ភ្នំពេញ៖ ការសោកស្តាយ និងអារម្មណ៍ដ៏រំជើបរំជួលរបស់អ្នកគាំទ្រជាង ៥ ម៉ឺននាក់ សុទ្ធតែត្រូវបានបង្ហាញចេញមក នៅពេលដែលក្រុមជម្រើសជាតិកម្ពុជា បានចាញ់ក្រុមជម្រើសជាតិបារ៉ែន ១-០ ក្នុងការប្រកួតវគ្គជម្រុះជុំទី ២ ប្រចាំពូល C នៃពានរង្វាន់ FIFA World Cup Qatar 2022 នៅពហុកីឡដ្ឋានជាតិ កាលពីយប់ថ្ងៃអង្គារម្សិលមិញ។
គ្រាប់បាល់ពិឃាដរបស់ក្រុមបារ៉ែន ដែលស៊ុតទម្លុះសំណាញ់ទីក្រុមក្រុមម្ចាស់ផ្ទះកម្ពុជាដោយខ្សែបម្រើពាក់លេខ ១៩ Komail Hasan Alaswad នៅនាទីទី ៧៨ បានធ្វើឲ្យការព្យាយាមលេងបានយ៉ាងល្អ ប្រាកដដោយភាពក្លាហាន និងឆន្ទៈរបស់កម្ពុជា ត្រូវបានបាត់បង់ ហើយការបរាជ័យទាំងមិនអស់ចិត្តនេះ បានធ្វើឲ្យសមាជិកក្រុមកម្ពុជាភាគច្រើន បង្ហាញការអស់សង្ឃឹម នៅក្រោយការប្រកួតបានបញ្ចប់។
ប៉ុន្តែការចាញ់ត្រឹម ១-០ នេះ វាមិនបានសម្លាប់ទឹកចិត្តអ្នកគាំទ្រចំនួន ៥៥ ០០០ នាក់ ដែលបានចូលរួមទស្សនាផ្ទាល់នោះទេ ព្រោះពួកគេមិនបានដើរចេញពីកីឡដ្ឋានជាតិភ្លាមៗនោះទេ។ នៅពេលដែលក្រុមកម្ពុជា បាននាំគ្នាដើរជុំវិញទីលាន ដើម្បីសម្តែងការស្វាគមន៍ដល់អ្នកគាំទ្រនោះ គឺអ្នកគាំទ្រស្ទើរតែទាំងអស់ បាននាំគ្នាស្រែកហ៊ោ និងទះដៃ លើកទឹកចិត្តដល់ក្រុមកម្ពុជា ហើយក៏មានអ្នកខ្លះបានសម្រក់ទឹកភ្នែក ដោយលែងមានការអៀនខ្មាសផងដែរ។
ទឹកភ្នែករបស់អ្នកគាំទ្រទាំងនេះ មិនមែនមានន័យថា ពួកគេអន់ចិត្ត និងសោកស្តាយទៅលើលទ្ធផលចាញ់ក្រុមបារ៉ែននោះទេ ប៉ុន្តែការរំជួលចិត្តរហូតដល់ស្រក់ទឹកភ្នែក ដោយមិនដឹកខ្លួននេះ ដោយសារពួកគេរំភើបខ្លាំងពេក សប្បាយខ្លាំងពេក និងភ្ញាក់ផ្អើលខ្លាំងពេក នៅពេលឃើញទម្រង់លេងដ៏ល្អរបស់ក្រុមកម្ពុជា ហើយនេះជាអ្វីដែលពួកគេបានទន្ទឹងរង់ចាំយូរណាស់មកហើយ។
ជាមួយការបង្ហាញពីអារម្មណ៍ពិតទាំងនេះ វាជាសញ្ញាដ៏វិជ្ជមាន ដែលបង្ហាញថា កម្លាំងរបស់អ្នកគាំទ្រកម្ពុជាបានរស់ឡើងវិញហើយ បន្ទាប់ពីហ្វូងអ្នកទស្សនាដ៏ធំនេះ បានរសាត់អណ្តែត ជាចំណែកៗ នៅពេលដែលពួកគេអស់សង្ឃឹមទៅនឹងទម្រង់លេង ដែលមិនមានអ្វីប្លែករបស់ក្រុមជម្រើសជាតិកម្ពុជា ក្នុងរយៈពេលប៉ុន្មានឆ្នាំមកនេះ ខណៈឆ្នាំ ២០១៥ និងឆ្នាំ ២០១៦ ជាឆ្នាំដែលបំបែកប្រវត្តិសាស្រ្តថ្មីរបស់ក្រុមកម្ពុជា ដែលមានអ្នកចូលរួមទស្សនាផ្ទាល់ច្រើនបំផុត ចាប់ពី ៤ ម៉ឺននាក់ ដល់ជិត ៦ ម៉ឺននាក់។
នៅក្នុងពេលវេលាដ៏រំភើបនេះ អ្នកចាត់ការទៅក្រុមជម្រើសជាតិកម្ពុជា Kiesuke Honda បាននិយាយក្រើនរំឭកដោយសំឡេងមុតមាំ ទៅកាន់ក្រុមកម្ពុជា ដែលបង្ហាញទឹកមុខមិនសប្បាយចិត្ត ក្រោយពេលប្រកួតចាញ់ក្រុមបារ៉ែន ថា៖ «យើងលេងបានល្អហើយ យើងគួរសប្បាយចិត្ត និងមានមោទនភាពចំពោះខ្លួនឯង ហើយយើងត្រូវតែអរគុណដល់អ្នកគាំទ្រ។ យើងជាក្ដីស្រមៃរបស់ពួកគាត់ ហើយយើងមិនត្រូវដើរឱនមុខនោះទេ គឺយើងត្រូវសប្បាយចិត្តចំពោះខ្លួនឯង»។
តាមរយៈការចាញ់ក្រុមបារ៉ែន ១-០ ទាំងមិនអស់ចិត្ត បន្ថែមទៅលើការស្មើក្រុមហុងកុង ១-១ ក្នុងការប្រកួតបើកឆាក កាលពីថ្ងៃទី ៥ ខែ កញ្ញា កន្លងមកនេះ បានធ្វើឲ្យក្រុមកម្ពុជា ធ្លាក់ទៅឈរនៅលេខ ៤ លើក្រុមហុងកុង ដែលបានចាញ់ក្រុមអ៊ីរ៉ង់ ២-០ កាលពីយប់ថ្ងៃអង្គារនោះដែរ ខណៈក្រុមបារ៉ែន ឡើងទៅឈរនៅលេខ ១ ប្រចាំពូល C នេះ ជាបណ្តោះអាសន្ន មាន ៤ ពិន្ទុ និងតាមពីក្រោយដោយក្រុមអ៊ីរ៉ង់ មាន ៣ ពិន្ទុ និងក្រុមអ៊ីរ៉ាក់ ដែលមាន ១ ពិន្ទុដែរ។
យ៉ាងណាក៏ដោយ ទាំងលោក Mixu Paatelainen គ្រូបង្វឹកក្រុមហុងកុង និងលោក Helio Sousa គ្រូបង្វឹកក្រុមជម្រើសជាតិបារ៉ែន សុទ្ធតែបានសរសើរពីទម្រង់លេង និងភាពរីកចម្រើនរបស់ក្រុមកម្ពុជា។
លោក Helio Sousa បានថ្លែងក្រោយការប្រកួតថា៖ «កម្ពុជា គឺជាក្រុមមួយ ដែលល្អមែនទែន គឺជាក្រុមមួយ ដែលកំពុងមានការអភិវឌ្ឍ ដោយពួកគេបានព្យាយាមលេងបាល់ និងគ្រប់គ្រងបាល់បានល្អ។ តែទោះបីជាយ៉ាងណា យើងព្យាយាមកែប្រែស្ថានភាពបាន ទើបទទួលបាន ៣ ពិន្ទុ ពីការប្រកួតនេះ»។
ចំណែកគ្រូបង្គោល លោក Felix Dalmas ដែលបានសហការជាមួយខ្សែប្រយុទ្ធដ៏ល្បីរបស់ជប៉ុន Keisuke Honda ដើម្បីកែប្រែងទម្រង់លេងរបស់ក្រុមកម្ពុជា ឲ្យបានល្អប្រសើរ នៅពេលនេះ បាននិយាយថា៖ «ទោះបីជាក្រុមបារ៉ែន បាននាំមុខយើង ១ គ្រាប់ក៏ដោយ ប៉ុន្តែកីឡាកររបស់យើង នៅតែលេងតាមរបៀប និងគោលការណ៍បាល់ទាត់របស់យើង ក្នុងការព្យាយាមរក្សាបាល់ ដែលធ្វើឲ្យមានការប្រកួតប្រជែងគ្នាខ្លាំង»។
គ្រូបង្វឹកអាហ្សង់ទីនរូបនេះ បានសរសើរទៅចង្វាក់លេងរបស់កូនក្រុម និងឆន្ទៈប្រកួតដ៏មោះមុតរបស់កម្ពុជា។ លោក Fexlix បានបន្ថែមថា៖ «ចំណុចល្អរបស់ក្រុមយើង គឺលេងស៊ីចង្វាក់គ្នាបានល្អ ចេះជួយគ្នាទប់ស្ថានភាពឲ្យមានលំនឹង ពេលដែលបាត់បាល់។ ទោះបីជាប៉ះជាមួយក្រុមខ្លាំង ប៉ុន្តែក្រុមយើង នៅតែលេងដោយភាពក្លាហាន និងមានឆន្ទៈមោះមុត»។
លោក Felix មិនបានបង្ហាញពីការតូចចិត្ត ចំពោះការមិនទាន់រកឃើញការឈ្នះរបស់ក្រុមជម្រើសជាតិកម្ពុជានោះទេ។
លោកបញ្ជាក់ថា៖ «ទោះបីជាយើង មិនទទួលបានលទ្ធផលល្អ ក៏ដោយ ប៉ុន្តែការប្រមូលផ្តុំកីឡាករលើកនេះ គឺពិតជាអស្ចារ្យ ទាំងក្នុងទីលាន និងក្រៅទីលាន ហើយយើងពិតជាអរគុណដល់ទឹកចិត្តអ្នកគាំទ្រកម្ពុជា ដែលតែងតែមកគាំទ្រផ្ទាល់ និងទស្សនាការប្រកួតតាមកញ្ចក់ទូរទស្សន៍ នៅគេហដ្ឋាន។ ពួកគាត់ជាកីឡាករទី ១២ ដែលមិនអាចខ្វះបាន ហើយបើសិនជាយើង នៅតែទទួលបានការគាំទ្រច្រើនបែបនេះ នោះក្រុមកម្ពុជា នឹងកាន់តែរីកចម្រើនជាងនេះ»។
គួរបញ្ជាក់ថា កីឡាករ ដែលស្ថិតនៅក្នុងបញ្ជីឈ្មោះជម្រើសចុងក្រោយទាំង ២៣ នាក់ រួមមាន សេត រ៉ស៊ីប, ទេស សម្បត្តិ របស់បឹងកេត រ៉ឹង ប៊ុនហៀង របស់ក្រសួងការពារជាតិ គួច សុកុម្ភ, ស៊ូ យ៉ាទី, គួច ដានី , សុះ ស៊ូហាណា របស់ណាហ្គាវើល អ៊ន ចាន់ប៉ូលីន, សាវែង សំណាង, សឿត បារាំង, យ៉ើ សាហ្វី, យ៉ើ មូស្លីម របស់ភ្នំពេញក្រោន កីឡាករ ហូយ ផល្លីន, សារ៉េត គ្រីយ៉ា, សឿយ វិសាល របស់ព្រះខ័នរាជស្វាយរៀង ឆេង ម៉េង, កែន ច័ន្ទសុភ័ក្ត្រ, កែវ សុខផេង, កែវ សុខសិលា, អ៊ុក សុវណ្ណ របស់វិសាខា សៀង ចន្ធា របស់សាលាកីឡាបាល់ទាត់ជាតិបាទី និង ដាវ នីម របស់ក្រុមគិរីវង់សុខសែនជ័យ៕