លោក សុក វាសនា បានលើកពានមិត្តភាពជាមួយកូនក្រុមរបស់លោក កាលពីថ្ងៃសៅរ៍។ រូបសហការី
.jpg)
ភ្នំពេញ៖ គ្រូបង្វឹកក្រុមអាស៊ីអឺរ៉ុប លោក សុក វាសនា បានមើលឃើញថា ក្រុមរបស់លោក កំពុងតែមានការរីកចម្រើន បើទោះបីជា អាស៊ីអឺរ៉ុប ត្រៀមខ្លួនបានរយៈពេលខ្លីក៏ដោយ ប៉ុន្តែគ្រូបង្វឹករូបនេះបានអះអាងថា អាស៊ីអឺរ៉ុបត្រូវពង្រឹងខ្លួនឯងឲ្យខ្លាំងជាងនេះថែមទៀត ដើម្បីត្រៀមទប់ទល់នឹងភាពតានតឹងនៃការប្រកួតលីកកំពូលកម្ពុជារដូវកាលឆ្នាំ ២០២០ ដែលនឹងចាប់ផ្តើមក្នុងខែកុម្ភៈ ខាងមុខនេះ។
ការយកឈ្នះក្រុមណាហ្គាវើល ៤-៣ ក្នុងវគ្គជម្រុះ និងការបន្តយកឈ្នះក្រុមម្ចាស់ផ្ទះ ក្រសួងការពារជាតិ ដោយការទាត់បាល់ប៉េណាល់ទីកាត់សេចក្តី ៥-៤ ក្នុងវគ្គផ្តាច់ព្រ័ត្រ គឺក្រោយពេលក្រុមទាំង ២ ស្មើគ្នា ៣-៣ ដើម្បីលើកពានរង្វាន់មិត្តភាពក្នុងស្រុក TV5 Pre-Season Championship 2020 កាលពីថ្ងៃសៅរ៍ បានក្លាយជាចំណុចចាប់ផ្តើមប្រកបដោយផលវិជ្ជមានរបស់អាស៊ីអឺរ៉ុប។
លោក សុក វាសនា បានប្រាប់ភ្នំពេញប៉ុស្តិ៍កាលពីថ្ងៃអាទិត្យថា៖ «តាមរយៈការប្រកួតពានមិត្តភាពមួយនេះ ខ្ញុំមើលឃើញថា យើងលេងជាលក្ខណៈក្រុមបានល្អ ដោយយើងលេងស៊ីចង្វាក់គ្នា និងមានការយល់ចិត្តគ្នាបានច្រើន ហើយសម្ទះនៃការលេងរបស់កីឡាករយើងខ្លាំង បើទោះបីជាយើងទើបហ្វឹកហាត់ជុំគ្នាបាន រយៈពេលខ្លីក៏ដោយ»។
យ៉ាងណាក៏ដោយ លោក សុក វាសនា ក៏បានបង្ហាញពីចំណុចខ្វះខាតរបស់ក្រុមអាស៊ីអឺរ៉ុបផងដែរ។ លោកបាននិយាយថា៖ «ចំពោះចំណុចខ្សោយរបស់ក្រុម គឺតំបន់ការពាររបស់យើង នៅមានកម្រិត ហើយក្រុមរបស់យើង ក៏នៅស្ទើរផ្នែកកម្លាំងផងដែរ ខណៈការប្រកួតលីកកំពូល គឺការដោះដូរកីឡាករមានកម្រិតមិនដូចការប្រកួតពានមិត្តភាពនេះទេ អ៊ីចឹងយើងនឹងព្យាយាមកែប្រែនៅចំណុចខ្វះខាតទាំងនេះ ព្រោះយើងនៅសល់ពេលប្រហែលជា ៣ សប្តាហ៍ទៀត»។
ជាមួយគ្នានេះ ក្រុមអាស៊ីអឺរ៉ុបបានបង្កើនមហិច្ឆតាកាន់តែខ្ពស់ក្នុងការប្រជែងលីកកំពូលកម្ពុជាឆ្នាំ ២០២០ នេះ។ លោក វាសនា បានបង្ហើបថា៖ «ជាធម្មតាពី ១ រដូវកាល ទៅ ១ រដូវកាល យើងតែងតែមានការរំពឹងខ្ពស់ជាងមុនរហូត ប៉ុន្តែជាក់ស្តែងទទួលបានលទ្ធផលបែបណានោះ យើងនៅមិនទាន់ដឹងទេ ព្រោះការប្រកួតរដូវកាលនេះ ខ្ញុំមើលឃើញថា ក្រៅពីក្រុមអគ្គិសនីកម្ពុជា និងក្រុមសាលាកីឡាបាល់ទាត់ជាតិបាទី ដែលប្រើកីឡាករខ្មែរសុទ្ធ គឺមានការតានតឹងទាំងអស់»។
លោកបានបញ្ជាក់ថា៖ «យ៉ាងណាក៏ដោយ នៅពេលនេះ យើងកុំទាន់គិតពីភាពខ្លាំងរបស់ក្រុមផ្សេង សំខាន់យើងត្រូវពង្រឹងសមត្ថភាពខ្លួនឯងឲ្យបានល្អសិន គឺបើគេខ្លាំង យើងក៏ត្រូវតែខ្លាំងដែរ ទើបអាចប្រកួតប្រជែងជាមួយគេបាន ព្រោះនៅរដូវកាលនេះ យើងបានទទួលយកកីឡាករថ្មីៗច្រើន ហេតុនេះបទពិសោធការលេងរបស់គាត់ នៅស្ទើរ អ៊ីចឹងខ្ញុំត្រូវតែស្វែងរកឱកាសឲ្យពួកគាត់បានលេង ដើម្បីពង្រឹងសមត្ថភាពឲ្យបានកាន់តែប្រសើរ សម្រាប់ត្រៀមការប្រកួតរដូវកាលថ្មីនេះ»។
ជុំវិញការនាំយកកីឡាករថ្មីៗមកចូលរួមជួយក្រុមនៅក្នុងការប្រកួតរដូវកាលថ្មីនេះ អាស៊ីអឺរ៉ុបក៏បានរក្សាទុកកីឡាករមានបទពិសោធមួយចំនួនធំ សម្រាប់ឲ្យបន្តនៅជួយក្រុមផងដែរ។ ចំណែកកីឡាករបរទេសវិញ អាស៊ីអឺរ៉ុប នឹងចុះកុងត្រាយក ៥ នាក់ ទៅតាមការកំណត់ ហើយគិតមកដល់ពេលនេះ ក្លិបមួយនេះចុះកុងត្រាយកបាន ៣ នាក់ជាផ្លូវការហើយ។
កីឡាករបរទេសដែលបានចុះកុងត្រារួចហើយនោះ មានខ្សែបម្រើប្រយុទ្ធ Asemi Kanta របស់ជប៉ុន ខ្សែបម្រើប្រយុទ្ធមកពីអាហ្វហ្គានីស្ថាន Mohamed Emran និងកីឡាករកម្ពស់ ១,៩២ ម៉ែត្រ មកពីកូឌីវ័រ Yao Kuoassi ចំណែក ២ នាក់ទៀត ត្រូវបានលោក សុខ វាសនា បង្ហើបថា ក្លិបនឹងប្រកាស ២ ទៅ ៣ ថ្ងៃខាងមុខនេះ ខណៈការប្រកួតពានមិត្តភាពនេះ Yao រកបាន ២ គ្រាប់ និង Asemi Kanta បាន ១ គ្រាប់៕
