាំ​មុខ​ដាច់​ដល់​ទៅ ១០ ​ពិន្ទុ​នៅ​ទី​កំពូល​តារាង​ជាមួយ​នឹង​ជ័យជម្នះ ២-០ លើ​ក្រុម​ភ្ញៀវ Bayer Leverkusen កាល​ពី​ថ្ងៃ​អង្គារ​។

ក្រុម Bayern បាន​ធ្វើការ​គ្រប់គ្រង​លើ​ក្រុម​គូ​ប្រជែង សម្រាប់​ការប្រកួត​នៅឯ​កីឡដ្ឋាន Allianz Arena នេះ​ជាមួយ​នឹង​គ្រាប់​បាល់​នាំ​មុខ​ដ៏លឿន​នៅ​នាទី​ទី ៧ ដែល​ស៊ុត​ដោយ Eric Maxim Choupo-Moting និង​គ្រាប់​បាល់​ទី ២ ដែល​ធ្វើ​បាន​សម្រេច​ដោយ Joshua Kimmich នៅ​នាទី​ទី​ ១៣​។

ដោយសារ​ក្រុម​លេខ ២ RB Leipzig ភ្លាត់​រងបរាជ័យ​ដ៏គួរ​ឱ្យ​ភ្ញាក់ផ្អើល ដោយសារ​ក្រុម​បាត​តារាង​ទី​ ២ Cologne ហើយ​ការប្រកួត​នៅ​សល់​តែ ៤ ​ដង​ទៀត​នោះ ក្រុម​ជើងឯក​ពិភពលោក Bayern នឹង​ធានា​បាន​នូវ​ការឈ្នះ​ពាន​លីគ​កំពូល​របស់​អាល្លឺម៉ង់​ជា​លើក​ទី ៩ បន្តបន្ទាប់​គ្នា បើ​ឈ្នះ​ក្រុម​ម្ចាស់​ផ្ទះ Mainz នៅ​ថ្ងៃ​សៅរ៍​ចុង​សប្ដាហ៍​នេះ​។

គ្រូបង្វឹក​របស់​ក្រុម Bayern លោក Hansi Flick បាន​ថ្លែង​ថា​៖ «​ខ្ញុំ​បាន​ប្រាប់​ក្រុម​ទាំង​មូល មុន​ហ្គេម​ចាប់​ផ្ដើម​ថា យើង​អាច​ឈាន ១ ជំហាន​យ៉ាង​ធំ​ឆ្ពោះ​ទៅ​រក​ការលើក​ពាន ដែល​យើង​មាន​លទ្ធភាព​ដណ្ដើម​បាន​។ ឥឡូវ​នេះ យើង​ចង់​ឈ្នះ​នៅ​ផ្ទះ​របស់​ក្រុម Mainz ផងដែរ​»​។

នៅ​ក្រៅ​ទីលាន​ឯណោះ​វិញ ក្រុម Bayern កំពុង​ស្ថិត​ក្នុង​ភាពច្របូក​ច្របល់ តាំង​ពី​លោក Flick បាន​និយាយ​ចេញ​នូវ​ពាក្យ​ដែល​ធ្វើឱ្យ​គ្រប់​គ្នា​ស្រឡាំងកាំង​ កាល​ពី​ថ្ងៃ​សៅរ៍​សប្ដាហ៍​មុន​ថា លោក​មាន​បំណង​ចង់​ផ្ដាច់​កុងត្រា​នៅ​ដំណាច់​រដូវកាល​នេះ​។

ថ្នាក់​ដឹកនាំ​សំខាន់ៗ​របស់​ក្រុម Bayern បាន​ប្រតិកម្មតប​ដោយ​និយាយ​ថា ខ្លួន​មិន​ចាប់​អារម្មណ៍​ចំពោះ​ការលើក​ឡើង​តែ​ម្ខាង​ដោយ​លោក​ Flick ឡើយ ហើយ​ចង់​ផ្ដោត​តែ​លើ​ហ្គេម​នាសប្ដាហ៍​នេះ​។ ជាមួយ​គ្នា​នេះ ក្រុមយក្ស​​នៃ​រដ្ឋ Bavaria មួយ​នេះ​កាលពី​ថ្ងៃ​អង្គារ ក៏​បង្ហាញ​ជំហរ​យ៉ាង​រឹងមាំ​ក្នុង​ការមិន​ចូលរួម​ជាមួយ​លីគ​បង្កើត​ថ្មី​​ដោយ​ឡែក​ Super League​។
ក្រុម Bayern ដែល​ឈរ​លេខ ១ ក្នុង​តារាង Bundesliga មាន ៧១ ​ពិន្ទុ ខណៈ​ក្រុម​បន្ទាប់ Leipzig មាន ៦១ ​ពិន្ទុ ក្រោយ​បញ្ចប់​ការប្រកួត​សប្ដាហ៍​ទី ៣០ ដូច​គ្នា​៕ VN