ក្រោយពីមានការផ្ទុះឡើងនូវវីរុសកូរ៉ូណារហូតធ្វើឲ្យគណៈកម្មការរៀបចំរំសាយចោលកម្មវិធីរត់ប្រណាំងម៉ារ៉ាតុងនៅក្រុង Nagoya របស់ប្រទេស ជប៉ុន នោះ ពួកគេបានងាកទៅប្រើបច្ចេកវិទ្យា ដើម្បីជួយសម្រាលការខកចិត្តនេះ ដោយផ្ដល់ឱកាសឲ្យអ្នកចូលរួមទាំងអស់រត់ប្រណាំងម្នាក់ឯង។
ការរត់ម៉ារ៉ាតុងសម្រាប់តែនារី និងការរត់ប្រណាំងចម្រុះនៅទីក្រុង Nagoya ត្រូវបានគ្រោងរៀបចំនៅថ្ងៃទី ៨ ខែមីនា កន្លងទៅនេះ ដោយរំពឹងថា នឹងមានអ្នកចូលរួមរត់ប្រណាំងប្រហែល ២០ ០០០ នាក់ តែកម្មវិធីនេះត្រូវរំលាយចោល ព្រោះមិនចង់ឲ្យអ្នកស្រឡាញ់កីឡាមួយនេះ ប្រឈមនឹងហានិភ័យសុខភាព អំឡុងការរាតត្បាតទូទាំងសកលលោកនៃជំងឺកូវីដ ១៩។
ជំនួសឲ្យមានការរត់ប្រណាំងជុំគ្នា ក្រុមអ្នករៀបចំបានផ្ដល់ជូននូវប្រព័ន្ធអេប (app) ដល់ទៅ ២ ដែលអនុញ្ញាតឲ្យអ្នកចូលរួមអាចបញ្ចប់ការរត់ប្រណាំងតែម្នាក់ឯងបាន ដោយធ្វើការរត់អនឡាញ។
គណៈកម្មការមួយរូបដែលស្ថិតក្នុងចំណោមអ្នករៀបចំការរត់ប្រណាំងម៉ារ៉ាតុងនៅទីក្រុង Nagoya បាននិយាយប្រាប់ AFP ថា៖ «នេះជាលើកដំបូងហើយ ដែលព្រឹត្តិការណ៍រត់ប្រណាំងម៉ារ៉ាតុង ត្រូវបានលុបចោល ខណៈវាក៏ជាលើកទី ១ ដែរ ដែលយើងឈានទៅដល់ការប្រើប្រព័ន្ធអេបនេះ ដើម្បីយកមកជំនួសការរត់ប្រណាំងពិតប្រាកដ»។
ជួសឲ្យការរត់នៅផ្លូវមែនទែន អ្នកចុះឈ្មោះប្រកួតទាំងអស់អាចរត់បែបណាក៏បានតាមតែពួកគេចង់ ដោយបន្តរក្សាគម្លាតសង្គមក្នុងកាលៈទេសៈនេះផង ហើយប្រព័ន្ធអេប ធ្វើការវាយតម្លៃ និងអះអាងចំពោះលទ្ធផលរបស់ពួកគេ។
មានប្រព័ន្ធអេបចំនួន ២ មួយសម្រាប់អ្នកដែលមានបំណងរត់តែម្ដងឲ្យស្រេច ហើយអេប ១ ទៀត គឺសម្រាប់អ្នកដែលចង់បញ្ចប់ការរត់របស់ខ្លួន ដោយប្រើពេលច្រើនថ្ងៃ ដោយអ្នករត់ប្រណាំងទាំងអស់អាចមានពេលសម្រាប់ការរត់របស់ខ្លួន ចន្លោះពីថ្ងៃទី ៣ ខែមីនា រហូតដល់ថ្ងៃទី ៣១ ខែឧសភា។ នេះបើយោងតាមរយៈវេបសាយការរត់ប្រណាំងផ្លូវការ។
ក្រុមអ្នករៀបចំបាននិយាយតាមរយៈវេបសាយរបស់ពួកគេថា អ្វីដែលពួកគេកំពុងធ្វើនេះ គឺមានចេតនាឆ្លើយតបចំពោះទឹកចិត្តដែលអ្នកចូលរួមបានបង្ហាញឲ្យឃើញ ដោយការដែលពួកគេខំប្រឹងហ្វឹកហាត់ ព្រោះសង្ឃឹមថាអាចបានចូលរួមរត់ប្រណាំងក្នុងព្រឹត្តិ្តការណ៍ដែលត្រូវលុបចោលនេះ។
ប៉ុន្តែទោះជាយ៉ាងណា ក៏ក្រុមអ្នករៀបចំបានហាមប្រាមដែរ ក្នុងការរត់ជុំគ្នាជាក្រុមធំៗ ហើយបានប្រាប់ទៀតថា សម្រាប់ព្រឹត្តិការណ៍ខាងនារី អ្នកដែលបានទៅដល់ទីផ្ដាច់ព្រ័ត្រ តាមរយៈការរត់តាមប្រព័ន្ធអេបនេះ នឹងទទួលបានអាវយឺត ១ និងខ្សែក ១ ខ្សែ ជាវត្ថុអនុស្សាវរីយ៍៕ AFP/VN