អេលីត ចំរើន បានទាត់ទៅលើកីឡាករថៃ Kev Thab។ រូប យឺន ពន្លក
.jpg)
ភ្នំពេញៈ កីឡាករកម្ពុជា ម៉ន សាម៉េត និង អេលីត ចំរើន សុទ្ធតែបានផ្តួលកីឡាករថៃឲ្យសន្លប់មុនទឹកទី ៥ នៅក្នុងការប្រកួតប្រដាល់គុនខ្មែរដណ្តើមខ្សែក្រវាត់ Khmer Inter Championship(KIC) ដើម្បីមាន ៦ ពិន្ទុស្មើគ្នា។
ទោះបីជាយ៉ាងណា ការប្រជែងឈរក្នុងលំដាប់ចំណាត់ថ្នាក់បណ្តោះអាសន្ននៅក្នុងពូល A របស់កម្ពុជា គឺ ម៉ន សាម៉េត ឈរលើកំពូលតារាង និងតាមប្រកិតពីក្រោយដោយ អេលីត ចំរើន។ ចំណែកពូល B ខាងភាគីថៃ គឺមានតែ Thavat ម្នាក់គត់ ដែលបានឈ្នះ យុគ យក្សផ្លែ ដោយពិន្ទុកាលពីថ្ងៃទី ៤ ខែសីហា ក្នុងលក្ខណៈប្រទាញប្រទង់គ្នាដែរ តែ ៣ នាក់ទៀតមាន Lafan, Kev Thab និង Khav krachang មិនទាន់ឈ្នះនោះទេ។
ស្ថានភាពប្រកួតជាក់ស្តែងនៅសង្វៀន Sky One ទល់មុខសភាជាតិកាលពីល្ងាចថ្ងៃអាទិត្យកន្លងមកនេះ កីឡាករថៃដែលធ្លាប់ឃើញការប្រកួតកន្លងមកល្អនោះគឺលើកនេះសុទ្ធតែចាញ់កីឡាករកម្ពុជា ដោយសន្លប់ទាំង ២ នាក់ដោយក្បាច់ទាត់។ ម៉ន សាម៉េត ដែលព្រួយបារម្ភមុនពេលប្រកួតនោះ គឺពេលប្រកួតបានប្រើស្នៀតទាត់ចូលកណ្តៀតក្អមខាងស្តាំរបស់កីឡាករថៃ Lafan បណ្តាលឲ្យចុករមួលងើបមិនរួច ទោះបីជាលោកអាជ្ញាកណ្តាល សឹង្ហ សារិទ្ធ បានរាប់ដល់ ១០ ក៏ដោយ។
ក្រោយទទួលបានលទ្ធផលឈ្នះក្នុងទឹកទី ៣ នេះ ម៉ន សាម៉េត បាននិយាយថា៖ «លំបាកប្រកួតដែរ ព្រោះកីឡាករថៃរូបនេះ ល្អកែង និងកណ្តាប់ដៃលឿន ហើយថែមទាំងវាយតាមរបៀបទាត់ឆ្ងាយស្រង់យកពិន្ទុ។ តែទោះបីជាយ៉ាងណា ខ្ញុំសម្រេចចិត្តចូលវាយសម្រុកសន្ធាប់បង្ខំឲ្យថៃនោះទាល់ច្រក ហើយក្នុងនោះស្នៀតទាត់របស់ខ្ញុំ បានទាត់ចូលគោលដៅល្អយ៉ាងពេញ គឺធ្វើឲ្យគេចុករមួលមិនអាចបន្តការប្រកួតបាន»។
ម៉ន សាម៉េត បានបន្ថែមថា៖ «សម្រាប់វគ្គជម្រុះសន្សំពិន្ទុនេះ ខ្ញុំសល់ ២ ប្រកួតទៀតក្នុងនោះឧបសគ្គធំ គឺពេលប៉ះប្រកួតជាមួយកីឡាករ Khav krachang នៅថ្ងៃទី ២៥ ខែសីហា ខាងមុខ ព្រោះគេជាកីឡាករពូកែស្នៀតទាត់ រីឯកីឡាករថៃ Thavat នោះ ខ្ញុំគិតថា ជាឧបសគ្គមិនធំទេក្នុងការយកឈ្នះនោះ។ ខ្ញុំមិនហ៊ានអួតទេ ទោះបីជាខ្ញុំបានផ្តួល Lafan ក្នុងទឹកទី ៣ ប៉ុន្តែសមត្ថភាពរបស់គេ ក៏មិនងាយយកឈ្នះដោយស្រួលៗដោយមិនប្តូរពិធីនោះដែរ គឺខ្ញុំប្រើយុទ្ធសាស្ត្រវាយសន្ធាប់ខ្លាំង ហើយទទួលបានផលល្អតែម្តង»។
ស្រដៀងគ្នានេះដែរកីឡាករ អេលីត ចំរើន ដែលបោះជំហានតាមពីក្រោយ ម៉ន សាម៉េត បានប្រកួតស្វិតស្វាញចំនួន ៣ ទឹក ហើយឈានចូលទឹកទី ៤ អេលីត ចំរើន បានប្តូរយុទ្ធវិធីពីប្រើកណ្តាប់ដៃមកទាត់ល្វែងក្រោមរបស់ថៃ Kev Thab បណ្តាលឲ្យថៃម្នាក់នេះរងរបួសធ្ងន់ ដោយខូចជើងស្តាំ ដួលដល់ផ្ទៃសង្វៀន។ អាជ្ញាកណ្តាល សួន ប៊ុនសូត្រ បញ្ឈប់កីឡាករថៃតែម្តងក្រោយពេលរាប់ដល់ ១០ មិនបន្តការប្រកួតបានទៀត។
Kev Thab បានរងរបួសធ្ងន់ត្រូវគ្រាហ៍ចុះពីសង្វៀនតែម្តង។ លោក ថាញ់ វ៉ាឡេក ជាគ្រូបង្វឹកកីឡាករថៃបាននិយាយថា៖ «ស្ថានភាពរបួសជើងរបស់ Kev Thab ធ្ងន់ដោយមានហើមប៉ោងខ្លាំង ហើយមិនទាន់ដឹងយ៉ាងណានៅឡើយទេ សម្រាប់ការត្រៀមប្រកួតលើកទី ៣ នៅ ២ សប្តាហ៍ទៀត»។ គួរបញ្ជាក់ថា ការប្រកួតលើកទី ១ Kev Thab បានចាញ់យ៉ាងគ្រាំគ្រាខ្លួនដោយកណ្តាប់ដៃ និងជង្គង់របស់ ម៉ន សាម៉េត ហើយសប្តាហ៍នេះបន្តចាញ់ អេលីត ចំរើន ដោយមានបញ្ហារបួសជើងថែមទៀត៕
