អ្នកស្រី ពុធ ធីតា និងស្វាមី បានចូលរួមលើកពាន យ៉ាងរំភើបជាមួយសមាជិកក្រុមបឹងកេត។ រូបថត CNCC
.jpg)
ភ្នំពេញ៖ ប្រធានក្លិបបឹងកេត អ្នកស្រី ពុធ ធីតា ដែលត្រូវបានគេចាត់ទុកថា ជាស្រ្តីដំបូងគេ បានចូលប្រឡូកក្នុងវិស័យបាល់ទាត់នៅកម្ពុជានោះ បានទម្លាយថា អ្នកស្រីបានជួបការលំបាកខ្លាំង ក្នុងការដឹកនាំក្លិបបឹងកេត ប៉ុន្តែការមានឆន្ទៈ និងធ្វើដោយបេះដូងពិតប្រាកដ ពិសេសការស៊ូទ្រាំ «ស៊ីអំបុកស៊ីអំបិល» ជាមួយគ្នា នៅក្នុងគ្រាលំបាក វាជាចំណុចសំខាន់ជួយឱ្យបឹងកេត អាចជម្នះនូវរាល់ការលំបាកទាំងនោះ រហូតឈានមកឈ្នះជើងឯកលីគកំពូលកម្ពុជាក្នុងរដូវកាលនេះ។
«ការដឹកនាំក្លិបមួយ ឱ្យទទួលបានជោគជ័យ វាមិនមែនជាការងាយស្រួលនោះទេ ប៉ុន្តែសំខាន់យើងត្រូវមានឆន្ទៈ គឺត្រូវធ្វើដោយឆន្ទៈពិតប្រាកដ ស្រឡាញ់ពិតប្រាកដ ព្យាយាមដោយពិតប្រាកដ នោះអ្វីៗនឹងទទួលបានជោគជ័យ»។ នេះជាការលើកឡើងរបស់អ្នកស្រី ពុធ ធីតា ដែលបានថ្លែងប្រាប់ នៅក្រោយពិធីប្រគល់ពានដល់ក្រុមម្ចាស់ជើងឯក កាលពីយប់ថ្ងៃចន្ទ។
យ៉ាងណាក៏ដោយ អ្នកស្រី ពុធ ធីតា បានទម្លាយថា ការដឹកនាំក្លិបនៅក្នុងគ្រាមានវិបត្តិជំងឺកូវីដ ១៩ គឺអ្នកស្រីបានជួបការលំបាកច្រើន។ «វិវត្តិសេដ្ឋកិច្ច ដោយសារជំងឺកូវីដ ១៩ ដូចជាការបិទក្បាលម៉ាស៊ីនអ៊ីចឹង គឺវាសាហាវមែនទែន ព្រោះយើងមិនបានត្រៀមខ្លួន ក្រុមហ៊ុនយើង ក៏មិនបានត្រៀម ម្ល៉េះហើយយើងបានស៊ូ ដោយយើងបានប្រមែប្រមូលអស់ហើយនូវធនធាន ដែលមាន តែកីឡាករក៏បានយល់ចិត្តយើងដែរ ទោះបីយើងមិនបានផ្តល់ឱ្យពួកគាត់ពេញលេញ»។
ប្រធានក្លិបបឹងកេត រូបនេះ បានបញ្ជាក់ថា៖ «កីឡាករស៊ូនៅជាមួយយើង ស៊ីអំបុកស៊ីអំបិលជាមួយគ្នា មានន័យថា យើងមានបេះដូងឱ្យគាត់ គាត់ក៏មានបេះដូងឱ្យយើង គឺយើងបានតស៊ូជាមួយគ្នា។ ការតស៊ូរបស់យើង បានឆ្លងកាត់ការលំបាក គឺលំបាកមែនទែន! ដូចថា លុយមិនមានច្រើនទេ មានតែបេះដូង គឺបេះដូង ដែលពេញទៅដោយការស្រឡាញ់ចំពោះពួកគាត់។ ជាមួយគ្នានេះ ខ្ញុំក៏ស្រឡាញ់នៅក្នុងវិស័យកីឡានេះខ្លាំង ហើយការស្រឡាញ់នេះហើយ ដែលធ្វើឱ្យយើងមានដល់ថ្ងៃនេះ»។
តាមរយៈការប្រកាសនៅក្នុងពិធីប្រគល់ពានដល់ក្រុមម្ចាស់ជើងឯក កាលពីយប់ថ្ងៃចន្ទ នោះ ក្រុមបឹងកេត បានក្លាយជាម្ចាស់ម្ចាស់ជើងឯក ជាមួយកំណត់ត្រាល្អបំផុត គឺឈ្នះ ១២ លើក ស្មើ ៥ មិនបានចាញ់សោះ ហើយក្លិបបឹងកេត ក៏បានក្លាយជាក្រុមដំបូងគេ ដែលទទួលបានប្រាក់រង្វាន់ ១៥០ លានរៀល ក្នុងនាមជាក្រុមជើងឯកផងដែរ ដោយសារតែប្រាក់រង្វាន់នេះ ទើបតែបង្កើននៅឆ្នាំនេះទេ ខណៈឆ្នាំកន្លងមក ក្រុមលេខ ១ បានប្រមាណ ៦០ លានរៀលប៉ុណ្ណោះ។
បន្ថែមលើការឈ្នះពានលើកទី៣ នេះ លោក គីម ភក្តី បានក្លាយជាគ្រូបង្វឹកល្អ រីឯអ្នកចាំទី ហ៊ុល គីមហ៊ុយ បានក្លាយជាអ្នកចាំទីល្អ ខណៈខ្សែប្រយុទ្ធ ម៉ាត់ នូរុណ បានពានជាកីឡាករល្អប្រចាំព្រឹត្តិការណ៍នេះ ដោយសមាជិកក្រុមបឹងកេត ទាំង ៣ នេះ បានប្រាក់រង្វាន់លើកទឹកចិត្តចំនួន ៣ លានរៀលដូចៗគ្នា។
ប៉ុន្តែពានអ្នកស៊ុតបាល់បញ្ចូលទីបានច្រើនជាងគេ បានទៅលើខ្សែប្រយុទ្ធ Privat របស់ក្រុមព្រះខ័នរាជស្វាយរៀង ហើយក្រុមស្វាយរៀង ក៏ជាក្រុមជើងឯករង ប្រចាំរដូវកាលនេះផងដែរ ដោយពួកគេទទួលបានប្រាក់រង្វាន់ ៦០ លានរៀល រីឯក្រុមលេខ ៣ ភ្នំពេញក្រោន បាន ៥០ លានរៀល ខណៈក្រុម Fair Play បានទៅក្រុមយុវជនបាទី ដោយបានប្រាក់រង្វាន់ ៨ លានរៀល។
ជាមួយបាត់បង់តំណែងជើងឯក ដោយបានត្រឹមលេខ ២ នៅរដូវកាលនេះ ស្វាយរៀងដែលមាន ៤១ ពិន្ទុ ស្មើបឹងកេត ដែរនោះ បានធ្វើរឿងដ៏គួរឱ្យគោរពមួយ គឺក្លិបមួយនេះ បានប្រកាសថា៖ «ប្រាក់រង្វាន់ ៦០ លានរៀល ដែលបានទទួលពីការប្រកួតលីកកំពូលកម្ពុជា យើងនឹងបរិច្ចាគទាំងអស់ ជូនជនរងគ្រោះដោយសារទឹកជំនន់នៅតាមបណ្តាខេត្ត»៕
