ក្រុមកីឡាសូហ្វតិន្នីស បានបង្ហាញមេដាយ ដែលពួកគេដណ្តើមបាននៅលើឆាកអន្តរជាតិកន្លងមក។ សហការី
.jpg)
ភ្នំពេញ៖ លោកឧត្តមសេនីយឯក ជា ប៊ុនហេង ប្រធានអង្គភាពកីឡាក្រសួងមហាផ្ទៃ ដែលកំពុងតែដឹកនាំសកម្មភាពកីឡារបស់ ក្រសួងមហាផ្ទៃទទួលបានលទ្ធផលល្អផ្តាច់គេ ក្នុងកីឡាជាតិលើកទី ១ និងលើកទី ២ ពិសេសការដណ្តើមយកមេដាយពីព្រឹត្តិការណ៍កីឡាប៉ូលិសអន្តរជាតិនៅប្រទេស ចិន ដោយឈ្នះបានមេដាយយ៉ាងច្រើនជាប្រវត្តិសាស្ត្រនោះបានប្រតិកម្មរិះគន់ចំៗ ទៅលើថ្នាក់ដឹកនាំកីឡាមួយចំនួនរបស់ក្រសួងអប់រំ យុវជន និងកីឡា ថា និយមបក្ខពួកជាចម្បង មិនព្រមកែទម្រង់ និងទាញប្រយោជន៍ពីកីឡា ទោះបីលទ្ធផលបានយ៉ាងណាក៏មិនសូវខ្វល់នោះឡើយ។
នៅក្នុងកិច្ចសម្ភាសន៍ផ្តាច់មុខជាមួយភ្នំពេញប៉ុស្តិ៍ កាលពីដើមសប្តាហ៍ លោក ជា ប៊ុនហេង បានផ្តោតការរិះគន់ខ្លាំងទៅនឹងការផ្តល់ប្រាក់រង្វាន់ជូនអត្តពលិក ឬគ្រូបង្វឹក តាមប្រកាស ឬអន្តរក្រសួងថាមានការយឺតយ៉ាវ ប៉ុន្តែបើចំខ្សែបក្ខពួកមន្ត្រីជាន់ខ្ពស់ កាន់សហព័ន្ធផ្ទាល់វិញនោះ គឺលឿនគួរឲ្យអត់សរសើរមិនបាន។ ផ្ទុយពីនេះ អ្នកកាន់ការផ្នែកនេះបានមើលរំលងទៅលើប្រភេទកីឡាខ្លះ ដែលឈ្នះបានមេដាយពីអន្តរជាតិ គឺត្រូវរង់ចាំរាប់ឆ្នាំ ដោយគ្មានដំណឹង បើទោះបីប្រភេទកីឡាទាំងនោះ បានបំពេញសំណុំលិខិតរួចរាល់ហើយក៏មន្ត្រីទាំងនោះមិនខ្វល់ខ្វាយដែរ។
លោក ជា ប៊ុនហេង ដែលជាទីប្រឹក្សាផ្ទាល់លោក ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃផងនោះ បានរិះគន់ចំៗ និងខ្លាំងៗថា៖ «កីឡាសូហ្វតិន្នីស ដែលទើបតែមានសកម្មភាពខ្លី តែដណ្តើមបានមេដាយជូនជាតិ ដូចជាការឈ្នះមេដាយសំរឹទ្ធ ៣ ពីព្រឹត្តិការណ៍ជើងឯកយុវជនអាស៊ី នៅហ្វីលីពីនកាលដើមឆ្នាំ ២០១៩ និងឈ្នះមេដាយមាសជាក្រុម ៦ នាក់ ពីព្រឹត្តិការណ៍ជើងឯកពិភពលោក នៅប្រទេស ចិន នោះ គឺយើងបានស្នើ និងរៀបចំឯកសាររួចរាល់យូរហើយ ប៉ុន្តែពួកមន្ត្រីមួយចំនួនដែលមានកាតព្វកិច្ចនេះ មិនរវីរវល់នោះឡើយ»។
លោកសង្កត់ធ្ងន់ថា៖ «ប្រភេទកីឡាការ៉ាតេដូ ដែលមានលោក អូន ព័ន្ធមុនីរ័ត្ន កាន់ជាប្រធានសហព័ន្ធ គឺឆាប់បានប្រាក់រង្វាន់ ចំណែកកីឡាប៉េតង់ ដែលមានក្មួយ ស សុខា កាន់វិញគឺឆាប់បានប្រាក់រង្វាន់លឿនដូចគ្នា ប៉ុន្តែបើមិនត្រូវខ្សែវិញ គឺកុំសង្ឃឹម»។
លោក ជា ប៊ុនហេង បានហៅមន្ត្រីដឹកនាំកីឡាក្នុងក្រសួងអប់រំ យុវជន និងកីឡាមួយចំនួនថា កាន់ការចង់ដុះស្លែ ប៉ុន្តែលទ្ធផលពីស៊ីហ្គេម មិនអាចគេចផុតពីលេខ ៨ និងលេខ ៩ ក្នុងតំបន់អាស៊ាននៅឡើយ ហើយលោកបានអះអាងថា ប៉ុន្មានឆ្នាំទៀតក៏នៅតែមិនអាចទៅរួចដែរ ព្រោះបក្ខពួក និងគិតប្រយោជន៍ខ្លួនជាធំ។
គួរបញ្ជាក់ថា កាលពីថ្ងៃទី ១០ ខែ មករា ឆ្នាំ ២០២០ តាមរយៈក្រសួងអប់រំ យុវជន និងកីឡាក្រោមអធិបតីភាពលោក ស សុខា ជារដ្ឋលេខាធិការនោះគឺរាជរដ្ឋាភិបាលកម្ពុជាចំណាយថវិកាអស់ ៣៨៣ ៩០០ ០០០ រៀល ក្នុងការផ្តល់ប្រាក់រង្វាន់ដល់អត្តពលិក កីឡាការ៉ាតេដូ និងគុនដាវ ដែលដណ្តើមមេដាយពីការប្រកួតអន្តរជាតិជូនជាតិកាលពីឆ្នាំមុន។
ផ្ទុយពីនេះកីឡាការិនី ស្រួង ភាវី ដែលឈ្នះមេដាយប្រាក់ ពីការប្រកួតកីឡាស្នូឃ័រជើងឯកពិភពលោក អស់រយៈពេល ២ ឆ្នាំមកហើយនោះ គឺស្ងាត់ឈឹងរហូតមកដល់ពេលនេះ។
លោក ជា វ៉ាន់សាន្ត គណៈកម្មាធិការប្រតិបត្តិសហព័ន្ធស្នូឃ័រកម្ពុជា ដែលរស់នៅប្រទេស កូរ៉េ បានបញ្ចេញជាយោបល់ថា៖ «ខ្ញុំឆ្ងល់ដែរថា តើយើងមានវិធីអ្វី ទើបអាចទទួលបានប្រាក់រង្វាន់លឿនដូចគេព្រោះ ស្រួង ភាវី ធ្លាប់សួរមកខ្ញុំញឹកញយណាស់។ ហេតុអ្វីមន្ត្រីទាំងនេះមិនព្រមមើលឃើញអំពើល្អផង និងគុណសម្បត្តិផង?»។
លោក ជា វ៉ាន់សាន្ត បានប្រាប់បន្ថែមថា៖ «ខ្ញុំឈ្នះមេដាយមាស នៅកូរ៉េ កាលពីឆ្នាំ ២០១៩ ចំនួន ៣ វិញ្ញាសា ប៉ុន្តែខ្ញុំមិនដែលចង់បានរង្វាន់ពីរដ្ឋាភិបាលនោះទេ កុំឲ្យមានការលំបាក គឺសូមឲ្យតែមានការលើកសរសើរ ឬលើកទឹកចិត្តបានហើយ»។
មន្ត្រីជាន់ខ្ពស់ផ្នែកកីឡារបស់ក្រសួងអប់រំ យុវជន និងកីឡា មិនអាចទាក់ទង ដើម្បីពន្យល់ និងបកស្រាយពីបញ្ហានេះបានទេ ព្រោះកាលពីរសៀលថ្ងៃអង្គារម្សិលមិញ លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា និងលោក ហ៊ុន សាមុត ប្រធាននាយកដ្ឋានអប់រំកាយ និងកីឡា មិនអាចសុំការបំភ្លឺបានដូចគ្នា ដោយទូរស័ព្ទរបស់លោកទាំង ២ គ្មានអ្នកទទួល៕
