ឃីម បូរ៉ា បានធាក់ទៅលើ ឈុតសេរី វ៉ាន់ថង ក្នុងការប្រកួតនៅសង្វៀន CNC ពេលកន្លងមក។ រូប សហការី
.jpg)
ភ្នំពេញ៖ គ្រូប្រដាល់នៅជាយដែន លោក ហេង ប៊ុនឃីម ដែលជាឪពុកបង្កើតរបស់កីឡាករ ឃីម បូរ៉ា នៅតែមិនទាន់អាចលាងជម្រះពីក្តីបារម្ភចេញពីក្នុងចិត្ត នៅពេលកូនប្រុសរបស់លោកត្រូវប្រកួតដណ្តើមយកម៉ូតូ និងប្រាក់រង្វាន់ក្នុងការប្រកួតផ្តាច់ព្រ័ត្រជាមួយជើងខ្លាំងមកពីខេត្តបាត់ដំបង ឈុតសេរី វ៉ាន់ថង ក្នុងកម្មវិធី «កម្ពុជាសង្វៀនគុនខ្មែរ» នៅសង្វៀន CNC ព្រឹកថ្ងៃសៅរ៍។
នៅក្នុងការប្រកួតដ៏សំខាន់នេះ លោក ហេង ប៊ុនឃីម គ្រោងជំរុញឲ្យ ឃីម បូរ៉ា វ៉ៃ ឈុតសេរី វ៉ាន់ថង ឲ្យរាប់ ឬវ៉ៃឲ្យសន្លប់ ព្រោះលោកបារម្ភថា ការប្រកួតបែបប្រដំប្រសង ឬមានប្រៀបបន្តិចបន្តួច គឺ បូរ៉ា អាចនឹងត្រូវបានគេកាត់សេចក្តីឲ្យចាញ់ ដូចកាលជួបគ្នា កាលពីថ្ងៃទី ២ ខែឧសភា ខណៈការប្រកួតនោះ លោកមើលឃើញថា ឃីម បូរ៉ា មានប្រៀបលើ វ៉ាន់ថង បន្តិចបន្តួច ឬអាចថា ប្រដំប្រសងគ្នា ប៉ុន្តែចៅក្រមបែរជាកាត់ក្តីឲ្យកូនរបស់លោក ចាញ់ដាច់ដោយឯកច្ឆន្ទទៅវិញ។
លោក ហេង ប៊ុនឃីម បានប្រាប់ភ្នំពេញប៉ុស្តិ៍ កាលពីម្សិលមិញថា៖ «ខ្ញុំនៅតែបារម្ភទៅលើបញ្ហានេះ ហើយខ្ញុំគិតថា បើយើងវ៉ៃបានត្រឹមប្រហាក់ប្រហែលឈ្នះគេមិនដាច់ ឬមិនអាចវ៉ៃគេឲ្យរាប់ ឬក៏ផ្តួលគេឲ្យសន្លប់ទេនោះ យើងអាចនឹងទទួលបានលទ្ធផលបែបខកចិត្តដូចលើកមុនម្តងទៀត ប៉ុន្តែយើងក៏មិនត្រូវគិតច្រើនពេកនោះទេ គឺមានតែត្រូវប្រឹងប្រែងឲ្យអស់ពីសមត្ថភាពរបស់យើងដោយរំពឹងថា យើងអាចនឹងមានភ័ព្វសំណាង»។
យ៉ាងណាក៏ដោយ លោក ហេង ប៊ុនឃីម យល់ថា របៀបវ៉ៃបែបរត់គេចរបស់ ឈុតសេរី វ៉ាន់ថង មិនអាចនឹងផ្តល់ឱកាសឲ្យ ឃីម បូរ៉ា វ៉ៃគេឲ្យរាប់ ឬឲ្យសន្លប់បាននោះទេ។ ឪពុករូបនេះ បាននិយាយថា៖ «បើមើលទៅលើកម្រិតប្រកួតរបស់អ្នកទាំង ២ នេះ ពិសេសរបៀបវ៉ៃរត់ៗ និងគេចរបស់ វ៉ានថង គឺយើងមិនសង្ឃឹមថា អាចវ៉ៃគេឲ្យរាប់ ឬសន្លប់បាននោះទេ ព្រោះការផ្តួលគ្នាឲ្យសន្លប់ លុះត្រាហ៊ានវ៉ៃប្តូរដូចគ្នា។ យ៉ាងណាក៏ដោយ ខ្ញុំបានបង្វឹកបច្ចេកទេសថ្មីៗមួយចំនួនទៀតដល់ បូរ៉ា រួចអស់ហើយ អ៊ីចឹងលទ្ធផលបែបណានោះ គឺវាអាស្រ័យទៅលើការប្រកួតជាក់ស្តែង»។
ចំណែកលោក ឈុត សេរី ដែលជាឪពុក និងជាគ្រូបង្វឹករបស់ ឈុតសេរី វ៉ាន់ថង ក៏មិនហ៊ានរំពឹងខ្ពស់ដូចគ្នា។ លោកបានប្រាប់ ភ្នំពេញប៉ុស្តិ៍ កាលពីថ្ងៃព្រហស្បតិ៍ថា៖ «យើងត្រៀមបានរួចរាល់ហើយ ប៉ុន្តែយើងមិនហ៊ានសង្ឃឹមច្រើនពេកទេ គឺត្រឹមតែ ៥០ ទៅ ៦០ ភាគរយបានហើយ ព្រោះគេក៏ល្អដែរ»។
យ៉ាងណាក៏ដោយ លោក សេរី គិតថា ករណីសន្លប់ អាចនឹងកើតមានឡើង បើសិនជាមានអ្នកភ្លាត់នៅក្នុងការប្រកួតនេះ។ «អ្នកទាំង ២ នេះ មានអាវុធសម្លាប់រៀងៗខ្លួន ដូច្នេះអ្នកណាភ្លាត់ នឹងមានគ្រោះថ្នាក់។ ការប្រកួតនេះ នឹងមានភាពតានតឹងខ្លាំង និងល្អមើលជាងមុន ហើយករណីភ្លាត់ ឬសន្លប់ ក៏វាអាចនឹងកើតមានផងដែរ ព្រោះការប្រកួតដែលមានទាំងម៉ូតូ និងប្រាក់រង្វាន់ច្រើនបែបនេះ គឺម្នាក់ៗច្បាស់ជាផ្តោតខ្លាំងទៅលើការប្រកួត»។
នៅក្នុងការប្រកួតផ្តាច់ព្រ័ត្រ ប្រចាំក្រុម ២ នេះ អ្នកឈ្នះនឹងទទួលបានប្រាក់រង្វាន់ ៥០០ ដុល្លារ អមជាមួយម៉ូតូ Zoomer X មួយគ្រឿង រីឯអ្នកចាញ់លេខ ២ បានប្រាក់ ២ ០០០ ដុល្លារ។ បន្ថែមលើនេះ អ្នកលេខ ១ នឹងបានឡើងទៅប្រកួតផ្តាច់ព្រ័ត្រដណ្តើមខ្សែក្រវាត់ អមជាមួយប្រាក់រង្វាន់ ៦ ០០០ ដុល្លារ និង ៣ ០០០ ដុល្លារ ជាមួយ តាញ់ មករា ដែលទទួលបានលេខ ១ ប្រចាំក្រុម ១ ជាបន្តទៀត។
លោក ឈុត សេរី បានបន្ថែមថា៖ «ដោយសារ អ្នកទាំង ២ នេះ ទើបប្រកួតគ្នា អ៊ីចឹងយើងក៏ឃើញចំណុចខ្សោយរបស់គេ ហើយគេក៏មើលឃើញចំណុចខ្សោយ និងចំណុចខ្លាំងរបស់យើងដូចគ្នា ហេតុនេះខ្ញុំបានប្រាប់យុទ្ធសាស្រ្តថ្មីៗមួយចំនួនទៀតដល់ វ៉ាន់ថង អ៊ីចឹងការប្រកួតនេះ យើងនឹងមានបច្ចេកទេសវ៉ៃថ្មី ខុសប្លែកពីមុន តែខ្ញុំសូមលាក់សិន គឺនៅពេលឡើងដល់លើសង្វៀននឹងឃើញច្បាស់ទាំងអស់គ្នាហើយ»៕
