ភ្នំពេញ៖ ក្រុមនិស្សិតមកពីដេប៉ាតឺម៉ង់ខុសៗគ្នា នៅក្នុងសាកលវិទ្យាល័យភូមិន្ទភ្នំពេញបាននិងកំពុងប្រើប្រាស់ទេពកោសល្យ និងជំនាញផ្នែកកីឡា ប្រជែងគ្នានៅក្នុងការប្រកួតបាល់ទាត់ជ្រើសរើសជើងឯកសាកលវិទ្យាល័យភូមិន្ទភ្នំពេញប្រចាំឆ្នាំ ២០២០ ដើម្បីស្វែងរកក្រុមខ្លាំងសម្រាប់លេងតំណាងឲ្យសាកលវិទ្យាល័យមួយនេះ ក្នុងព្រឹត្តិការណ៍ថ្នាក់ជាតិ ឬពានសាកលវិទ្យាល័យ (University Game) ដែលរៀបចំឡើងដោយក្រសួងអប់រំ យុវជន និងកីឡា។
ទាក់ទងនឹងការប្រកួតនេះ លោក សោម រតនា សាកលវិទ្យាធិការរងនៃសាកលវិទ្យាល័យភូមិន្ទភ្នំពេញបានថ្លែងនៅក្នុងពិធីបើកការប្រកួតកាលពីព្រឹកថ្ងៃសៅរ៍ថា៖ «សាកលវិទ្យាល័យ ភូមិន្ទភ្នំពេញ តែងតែរៀបចំឲ្យមានការប្រកួតនេះ ជារៀងរាល់ឆ្នាំដើម្បីជ្រើសរើសយកជើងឯកប្រចាំសាកលវិទ្យាល័យយើង ទៅប្រកួតថ្នាក់ជាតិ (ពានសាកលវិទ្យាល័យ) ជាមួយសាកលវិទ្យាល័យផ្សេងៗទៀត»។
ដោយទទួលបានការឧបត្ថម្ភថ្មីពីក្រុមហ៊ុនចិនចំនួន ២ បន្ថែមទៅលើការជួយជាអចិន្ត្រៃយ៍របស់អគ្គិសនីកម្ពុជានោះ បានធ្វើឲ្យការប្រកួតបាល់ទាត់ជ្រើសរើសជើងឯកសាកលវិទ្យាល័យភូមិន្ទភ្នំពេញឆ្នាំនេះ មានទ្រង់ទ្រាយធំជាងមុន ហើយប្រាក់រង្វាន់ត្រូវបានបង្កើនឡើងទ្វេដង គឺក្រុមលេខ ១ នឹងទទួលបាន ១ ០០០ ដុល្លារ លេខ ២ បាន ៧០០ ដុល្លារ លេខ ៣ បាន ៥០០ ដុល្លារ និងក្រុមលេខ ៤ បាន ៣០០ ដុល្លារ ខណៈការប្រកួតកន្លងមកក្រុមម្ចាស់ជើងឯកបានត្រឹម ៥០០ ដុល្លារប៉ុណ្ណោះ។
ការបង្កើនប្រាក់រង្វាន់នេះ វាជាការផ្តល់កម្លាំងចិត្តបន្ថែមមួយទៀត ទៅដល់ក្រុមទាំង ២០ ដែលមកពីដេប៉ាតឺម៉ង់ខុសៗគ្នា ដែលបានចូលរួមប្រកួតប្រជែងគ្នានៅឆ្នាំនេះ ហើយក្រុមទាំង ២០ នេះ ត្រូវបានចែកការប្រកួតជម្រុះទៅតាមពូលរៀងៗខ្លួន ខណៈព្រឹត្តិការណ៍ដែលមានការប្រកួតរៀងរាល់ថ្ងៃសៅរ៍ និងអាទិត្យនេះ នឹងត្រូវចំណាយពេល ៣ ខែ ទើបរកឃើញក្រុមម្ចាស់ជើងឯក។
លោក សោម រតនា បានបន្តថា៖ «នៅឆ្នាំនេះ ការប្រកួតមានទ្រង់ទ្រាយធំជាងឆ្នាំមុនៗ ហើយជាមួយគ្នានេះ ក្រសួងអប់រំ ក៏ទើបតែចេញលិខិតបង្កាប់ការ និងជំរុញឲ្យសាកលវិទ្យាល័យនីមួយៗ យកចិត្តទុកដាក់ក្នុងការរៀបចំការប្រកួតបាល់ទាត់នេះផងដែរ ដើម្បីត្រៀមលក្ខណៈចូលរួមការប្រកួតថ្នាក់ជាតិ អ៊ីចឹងនេះជាឱកាសមួយទៀត ដែលជាការលើកទឹកចិត្តផង និងជំរុញពួកយើងខ្ញុំផង ឲ្យធ្វើការងារកាន់តែខ្លាំងពាក់ព័ន្ធបាល់ទាត់នេះ ដោយយើងនឹងព្យាយាមធ្វើឲ្យបានល្អជាងមុន»។
លោកបានបន្ថែមថា៖ «ការលេងកីឡាពិតជាសំខាន់ណាស់ ព្រោះក្រៅពីធ្វើឲ្យយើងមានសុខភាព និងមានភាពវាងវៃនោះ គឺការលេងកីឡាវាបង្កើនឲ្យមាននូវភាពអត់ធ្មត់វិន័យ និងបង្កើតឲ្យមានសាមគ្គីភាពរវាងក្រុមនិស្សិតយើង ដែលមកពីដេប៉ាតឺម៉ង់ខុសៗគ្នា។ អ៊ីចឹងនេះជាសាមគ្គីភាពដ៏ល្អ ដែលយើងអាចបង្កើតបាន លើសពីបរិបទត្រឹមថ្នាក់រៀន។ បន្ថែមលើនេះ យើងក៏កំពុងសិក្សាលទ្ធភាពក្នុងការបង្កើតឲ្យមានការប្រកួតបាល់ទាត់នារី បាល់ទះ រត់ប្រណាំង និងប្រភេទកីឡាមួយចំនួនទៀតផងដែរ»។
ចំណែកតំណាងអ្នកឧបត្ថម្ភថ្មី ដែលជាជនជាតិចិន លោក Wang Hai Tao នាយកផែនការរបស់ក្រុមហ៊ុន Morgan និងលោក Yu Zhu (Lucas) ជា CEO របស់មជ្ឈមណ្ឌល CEL Youth Job & Startup Center បានចាត់ទុកការចូលរួមឧបត្ថម្ភដល់ព្រឹត្តិការណ៍ប្រកួតបាល់ទាត់នេះថា ជាការរួមចំណែកអភិវឌ្ឍនៅក្នុងប្រទេស កម្ពុជា។
លោក Wang Hai Tao បានថ្លែងថា៖ «ក្រុមហ៊ុនយើង បានបើកដំណើរការនៅកម្ពុជាបាន ១០ ឆ្នាំហើយ ហើយយើងក៏ចង់ចូលរួមជួយអភិវឌ្ឍនៅកម្ពុជាឲ្យកាន់តែច្រើនផងដែរ ចំណែកការសម្រេចចិត្តចូលរួមឧបត្ថម្ភការប្រកួតបាល់ទាត់នេះ ដោយសារតែភូមិន្ទភ្នំពេញជាសាកលវិទ្យាល័យ ដែលមានភាពល្បីល្បាញជាងគេ ហើយខ្ញុំពិតជាសប្បាយចិត្ត នៅពេលដែលខ្ញុំបានមកដល់ទីនេះ និងបានឃើញពីភាពស្វាហាប់ និងរស់រវើករបស់ក្រុមនិស្សិតចូលរួមទាំងអស់ ហេតុនេះខ្ញុំជឿជាក់ថា ពួកគាត់សុទ្ធតែជាសសរទ្រូង ឬទំពាំងស្នងឫស្សីទៅថ្ងៃអនាគត ដើម្បីចូលរួមអភិវឌ្ឍសេដ្ឋកិច្ចនៅប្រទេស កម្ពុជា»៕