ភ្នំពេញៈ សហព័ន្ធកីឡាប្រដាល់គុនខ្មែរបានប្រកាសឲ្យមន្ត្រីបច្ចេកទេស និងមន្ត្រីជំនាញទាំងអស់ស្ថិតក្រោមការគ្រប់គ្រងរបស់ខ្លួនដែលកំពុងបំពេញការងារនៅតាមសង្វៀននានាមកចុះឈ្មោះចូលរៀនវគ្គពង្រឹងសមត្ថភាពក្រមសីលធម៌ និងការគោរពបទបញ្ជាឲ្យបានម៉ឺងម៉ាត់ ដើម្បីអនុវត្តការងារឲ្យទទួលបានផលល្អ យុត្តិធម៌តម្លាភាព ហើយតាមមន្ត្រីជាន់ខ្ពស់របស់សហព័ន្ធបានឲ្យដឹងថានឹងបើកនូវវគ្គពង្រឹងសមត្ថភាពមន្ត្រីបច្ចេកទេសចំនួន ២ លើកគឺនៅខេត្តបាត់ដំបង និងរាជធានីភ្នំពេញនៅដើមខែមិថុនាខាងមុខនេះ។
លោក រាជ សុផែន អគ្គលេខាធិការរងសហព័ន្ធកីឡាប្រដាល់គុនខ្មែរ និងជាប្រធានអនុគណៈកម្មការផ្សព្វផ្សាយបានប្រាប់ភ្នំពេញប៉ុស្តិ៍ថា យោងតាមស្មារតីអង្គប្រជុំរបស់សហព័ន្ធកាលពីព្រឹកថ្ងៃសៅរ៍បានសម្រេចបើកវគ្គសិក្សាពង្រឹងបច្ចេកទេស និងក្រមសីលធម៌រយៈពេល ២ ថ្ងៃគឺនៅថ្ងៃទី ៥ និងទី ៦ ខែមិថុនានៅពហុកីឡដ្ឋានជាតិហើយថ្ងៃទី ១ និងទី ២ ខែមិថុនានឹងបើកមួយវគ្គទៀតជូនមន្ត្រីបច្ចេកទេសនៅសង្វៀនឯកភ្នំ ខេត្តបាត់ដំបង។
លោក សុផែន បន្ថែមថាសហព័ន្ធអញ្ជើញមន្ត្រីទាំងអស់ដែលកំពុងបម្រើការងារនៅរាជធានីភ្នំពេញឲ្យរួសរាន់មកចុះឈ្មោះនៅទីស្នាក់ការរបស់សហព័ន្ធនៅរៀងរាល់ម៉ោងធ្វើការចាប់ពីថ្ងៃច័ន្ទ ទី ២០ ខែឧសភារហូតដល់ថ្ងៃទី ៣ ខែមិថុនាឆ្នាំ ២០១៩ មុនបើកវគ្គចំនួន ២ ថ្ងៃ។
លោកបន្ថែមថា៖ «ដោយឡែកមន្ត្រីសហព័ន្ធដែលកំពុងបម្រើការងារនៅសង្វៀនប្រដាល់ឯកភ្នំក្នុងខេត្តបាត់ដំបងទាំងអស់សូមប្រមូលផ្តុំសិក្សាវគ្គនេះនៅថ្ងៃទី ១ និងទី ២ ខែមិថុនានៅខេត្តបាត់ដំបងផ្ទាល់តែម្តងដែលមានគ្រូឧទ្ទេសរបស់សហព័ន្ធ ដឹកនាំដោយឯកឧត្តមប្រធាន តែម ម៉ឺន ផ្ទាល់ ខណៈវគ្គនេះសហព័ន្ធមានចេញវិញ្ញាបនបត្របញ្ជាក់ការសិក្សាជូន ហើយមន្ត្រីណាដែលមិនបានមកសិក្សា ឬមិនបានទទួលវិញ្ញាបនបត្រគឺសហព័ន្ធមិនទទួលខុសត្រូវក្នុងការបម្រើការងារជាមន្ត្រីរបស់សហព័ន្ធទេគឺអាចកាត់ឈ្មោះចេញ»។
លោក តែម ម៉ឺន អគ្គលេខាធិការរងនៃគណៈកម្មាធិការជាតិអូឡាំពិកកម្ពុជា និងជាប្រធានសហព័ន្ធកីឡាប្រដាល់គុនខ្មែរមានប្រាប់ថា៖ «វគ្គនេះទទួលបានការគាំទ្រ និងថវិកាពីក្រសួងអប់រំ យុវជន និងកីឡាដែលជាគម្រោងប្រចាំឆ្នាំ ២០១៩ ផ្តល់ជូនផ្ទាល់សម្រាប់សហព័ន្ធកីឡាប្រដាល់គុនខ្មែរ។
លោកបន្ថែមថា៖ «នៅក្នុងផែនការសម្រាប់ឆ្នាំ ២០១៩ នេះសហព័ន្ធគ្រោងបើកវគ្គចំនួន ៤ លើកគឺក្នុងខែមិថុនាចំនួន ២ វគ្គ ហើយវគ្គបណ្តុះបណ្តាល ២ វគ្គទៀតអាចនឹងធ្វើនៅចុងឆ្នាំដែលមានទស្សនវិស័យបណ្តុះបណ្តាលមន្ត្រីបច្ចេកទេសវ័យក្មេង ពិសេសមានកម្រិតវប្បធម៌ខ្ពស់ដូចជាមានបរិញ្ញាបត្រ និងមានចេះភាសាបរទេស ដើម្បីសម្រួចសមត្ថភាពទៅស្តង់ដាអន្តរជាតិសម្រាប់ស៊ីហ្គេមឆ្នាំ ២០២៣ ដែលកម្ពុជាធ្វើម្ចាស់ផ្ទះ»៕