Djimsiti (ស្ដាំ) របស់ Atalanta ធ្វើការរារាំងរហូតធ្វើឱ្យ Cuadrado របស់ Juve អស់ជំហរ អំឡុងការប្រកួត កាលពីថ្ងៃអាទិត្យ។
.jpg)
ក្រុងមីឡាន: ក្រុមសេះបង្កង់ Juventus របស់ លោក Andrea Pirlo បានបាត់បង់នូវសភាវអ្នកពិឃាតរបស់កីឡាករ Cristiano Ronaldo ខណៈដែលក្រុមម្ចាស់ជើងឯកក្របខ័ណ្ឌ Serie A អ៊ីតាលីមួយនេះបានរងបរាជ័យក្នុងលីគ ជាលើកដំបូងក្នុងរយៈពេល ២ ទសវត្សរ៍ ក្រោមថ្វីជើងរបស់ក្រុមម្ចាស់ផ្ទះ Atalanta កាលពីថ្ងៃអាទិត្យ។
ការស៊ុតចូល ១ គ្រាប់នៅប្រមាណជា ៣ នាទី មុនចប់ការប្រកួតពីសំណាក់ខ្សែបម្រើសញ្ជាតិអ៊ុយក្រែន Ruslan Malinovskyi បានជួយរំកិលក្រុម Atalanta ឱ្យឡើងទៅឈរនៅលំដាប់ទី ៣ ជាមួយនឹងជ័យជម្នះ ១-០ ពោលគឺ នៅពីលើក្រុម Juve ដែលអវត្តមានខ្សែប្រយុទ្ធឆ្នើមសញ្ជាតិព័រទុយហ្គាល់ Ronaldo ដោយសារមានរបួស។
ត្រឹមសប្ដាហ៍ទី ៣១ ជាមួយនឹងការមាន ៦៤ ពិន្ទុ ឥឡូវនេះ ក្រុម Atalanta កំពុងមានគម្លាតតែ ២ ពិន្ទុប៉ុណ្ណោះ ពីក្រោមក្រុមលេខ ២ AC Milan ដែលបានប្រកួតឈ្នះ Genoa ២-១ ហើយវាជាជ័យជម្នះលើកដំបូងរបស់ខ្លួននៅទឹកដី San Siro ក្នុងរយៈពេលជាង ២ ខែមកនេះ។
ក្រុមសេះបង្កង់ កំពុងលេងដោយមិនមានវត្តមាន Ronaldo ដែលជាកីឡាកររកគ្រាប់បាល់បានច្រើនជាងគេនៅ Serie A នារដូវកាលនេះ ដោយមាន ២៥ គ្រាប់ក្នុងការប្រកួតជាមួយក្រុម ដែលប្រជែងកៅអីទៅក្របខ័ណ្ឌ Champions League ដូចគ្នា។
កីឡាករ Malinovskiy (ឆ្វេង) សម្ដែងការអបអរជាមួយមិត្តរួមក្រុម ក្រោយស៊ុតបញ្ចូលទីឱ្យ Atalanta នាំមុខ Juve ១-០ អំឡុងការប្រកួត នៅក្របខ័ណ្ឌ Serie A កាលពីថ្ងៃអាទិត្យ។
គ្រូបង្វឹករបស់ក្រុម Juve លោក Pirlo បានថ្លែងថា៖ «យើងដឹងច្បាស់ថា វានឹងជាហ្គេមដ៏តឹងតែង ពេលប្រឈមនឹងក្រុម Atalanta។ Ronaldo គឺជាអ្នកបញ្ចប់ទីរបស់យើង។ រូបគេសម្របខ្លួនជាមួយការប្រកួតទាំងនេះបានយ៉ាងល្អ ព្រោះគេជាកីឡាករដ៏ពិសេសឯក»។
អ្នកចាត់ការសញ្ជាតិអ៊ីតាលីបានបន្តថា៖ «គេ គឺជាអ្នកពិឃាតក្នុងតំបន់ប៉េណាល់ទី។ ថ្ងៃនេះ យើងមានឱកាសច្រើនដង តែយើងមិនបានប្រើប្រាស់ជាប្រយោជន៍ទេ ហើយយើងក៏ត្រូវបានដាក់ទណ្ឌកម្ម ជាមួយនឹងការវាយបកមួយ»។
ក្រុម Juve មិនអាចទទួលបានជ័យជម្នះពីការប្រកួតណាមួយឡើយនៅរដូវកាលនេះ ពេលអត់មាន Ronaldo វ័យ ៣៦ ឆ្នាំ រត់នៅលើទីលានក្នុងនោះពួកគេស្មើ ៣ ដង និងចាញ់ ១ ដង។ ការគ្រងជើងឯក ៩ រដូវកាលបន្តបន្ទាប់គ្នារបស់ពួកគេ ក៏ទំនងជាត្រូវចប់ហើយ ព្រោះពេលនេះ ការងារសំខាន់បំផុត គឺការប្រជែងចំណាត់ថ្នាក់សម្រាប់ Champions League ប៉ុណ្ណោះ។
«វាជាហ្គេមដ៏សំខាន់។ ការឈ្នះថ្ងៃនេះ មានន័យថា យើងអាចឈ្នះ Juve ហើយពួកគេដឹងផងថា ពួកគេក៏អាចចាញ់យើងបានដូចគ្នា។ ខ្ញុំមិនយល់ថា ក្រុម Juve កំពុងមានបញ្ហានោះឡើយ ព្រោះពួកគេជាក្រុមដ៏រឹងមាំមួយ»។ នេះជាប្រសាសន៍របស់លោក Gian Piero Gasperini ដែលដឹកនាំក្រុម Atalanta ឱ្យឈ្នះក្រុមយក្សនាក្រុងទូរីន ជាលើកទី ១ នៅ Serie A គិតតាំងពីជ័យជម្នះចុងក្រោយក្នុងខែកុម្ភៈ ឆ្នាំ ២០០១ មក៕ VN
