ស៊ុន សុវណ្ណរិទ្ធ របស់បឹងកេត បានឆក់បាល់ចេញពីជើង សុក សំណាង របស់ក្រុមស្វាយរៀង នាជំនួបកន្លងមក។ រូបថត បឹងកេត
.jpg)
ភ្នំពេញ៖ ការប្រកួតផ្តាច់ព្រ័ត្រពានរង្វាន់សម្តេច ហ៊ុន សែន លើកទី ១៣ ឆ្នាំ ២០១៩ រវាងក្រុមបឹងកេត និង ក្រុមព្រះខ័នរាជស្វាយរៀង ត្រូវបានផ្លាស់ប្តូរទាំងពេលវេលា និងទីតាំងប្រកួត ហើយការប្រកួតដណ្តើមយកលេខ ៣ និងលេខ ៤ រវាងក្រុមវិសាខា និងក្រុមភ្នំពេញក្រោន ក៏ត្រូវបានលុបចោលផងដែរ។
យ៉ាងណាក៏ដោយ ជុំវិញការផ្លាស់ប្តូរនេះ ត្រូវបានលោក ឆាំង ពិសិដ្ឋ លេខាប្រតិបត្តិរបស់គណៈកម្មការប្រកួតបាល់ទាត់ជាតិកម្ពុជា ហៅកាត់ថា CNCC បានប្រាប់ភ្នំពេញប៉ុស្តិ៍ កាលពីម្សិលមិញថា៖ «ទាំងការផ្លាស់ប្តូរការប្រកួតផ្តាច់ព្រ័ត្រ និងការមិនធ្វើការប្រកួតដណ្តើមយកលេខ ៣ គឺយើងធ្វើទៅតាមការស្នើសុំរបស់សាមីក្លិបទាំងសងខាងដែលបានធ្វើឡើង នៅក្នុងកិច្ចប្រជុំជាមួយភាគីក្លិបទាំង ៤ កាលពីពេលថ្មីៗនេះ»។
តាមសេចក្តីជូនដំណឹងរបស់គណៈកម្មការប្រកួតបាល់ទាត់ជាតិកម្ពុជា កាលពីថ្ងៃអង្គារម្សិលមិញបានឲ្យដឹងថា ការប្រកួតដណ្តើមយកចំណាត់ថ្នាក់លេខ ៣ និងលេខ ៤ រវាងក្លិបវិសាខា និងភ្នំពេញក្រោន នឹងមិនធ្វើការប្រកួតនោះទេ ដោយមានការស្នើពីក្លិបទាំង ២ ព្រោះទុកពេលឲ្យកីឡាកររបស់ខ្លួន ដែលជាប់ជម្រើសជាតិមានពេលសម្រាកគ្រប់គ្រាន់ និងមិនប្រឈមក្នុងការរបួសក្នុងពេលប្រកួត។
បន្ថែមលើនេះ ការមិនធ្វើការប្រកួតដណ្តើមយកលេខ ៣ នេះ គឺវិសាខា និងភ្នំពេញក្រោន ដែលជាក្លិបសម្បូរទៅដោយកីឡាករវ័យក្មេង មានសមត្ថភាពនោះ ក៏ចង់ទុកពេលឲ្យកីឡាករ ដែលបានកោះហៅចូលជម្រើសជាតិអាយុក្រោម ១៩ ឆ្នាំ ធ្វើការប្រមូលផ្តុំ ត្រៀមប្រកួតជម្រុះពានរង្វាន់បាល់ទាត់យុវជនអាស៊ីអាយុក្រោម ១៩ ឆ្នាំ (AFC U19 Championship 2020 Qualifiers) ផងដែរ។
ជុំវិញការមិនមានការប្រកួតដណ្តើមយកលេខ ៣ និងលេខ ៤ រវាងក្រុមវិសាខា និងក្រុមភ្នំពេញក្រោននេះ ត្រូវបានលោក ឆាំង ពិសិដ្ឋ បានបញ្ជាក់ថា៖ «ក្នុងករណីគ្មានការប្រកួតដណ្តើមយកលេខ ៣ និងលេខ ៤ បែបនេះ តាមបទបញ្ជា និងច្បាប់នៃការប្រកួត គឺក្រុមទាំង ២ ត្រូវទទួលបានលេខ ៣ ស្ទួន ចំណែកប្រាក់រង្វាន់ ដែលនឹងទទួលបានត្រូវចែកស្មើគ្នា ហើយបញ្ហានេះ ក្រុមការងាររបស់យើងបានរៀបចំរួចហើយ»។
ដោយឡែកការប្រកួតផ្តាច់ព្រ័ត្ររវាងក្រុមបឹងកេត និងព្រះខ័នរាជស្វាយរៀង ត្រូវបាន CNCC បញ្ជាក់ថា នឹងធ្វើការផ្លាស់ប្តូរមកប្រកួតនៅថ្ងៃ ពុធ ទី ៦ ខែ វិច្ឆិកា វេលាម៉ោង ១៨ ល្ងាច ដោយមូលហេតុ មានការស្នើសុំពីក្លិបទាំង ២។
ចំណែកទីលានប្រកួតនឹងផ្លាស់ប្តូរពីពហុកីឡដ្ឋានជាតិ ទៅធ្វើនៅកីឡដ្ឋាន RSN របស់ភ្នំពេញក្រោន ដោយសារតែពហុកីឡដ្ឋាន ត្រូវរៀបចំការប្រកួតជម្រុះពានរង្វាន់យុវជនអាស៊ីអាយុក្រោម ១៩ ឆ្នាំ ដែលនឹងត្រូវធ្វើពីថ្ងៃទី ២ ដល់ថ្ងៃទី ១០ ខែ វិច្ឆិកា ឆ្នាំ ២០១៩ ខាងមុខនេះ។
សម្រាប់ការប្រកួតជម្រុះពានរង្វាន់ AFC U19 Championship 2020នេះ កម្ពុជានឹងធ្វើជាម្ចាស់ផ្ទះក្នុងការប្រកួតជម្រុះប្រចាំពូល G ដោយពូលនេះមានកម្ពុជា ថៃ ម៉ាឡេស៊ី ប្រ៊ុយណេ និងក្រុម Northern Mariana Islands ហើយក្នុងនេះកម្ពុជា នឹងត្រូវប្រកួតបើកឆាកជាមួយក្រុម U19 ម៉ាឡេស៊ី នៅថ្ងៃទី ២ មុនទៅប៉ះក្រុម Northern Mariana Islands នៅថ្ងៃទី ៤ រួចទៅជួបក្រុម U19 ថៃ នៅថ្ងៃទី ៨ និងចុងក្រោយប្រកួតជាមួយក្រុម U19 ប្រ៊ុយណេ នៅថ្ងៃទី ១០ ខែ វិច្ឆិកា ឆ្នាំ ២០១៩៕
