វ៉ាស៊ីនតោនៈ តារាខ្សែប្រយុទ្ធ Megan Rapinoe និយាយពីថ្ងៃអង្គារថា នាងគិតថាក្រុមជម្រើសជាតិនារីអាមេរិកដែលទើបឈ្នះពាន World Cup ថ្មីៗនេះនឹងមិនទទួលយកការអញ្ជើញរបស់ប្រធានាធិបតីអាមេរិកលោក Donald Trump ឲ្យចូលទៅសេតវិមាននោះទេ។
កីឡាការិនី Rapinoe និយាយក្នុងកម្មវិធីនៅទូរទស្សន៍ CNN ថា៖ «ខ្ញុំនឹងមិនទៅចូលសេតវិមានទេ ហើយមិត្តរួមក្រុមដទៃទៀតដែលខ្ញុំបានជជែកគ្នាច្បាស់ពីបញ្ហានេះក៏នឹងមិនទៅទីនោះដែរ»។
កីឡាការិនីរូបនេះបន្ថែមថា៖ «ខ្ញុំគិតថា គ្មានសមាជិកក្រុមណាមួយសុខចិត្តផ្ដល់ឲ្យនូវតម្លៃដែលយើងបានខិតខំបង្កើតឡើង និងអ្វីៗដែលយើងបានតស៊ូ ព្រមទាំងវិថីដែលយើងរស់នៅនោះទេ ព្រោះខ្ញុំគិតថា យើងមិនចង់ឲ្យអ្វីៗទាំងនេះត្រូវបានកេងចំណេញ និងប្រព្រឹត្តអំពើពុករលួយដោយរដ្ឋការនេះទេ»។
Rapinoe ជាកីឡាការិនីខ្ទើយម្នាក់ក្នុងចំណោម ៧ នាក់នៅក្នុងក្រុមនេះក៏បានរិះគន់ពាក្យស្លោក «ធ្វើឲ្យអាមេរិកអស្ចារ្យម្ដងទៀត» របស់លោក Trump ផងដែរ ដោយនិយាយថាប្រធានាធិបតីរូបនេះកំពុងងាកទៅរកពេលដែល «មិនអស្ចារ្យសម្រាប់គ្រប់គ្នា»។
កីឡាការិនីរូបនេះបាននិយាយផ្ញើសារទៅប្រាប់លោក Trump ថា៖ «ខ្ញុំសូមនិយាយថា សាររបស់អ្នកកំពុងផាត់ចោលប្រជាពលរដ្ឋរួមទាំងខ្ញុំផងដែរ ហើយអ្នកកំពុងផាត់ចោលអ្នកដែលមើលទៅដូចរូបខ្ញុំ និងកំពុងផាត់ចោលពណ៌សម្បុរប្រជាពលរដ្ឋថែមទៀត»។
ខ្សែប្រយុទ្ធរូបនេះបានបន្ថែមថា៖ «ខ្ញុំគិតថា អ្នកកំពុងដើរតាមផ្លូវចាស់ដូចកាលដែលមិនមានភាពអស្ចារ្យសម្រាប់អ្នកណាមួយ។ វាប្រហែលជាបានអស្ចារ្យសម្រាប់មនុស្ស ២-៣ នាក់ និងប្រហែលជាអាមេរិកអស្ចារ្យសម្រាប់មនុស្ស ២-៣ នាក់ឥឡូវនេះ ប៉ុន្តែវាមិនអស្ចារ្យគ្រប់គ្រាន់សម្រាប់ពលរដ្ឋអាមេរិកនៅក្នុងពិភពលោកនេះទេ»។
សូមរំឭកថាក្រុមអាមេរិកបានឈ្នះជម្រើសជាតិហូឡង់ ២-០ គឺ ១ គ្រាប់រកបានដោយ Rapinoe ជាមួយការស៊ុតបាល់ពិន័យ ១១ ម៉ែត្រ និង ១ គ្រាប់ទៀតរកបានដោយកីឡាការិនី Rose Lavelle នៅវគ្គផ្ដាច់ព្រ័ត្រ World Cup កាលពីយប់ថ្ងៃអាទិត្យនៅក្នុងទីក្រុងលីយ៉ុងប្រទេសបារាំង។
កីឡាការិនី Rapinoe បានប្ដេជ្ញាចិត្តនៅមុនពេលទទួលបានជ័យជម្នះនេះថា នឹងស្ថិតនៅក្នុងផ្ទះ ប្រសិនបើលោក Trump បានអញ្ជើញក្រុមជម្រើសជាតិនារីអាមេរិកទៅកាន់ទីក្រុងវ៉ាស៊ីនតោនមែននោះ។
ទន្ទឹមនេះដែរប្រធានាធិបតីអាមេរិកលោក Trump បានឆ្លើយតបតាមប្រព័ន្ធ Twitter ថា៖« Rapinoe មិនគួរណាមិនគោរពចំពោះប្រទេស សេតវិមាន ឬទង់ជាតិរបស់យើងទេ ជាពិសេសតាំងពីពេលដែលក្រុមរបស់នាងបានសម្រេចស្នាដៃជាច្រើនកន្លងមកនេះ»។
តាមធម្មតាក្រុមកីឡាអាមេរិកដែលជាប់ជាម្ចាស់ជើងឯកតែងតែទទួលបានការអញ្ជើញឲ្យចូលទៅក្នុងសេតវិមាន ទោះជាលោក Trump ម្ដងម្កាលបានបដិសេធការអញ្ជើញដោយសារតែមានសមាជិកក្រុមបានរិះគន់ចំពោះលោកក៏ដោយ។
ក្រៅពីជម្រើសជាតិបាល់ទាត់នារីបដិសេធការអញ្ជើញនេះ គឺនៅមានក្លិបកីឡាផ្សេងទៀតបានបដិសេធផងដែរ ដូចជាក្លិបបាល់បោះ Golden State Warriors និងម្ចាស់ជើងឯកបាល់ឱប Super Bowl នៃក្លិប Philadelphia Eagles លេងនៅលីកបាល់ឱបជាតិ (NFL) កាលពីឆ្នាំមុន៕ SN