ចាន់ រតនា បានទាត់កីឡាករគុយបា Gustavo Balart ក្នុងការប្រកួត ONE នៅប្រទេសថៃ។ រូបសហការី
.jpg)
ភ្នំពេញ៖ ស្របពេលដែលអ្នកគាំទ្របាននាំគ្នាកើតជាចម្ងល់ថា ហេតុអ្វីបានជាលែងឃើញ កីឡាករ ចាន់ រតនា ចេញទៅប្រកួតវាយដាក់ទ្រុងនៅក្នុងកម្មវិធី ONE Championship នោះ គឺ ចាន់ រតនា ចេញមុខបកស្រាយបំភ្លឺថា រូបគេកំពុងតែបង្កើនការហ្វឹកហាត់ ដើម្បីត្រៀមខ្លួនចេញទៅប្រកួតជាថ្មី ព្រោះនៅឆ្នាំ ២០២០ នេះ គេបានជាប់កិច្ចសន្យាជាមួយ ONE ចំនួន ៦ ប្រកួត ដែលនឹងចាប់ផ្តើមពីខែមេសា។
កីឡាករជើងខ្លាំង ចាន់ រតនា បានខកខានប្រកួតនៅក្នុងកម្មវិធី ONE Championship បន្ទាប់ពីរូបគេ បានយកឈ្នះកីឡាករគុយបា Gustavo Balart ក្នុងកម្មវិធី ONE: DREAMS OF GOLD កាលខែសីហា ឆ្នាំ ២០១៩ នៅក្រុងបាងកក ប្រទេស ថៃ ហើយនៅក្នុងអំឡុងពេលអវត្តមាននៅលើសង្វៀននេះ ចាន់ រតនា កំពុងតែសម្ងំហ្វឹកហាត់ជាប្រចាំ ក្នុងឋានៈជាគ្រូបង្វឹកផង និងហាត់ខ្លួនឯងផង នៅក្លិបផ្ទាល់ខ្លួនមួយឈ្មោះសិល្បៈគុនខ្មែរ ដែលទើបប្តូរមកនៅផ្លូវតាផុនសង្កាត់បឹងទំពុន ១ ខណ្ឌស្ទឹងមានជ័យ រាជធានីភ្នំពេញ។
ចាន់ រតនា បានឆ្លងកាត់ការហ្វឹកហាត់ និងឡើងប្រកួតកីឡាច្រើនប្រភេទ ដោយមានស្នាដៃជាបន្តបន្ទាប់ ហើយប៉ុន្មានឆ្នាំចុងក្រោយ កីឡាករវ័យ ៣៤ ឆ្នាំរូបនេះ បានបើកក្លិបបង្វឹកកីឡាករភាគច្រើនយកកម្រៃឈ្នួលពលកម្ម និងហាត់ខ្លួនឯងជាប្រចាំផងដែរ។ ចំណែកនៅឆ្នាំ ២០២០ នេះ ចាន់ រតនា នឹងត្រូវបង្ហាញខ្លួនជាថ្មី សម្រាប់ការប្រកួតក្បាច់គុនចម្រុះ MMA នៅហ្សាការតា ប្រទេស ឥណ្ឌូនេស៊ី ក្នុងខែមេសា ខាងមុខទៅតាមអ្វីដែលរូបគេចុះកិច្ចសន្យាជាមួយ ONE ក្នុងឆ្នាំនេះ។
ចាន់ រតនា បានប្រាប់ភ្នំពេញ ប៉ុស្តិ៍ ថា៖ «ខ្ញុំបានជាប់កិច្ចសន្យាជាមួយកម្មវិធី ONE Championship ចំនួន ៦ ប្រកួត ក្នុងឆ្នាំ ២០២០ ប៉ុន្តែមិនទាន់កំណត់ពេលវេលាច្បាស់នៅឡើយទេ ហើយជាមួយគ្នានេះ ខ្ញុំនឹងចាប់ផ្តើមឡើងប្រកួតវិញនៅថ្ងៃទី ១០ ខែ មេសា ឆ្នាំ ២០២០ នៅប្រទេស ឥណ្ឌូនេស៊ី ដោយខ្ញុំត្រូវជួបកីឡាករជប៉ុន Yoya Wakamatsu ចំណែកការប្រកួតជាបន្តបន្ទាប់ទៀត ចាំគេប្រាប់តាមក្រោយ»។
កីឡាករកម្ពុជា ដែលមានភាពលេចធ្លោជាងគេ ក្នុងការប្រកួតក្បាច់គុនចម្រុះ នៅ ONE Championship ចាន់ រតនា បានបន្ថែមថា៖ «ខ្ញុំហ្វឹកហាត់ជាប្រចាំ ព្រោះនេះជាមុខរបរ ដែលខ្ញុំទទួលបានប្រាក់ចំណូលពីការបង្វឹក និងឡើងប្រកួតខ្លួនឯង អ៊ីចឹងខ្ញុំតែងតែត្រៀមខ្លួនជាប្រចាំ ១០០ ភាគរយ»។
កីឡាករមានជំនាញទាំងប្រដាល់គុនខ្មែរ ល្បុក្កតោ ការ៉ាតេ យុទ្ធគុនខម យូដូ តេក្វាន់ដូ និងវ៉ូវីណាម ចាន់ រតនា បានជាប់ចិត្តក្នុងគុនចម្រុះនេះ ដោយមានកំណត់ត្រាប្រកួតបាន ១០ លើក ក្នុងនោះឈ្នះ ៧ លើក និងចាញ់ ៣ លើក ហើយអ្វីដែលគួរឲ្យកត់សម្គាល់នោះ គឺការប្រកួត ៣ លើកចុងក្រោយ នៅ ONE នេះ ចាន់ រតនា បានឈ្នះជាប់ៗគ្នា គឺឈ្នះ Abrou Fernandes, Rudy Agustian និងឈ្នះ Gustavo Balart កាលពីខែសីហា ឆ្នាំ ២០១៩។
បន្ទាប់ពីទទួលបានភាពល្បីល្បាញ និងទទួលបានលទ្ធផលល្អនេះ ចាន់ រតនា បានបង្ហើបឲ្យដឹងពីរបៀបហាត់ថា៖ «គោលដៅទៅថ្ងៃមុខ ខ្ញុំចង់បញ្ចប់ដៃគូរបស់ខ្ញុំ ដោយប្រើក្បាច់ MMA និងជឺជិតស៊ូម្ដង ព្រោះបច្ចេកទេសប្រកួត ដែលយើងសិក្សាតាមវីដេអូ ពីកីឡាប្រយុទ្ធផ្សេងៗ ធ្វើឲ្យយើងមានប្រៀប ប៉ុន្តែរឿងសំខាន់ គឺអាស្រ័យលើស្ថានភាពគូប្រកួត និងជំនាញក្បាច់អ្វីដែលយើងត្រូវផ្លាស់ប្តូរ»។
យ៉ាងណាក៏ដោយ សម្រាប់គម្រោងប្រកួតទាំង ៦ លើក របស់ ចាន់ រតនា នៅ ONE វាកំពុងស្ថិតនៅក្នុងភាពស្រពេចស្រពិល ខណៈជំងឺកូវីដ ១៩ កំពុងរីករាលដាលខ្លាំង ជាលក្ខណៈសកលលោកនោះ។ ចាន់ រតនា បានប្រាប់ជាថ្មី កាលពីថ្ងៃចន្ទថា៖ «ខ្ញុំនៅមិនទាន់ទទួលបានដំណឹងជាផ្លូវការពីការផ្អាកការប្រកួត ឬយ៉ាងណានោះទេ ប៉ុន្តែបើតាមស្ថានភាពជំងឺកូវីដ ១៩ ប្រហែលជាអាចផ្អាក។ យ៉ាងណាក៏ដោយ ខ្ញុំនៅតែបង្កើនការហ្វឹកហាត់ជាប្រចាំថ្ងៃ ដើម្បីត្រៀមការប្រកួតទាំងនោះ»៕
