​ព្រឹទ្ធាចារ្យ និង​គ្រូ​បង្វឹក​កីឡា​ល្បុក្កតោ ទទួល​បានការ​លើក​ទឹក​ចិត្ត​ពីថ្នាក់​ដឹក​នាំ​​

គ្រូបង្វឹកកីឡាល្បុក្កតោ និងថ្នាក់ដឹកនាំរបស់សហព័ន្ធ បានថតជុំគ្នា នៅក្នុងអង្គប្រជុំ កាលពីថ្ងៃអង្គារ។ រូបថត សហការី

ភ្នំពេញ៖ សហព័ន្ធកីឡាគុនល្បុក្កតោកម្ពុជា កាលពីថ្ងៃទី ១២ ខែ មករា ឆ្នាំ ២០២១ បានជួបជុំគ្នាមួយនៅទីស្នាក់ការគណៈកម្មាធិការជាតិអូឡាំពិកកម្ពុជា ដើម្បីសំណេះសំណាល និងយកចិត្តទុកដាក់ ចំពោះគ្រូព្រឹទ្ធាចារ្យចាស់ៗ និងសាលាគុននៅតាមខេត្តមួយចំនួនដែលមានបញ្ហាលំបាកក្នុងវិបត្តិកូវីដ ១៩។

កិច្ចប្រជុំនោះ ត្រូវបានធ្វើឡើងក្រោមវត្តមានរបស់ថ្នាក់ដឹកនាំសំខាន់ៗរបស់សហព័ន្ធកីឡាគុនល្បុក្កតោ រួមមានលោកបណ្ឌិតសភាចារ្យ ច័ន្ទ សារុន ជាប្រធាន លោក កែវ រ៉េមី ជាទីប្រឹក្សាជាន់ខ្ពស់ លោក វ៉ាត់ ចំរើន អនុប្រធានសហព័ន្ធ រួមទាំងព្រឹទ្ធាចារ្យគុនល្បុក្កតោមកពីខេត្ត មានខេត្តតាកែវ សៀមរាប កំពង់ឆ្នាំង កំពត រាជធានីភ្នំពេញ និងគណៈកម្មការបច្ចេកទេសរបស់សហព័ន្ធផងដែរ។

ជុំវិញខ្លឹមសារនៃអង្គប្រជុំនោះ លោក អ៊ូ តារា អគ្គលេខាធិការសហព័ន្ធកីឡាគុនល្បុក្កតោកម្ពុជាបានប្រាប់ថា ជំនួបក្នុងអង្គប្រជុំបានត្រួតពិនិត្យបច្ចេកទេស និងកែសម្រួលបទបញ្ជាការប្រកួតកីឡាគុនល្បុក្កតោកម្ពុជា ពិសេសគឺជាការជួបជុំ សួរសុខទុក្ខ ខណៈដែលបងប្អូនគ្រូបង្វឹក និងសាលាគុន ភាគច្រើនលើសលុបមានផលប៉ះពាល់ និងជួបការលំបាកដោយសារឥទ្ធិពលនៃជំងឺកូវីដ ១៩។

លោក អ៊ូ តារា បានបន្ថែមថា៖ «ឯកឧត្តមបណ្ឌិតសភាចារ្យ ច័ន្ទ សារុន បាននាំយកអំណោយមួយចំនួនរបស់សប្បុរសជន ដែលជាផលិតករភាពយន្ត (Surviving Bokator) មកជូនដល់ព្រឹទ្ធាចារ្យគុនល្បុក្កតោ ដែលបានចូលរួមក្នុងភាពយន្តឯកសារមួយនេះកន្លងមក ដោយក្នុងនោះព្រឹទ្ធាចារ្យម្នាក់ៗ ទទួលបានប្រាក់ ២៥០ ដុល្លារ។ បន្ថែមលើនេះ យើងក៏បាននាំយកសម្ភារហ្វឹកហាត់មួយចំនួនទៀត ប្រគល់ឲ្យសាលាគុនល្បុក្កតោមួយចំនួន ដែលត្រូវការចាំបាច់ផងដែរ»។

គួររំឭកថា ភាពយន្តឯកសារ មានចំណងជើងថា ការរស់ឡើងវិញនៃក្បាច់គុនល្បុក្កតោ (SURVIVING BOKATOR) ដែលផលិតដោយផលិតករជនជាតិកាណាសា លោក MarkBochsler និងលោកស្រី Sandra Leuba នេះ បានទទួលជ័យជម្នះក្នុងព្រឹត្តិការណ៍ដ៏ល្បីលំដាប់ពិភពលោក World FIC Challenge ( World Championship of CinemaandTelevisioninsports culture) នៅក្នុងមហោស្រពភាពយន្តមីឡាណូអន្តរជាតិ លើកទី៣៨ ដែលទទួលស្គាល់ជាផ្លូវការ ដោយគណៈកម្មាធិការអូឡាំពិកអន្តរជាតិ (IOC) ដោយសារតែ Surviving Bokator ទទួលបានពាន HONOURARY MENTION ក្នុងវិស័យកីឡា និងសង្គម។

លោក វ៉ាត់ ចំរើន បាននិយាយថា៖ «ក្នុងអាណត្តិ ដែលឯកឧត្តមបណ្ឌិតសភាចារ្យ ច័ន្ទ សារុន ជាប្រធាន និងមានឯកឧត្តម កែវ រ៉េមី ជាទីប្រឹក្សាជាន់ខ្ពស់ គឺសហព័ន្ធកីឡាគុនល្បុក្កតោកម្ពុជា តែងតែគៀងគរបានថវិកា ដើម្បីជំរុញសកម្មភាពកីឡាគុនល្បុក្កតោ ដោយមានថវិកាទ្រទ្រង់បន្ថែមពីលើថវិការបស់ក្រសួងអប់រំ យុវជន និងកីឡា»៕

ព្រឹទ្ធាចារ្យ និងគ្រូបង្វឹកកីឡាល្បុក្កតោ ទទួលបានការលើកទឹកចិត្តពីថ្នាក់ដឹកនាំ

ព័ត៌មានថ្មីៗ

វីដេអូ

ព្រឹទ្ធាចារ្យ និង​គ្រូ​បង្វឹក​កីឡា​ល្បុក្កតោ ទទួល​បានការ​លើក​ទឹក​ចិត្ត​ពីថ្នាក់​ដឹក​នាំ​

កីឡា

ព័ត៌មានថ្មីៗ

វីដេអូ

ព្រឹទ្ធាចារ្យ និងគ្រូបង្វឹកកីឡាល្បុក្កតោ ទទួលបានការលើកទឹកចិត្តពីថ្នាក់ដឹកនាំ