គង់ សំបូរ បានទទួលរងនូវទម្ងន់ដៃរបស់ សេក គឹមរួន មុនពេលរូបគេឈ្នះពិន្ទុទាំងវេទនា ដើម្បីឡើងទៅវគ្គបន្ត។ រូបថត សហការី
.jpg)
ភ្នំពេញ៖ កីឡាករ គង់ សំបូរ ដែលមានរហស្សនាមថា ជាអ្នកមានជំនាញខាងទាត់ជើងឆ្វេងនោះ គឺធ្វើបានសម្រេចដូចការតាំងចិត្ត ដោយឈ្នះ សេក គឹមរួន ទាំងលំបាកលំបិន ក្នុងព្រឹត្តិការណ៍ TV5 Boxing Knock Out Serie កាលពីយប់ថ្ងៃសៅរ៍ ខណៈដែល គឹមរួន ជាអ្នកប្រដាល់មានមុខរឹងព្រមទាំងទប់ទល់ និងវ៉ៃប្ដូរ បានល្អ ប៉ុន្តែលទ្ធផលចុងក្រោយត្រូវចាញ់ដោយពិន្ទុប្រផិតប្រផើយ។ ចំណែកជើងខ្លាំងទម្ងន់ស្រាលរបស់កម្ពុជា ហ៊ឹម គឹមរៀង ត្រូវបានអ្នកប្រយុទ្ធរបស់ថៃ ទាត់ឲ្យខូចជើងយ៉ាងងាយបំផុត។
ជាមួយការតាំងចិត្ត វិលមកសាងភាពល្បីសម្រាប់ការប្រកួតនៅលើសង្វៀនក្នុងស្រុក ខណៈការចេញទៅប្រកួតនៅសង្វៀនក្រៅប្រទេសភាគច្រើនចាញ់នោះ គង់ សំបូរ បានងាកមកប្រើកណ្ដាប់ដៃយ៉ាងល្អ ហើយបានកាត់បន្ថយជំនាញទាត់ ដែលជាក្បាច់ដ៏សំខាន់របស់គេ ប៉ុន្តែស្ថានភាពការប្រកួតទំនងជាចង់គាំងម្តង នៅពេល សំបូរ និង សេក គឹមរួន បានសម្រុកវ៉ៃគ្នាខ្លាំង។
លក្ខណពិសេសរបស់ គង់ សំបូរ គឺមានប្រៀបបន្តិចបន្តួច ដោយមានកម្ពស់ល្អជាង វាយសម្រុកចេញកណ្តាប់ដៃបានច្រើន នាំឲ្យមានប្រៀបលើ សេក គឹមរួន ដោយពិន្ទុទាំងលំបាក ក្នុងការប្រកួតគ្នាយ៉ាងតឹងតែងចំនួនត្រឹម ៣ ទឹក ហើយលទ្ធផលចុងក្រោយ គង់ សំបូរ បានក្លាយជាអ្នកឈ្នះ ដើម្បីទទួលបានកៅអីឡើងទៅប្រកួតវគ្គជម្រុះនៅជុំទី ២ ប៉ុន្តែ សេក គឹមរួន បានធ្លាក់ចេញពីការប្រកួតតែម្តង។
សេក គឹមរួន បាននិយាយក្រោយប្រកាសលទ្ធផលចាញ់ថា៖ «លទ្ធផលចាញ់របស់ខ្ញុំនេះ គឺទទួលយកបាន ព្រោះបានប្រឹងអស់ពីសមត្ថភាពដូចគ្នា ហើយក្នុងនោះ ខ្ញុំបានធ្វើឲ្យ គង់ សំបូរ ឈឺខ្លួន និងចង់គាំងម្តងៗផងដែរ។
ចំណែកមូលហេតុដែលនាំឲ្យខ្ញុំចាញ់ពិន្ទុនេះ ដោយសារខ្ញុំឈឺខ្លួន និងមានបញ្ហាឈឺជើងនៅឡើយ ព្រោះខ្ញុំមានរបួសចាស់ តាំងពីប្រកួតលើកមុន មិនទាន់បានស្រួល ប៉ុន្តែដើម្បីកុំឲ្យខូចកម្មវិធីរបស់គេ ទើបខ្ញុំនៅតែស៊ូមកប្រកួត»។
ចំណែក គង់ សំបូរ បានសារភាពថា៖ «ខ្ញុំឈ្នះ តែវាទនាខ្លាំងណាស់ ព្រោះមុខរបស់ សេក គឹមរួន រឹងខ្លាំង វ៉ៃមិនស្រុត ហើយខ្ញុំក៏លំបាកក្នុងការសម្រុកចំនួន ៣ ទឹកពេញ ដោយកម្លាំងក៏ចុះខ្សោយ ព្រោះសម្រុកជាប់ៗគ្នាពេញទាំង ៣ ទឹក គឺអស់ថាមពលរលីង។ ទោះជាយ៉ាងណា លទ្ធផលនេះបាននាំខ្ញុំឲ្យឈានចូលទៅកក់កៅអីនៅវគ្គទី ២»។
ចំណែកការប្រកួតជម្រុះដណ្តើមពានមួយគូទៀត សោម វិឆ័យ បានយកឈ្នះ ផាន រះដោយប្រើគ្រប់កម្លាំង និងកលល្បិច ខណៈ សោម វិឆ័យ ដែលមានការប្ដេជ្ញាចិត្តខ្ពស់នោះ ក៏មានការប្រកួតទំនងល្អជាងលើកមុនៗផងដែរ។ ក្រោយការប្រកួតចំនួន ៣ ទឹកពេញ សោម វិឆ័យ ទទួលបានលទ្ធផលឈ្នះ ឈានទៅកក់កៅអីក្នុងវគ្គទី ២ ដូច គង់ សំបូរ ដែរ។
ដោយឡែក ចំពោះការប្រកួតមិត្តភាពអន្តរជាតិទម្ងន់ស្រាលវិញ កីឡាករដ៏ឆ្នើមនៃក្រុមជម្រើសជាតិកម្ពុជា ហ៊ឹម គឹមរៀង របស់ក្លិបតាព្រហ្មមានជ័យ ត្រូវអ្នកប្រដាល់ចំណូលថ្មីរបស់ថៃ Chhou Phich ទាត់ឲ្យខូចជើងនៅទឹកទី ១ ហើយនេះជាការចាញ់ ដែលមិនធ្លាប់ឃើញនោះទេ ព្រោះម្ចាស់មេដាយសំរឹទ្ធស៊ីហ្គេម គឹមរៀង សឹងតែគ្មានដៃគូប្រជែងក្នុងស្រុក តែបែរជាមកចាញ់យ៉ាងផុយស្រួយបែបនេះទៅវិញ។
ចំណែកការប្រកួតជាក់ស្តែងវិញ គឺគ្រាន់តែស្នូរសំឡេងជួងទឹកទី ១ បន្លឺឡើង សេក គឹមរៀង បានចាប់ផ្តើមវាយប្រហារជើងក្រោមទៅលើ Chhou Phich ភ្លាមៗ តែថៃម្នាក់នេះ មិនត្រឹមតែមិនបានបង្ហាញការឈឺចាប់ជើងក្រោមប៉ុណ្ណោះទេ ប៉ុន្តែគេថែមទាំងបានទាត់ជើងក្រោមសងមកវិញធ្វើឲ្យ គឹមរៀង ខូចជើង មិនអាចបន្តការប្រកួតទៀតបាន។
ការចាញ់យ៉ាងផុយស្រួយរបស់ ហ៊ឹម គឹមរៀង ធ្វើឲ្យមានការភ្ញាក់ផ្អើលច្រើន ហើយក៏បង្កើតឲ្យមានចម្ងល់ផងដែរថា តើនេះជាការចាញ់ដោយសន្លប់ពិត ឬមានអាថ៌កំបាំងអ្វីនៅពីក្រោយ? បញ្ហាមន្ទិលនេះ ភ្នំពេញប៉ុស្តិ៍ មិនអាចសុំសម្ភាសសាមីខ្លួនបានទេ៕
