លោក Gareth Southgate គ្រោងនឹងបន្តធ្វើជាគ្រូបង្វឹកជម្រើសជាតិអង់គ្លេស សម្រាប់ព្រឹត្តិការណ៍ World Cup 2022 ប្រសិនបើគាត់មានអារម្មណ៍ថា មានភាពកក់ក្ដៅចំពោះគាត់ក្នុងការបន្តនោះ បើទោះជាលោកបានទទួលស្គាល់ថា អាចអាស្រ័យលើទម្រង់លេងរបស់ក្រុមគាត់នៅ Euro 2020 ក៏ដោយ។
ក្រុមអង់គ្លេស បានឡើងបន្តទៅជុំចុងក្រោយនៃព្រឹត្តិការណ៍នេះ ក្រោយរកឃើញជ័យជម្នះ ៧-០ ទៅលើក្រុមជម្រើសជាតិម៉ុងតេណេក្រូ កាលពីសប្ដាហ៍មុន គឺមុនពេលបញ្ចប់យុទ្ធនាការជម្រុះរបស់ខ្លួន ដោយបានឈ្នះក្រុមជម្រើសជាតិកូសូវ៉ូ ៤-០។
ក្រោយពីបានឡើងដល់វគ្គពាក់កណ្តាលផ្តាច់ព្រ័ត្រ នៃព្រឹត្តិការណ៍ World Cup ឆ្នាំ ២០១៨ និងវគ្គ ៤ ក្រុមចុងក្រោយនៃពានរង្វាន់ UEFA Nations League ព្រមទាំងវគ្គជម្រុះអឺរ៉ូ ២០២០ យ៉ាងងាយស្រួល ដោយស្ថិតនៅលើកំពូលតារាងនៃពូល A នោះ លោក Southgate បានសារភាពថា ក្រុមរបស់លោក នឹងក្លាយជាក្រុមមួយ នៅក្នុងពូលនេះ ដែលមានឱកាសលេងនៅក្នុងព្រឹត្តិការណ៍នេះ ហើយអតីតអ្នកចាត់ការទូទៅរបស់ក្រុម Middlesbrough រូបនេះបានឲ្យដឹងពីជំហររបស់គាត់ដែលអាចផ្លាស់ប្តូរបាន ប្រសិនបើក្រុមអង់គ្លេស មិនបានធ្វើឲ្យចាប់អារម្មណ៍នៅឆ្នាំក្រោយទេនោះ។
លោក Southgate បានប្រាប់ក្រុមអ្នកកាសែតថា៖ «នៅពេលអ្នកមានសប្ដាហ៍មួយដូចខ្ញុំ អ្នកនឹងបានដឹងថា មនុស្សអាចនឹងលែងស្រឡាញ់អ្នកហើយ ហើយប្រសិនបើមិនមានកក់ក្ដៅចំពោះអ្នកក្នុងការបន្តតំណែងនេះទេ ពេលនោះវាអាចចាប់ផ្ដើមប៉ះពាល់ដល់ក្រុមនេះ»។
គ្រូបង្វឹករូបនេះ បានបន្ថែមថា៖ «ដូច្នេះ ខ្ញុំប្រាកដណាស់ថា តើទំនោរទាំងនោះអាចផ្លាស់ប្ដូរយ៉ាងដូចម្តេច។ សម្រាប់ខ្ញុំ វានិយាយអំពីអ្វីបន្ទាប់ទៀត ហើយខ្ញុំដឹងថា នៅទីបញ្ចប់យើងនឹងត្រូវវិនិច្ឆ័យជាចុងក្រោយតាមរយៈការប្រកួតនេះ»។
លោក Southgate បានបន្ថែមទៀតថា៖ «យើងត្រូវតែទទួលយកថា អង់គ្លេស គឺជាក្រុមមួយដែលពេញចិត្តជាងគេ។ យើងគួរតែមានអារម្មណ៍ជឿជាក់លើខ្លួនយើង ហើយយើងដឹងថា មានផ្នែកខ្លះនៃការប្រកួតនេះ គឺយើងត្រូវធ្វើឲ្យប្រសើរឡើងថែមទៀត ប៉ុន្តែខ្ញុំគិតថា ក្រុមឈរនៅលើកំពូលទាំងអស់ នឹងមានអារម្មណ៍បែបហ្នឹងដូចគ្នា»។
គ្រូបង្វឹករូបនេះបាននិយាយបន្ថែមទៀតថា៖ «កីឡាករមានជំនឿចិត្ត ហើយយើងត្រូវតែបន្តផ្តល់ការជឿជាក់ដល់ពួកគេ ប៉ុន្តែយើងមិនកុហកពួកគេទេ គឺយើងធ្វើការកោតសរសើរដោយស្មោះត្រង់ចំពោះទម្រង់លេងរបស់ពួកគេ និងប្រភេទនៃការប្រកួត ដែលពួកគេនឹងលេង»។
ទោះយ៉ាងណា លោក Southgate នឹងនៅតែមានគម្រោងដដែល បើទោះជាលោកមិនច្បាស់ថា តើលោកនឹងបន្តដឹកនាំក្រុមអង់គ្លេស នៅក្នុងព្រឹត្តិការណ៍ World Cup នៅប្រទេស កាតា ក៏ដោយ។
គ្រូបង្វឹករូបនេះបានពន្យល់ថា៖ «ខ្ញុំគិតថា នៅពេលខ្ញុំបានចាប់ផ្ដើម ហើយយើងបានសម្លឹងឃើញសហព័ន្ធផ្សេងទៀត យើងស្ទើរតែសម្រេចចិត្តទៅទីនោះ និងស្វែងរកកន្លែងដែលយើងគួរទៅ»។
គ្រូបង្វឹក លោក Southgate បាននិយាយថា៖ «ប្រទេស អាល្លឺម៉ង់ តែងនៅទីនោះ ហើយពួកគេបានកក់សណ្ឋាគារល្អបំផុតរួចទៅហើយ។ ដូច្នេះខ្ញុំគិតថា យើងត្រូវតែមានភាពក្លាហានជាងមុនបន្តិច ហើយយើងត្រូវតែមានជំនឿលើអ្វីដែលយើងកំពុងធ្វើ និងអនុវត្តតាមការរៀបចំត្រឹមត្រូវនេះ»៕ AFP/SN