ការប្រកួតប្រដាល់គុនខ្មែរ នឹងត្រូវបើកឲ្យដំណើរការវិញ ចុងសប្តាហ៍នេះ ក្រោយសម្រាក២សប្តាហ៍។ ណន
.jpg)
ភ្នំពេញ៖ លោកនាយករដ្ឋមន្ត្រី ហ៊ុន សែន បានជំរុញ និងគាំទ្រឲ្យមានការប្រកួតប្រដាល់ឡើងវិញ នៅគ្រប់ស្ថានីយទូរទស្សន៍ក្នុងលក្ខណៈប្រកួត «បិទទ្វារ» មិនឲ្យមានគ្នាលើស ៣០ នាក់ តែមានការផ្សាយផ្ទាល់ ដើម្បីឲ្យប្រជាពលរដ្ឋបានទស្សនាកែការអផ្សុក និងដើម្បីកុំឲ្យប្រទេសយើងស្ងាត់ពេក ក្នុងគ្រាដែលកម្ពុជាកំពុងប្រយុទ្ធប្រឆាំងនឹងជំងឺកូវីដ ១៩។
លោក ហ៊ុន សែន បានថ្លែងក្នុងសន្និសីទកាសែត ស្ដីពីបច្ចុប្បន្នភាពជំងឺកូវីដ ១៩ នៅវិមានសន្ដិភាពកាលពីព្រឹកថ្ងៃអង្គារថា៖ «យើងបញ្ឈប់ក្លិបកម្សាន្ដរាត្រី ខារ៉ាអូខេ ឬការប្រគំតន្ដ្រីតាមទីលានសាធារណៈ ប៉ុន្ដែយើងក៏អនុញ្ញាតឲ្យមានការផ្សាយបន្ដផ្ទាល់កម្មវិធីជាការប្រគំតន្ដ្រី ក៏ដូចជាការប្រកួតកីឡាប្រដាល់ តែគេហៅថាបិទទ្វារ។ បិទទ្វារប្រកួតទៅ កុំឲ្យប្រជាពលរដ្ឋយើងអផ្សុក ព្រោះគាត់ត្រូវការមើលគេសម្ដែង គេប្រគំតន្ដ្រី តាមទូរទស្សន៍នានា គេត្រូវការវ៉ៃបុក គឺមើលប្រដាល់ហ្នឹង»។
គួរបញ្ជាក់ថា ព្រឹត្តិការណ៍ប្រដាល់នៅតាមសង្វៀនទាំងអស់ត្រូវបានផ្អាក ឬពន្យារការប្រកួត ២ សប្តាហ៍មកហើយ ហើយអ្វីដែលពិសេសនោះ គឺកាលពីសប្តាហ៍មុន សង្វៀនប្រដាល់នៅតាមស្ថានីយចំនួន ៥ មានបាយ័ន CNC អាស៊ីអាគ្នេយ៍ PNN និងថោន បានរៀបចំផ្គូផ្គងកីឡាករសម្រាប់ប្រកួតរួចអស់ហើយ ប៉ុន្តែត្រូវបានសហព័ន្ធកីឡាប្រដាល់កម្ពុជា សម្រេចឲ្យផ្អាកការប្រកួតវិញភ្លាមៗ។
ទាក់ទងនឹងបញ្ហានេះ លោក ហ៊ុន សែន បានសង្កត់ធ្ងន់ថា៖ «តាមពិតយើងអត់បានហាមឃាត់ប្រដាល់ទេ ប៉ុន្ដែលោក តែម ម៉ឺន ប្រធានសហព័ន្ធកីឡា ប្រដាល់គាត់សម្រេចធ្វើអាហ្នឹង។ ក៏ប៉ុន្ដែវាអត់មានមនុស្សច្រើនទេ ដូចថាវ៉ៃ ៥ គូ មនុស្ស ១០ នាក់ ហើយមុននឹងវ៉ៃ អ្នកមានកូវីដ គេមិនឲ្យទៅវ៉ៃទេ កុំឆ្ងល់ពេក។ អ្នកឲ្យទឹក ពេទ្យ ចៅក្រម តែប៉ុន្មាននាក់ យើងថា អស់ហើយ ៣០ នាក់»។
លោកនាយករដ្ឋមន្រ្តីបានបន្ថែមថា៖ «យើងឲ្យគាត់អង្គុយឃ្លាតពីគ្នាទៅ រួចហើយផ្សាយបន្ដផ្ទាល់ឲ្យប្រជាពលរដ្ឋរបស់យើង គាត់មើលពីផ្ទះត្រឡប់មកវិញ កុំឲ្យប្រទេសយើងស្ងាត់ពេក គេថា ស្ងាត់ដូចចោរលួចសេះ។ យើងមិនទាន់ដល់កម្រិតប៉ុណ្ណឹងទេ តែយើងមិនបណ្ដែតបណ្ដោយឲ្យមានការប្រមូលផ្ដុំ ទៅមើលការប្រគំតន្ដ្រី និងការវ៉ៃបុកនោះទេ ព្រោះនៅប្រទេស ថៃ គេរកឃើញកន្លែងឆ្លងមេរោគនេះច្រើនជាងគេ ចេញពីកន្លែងវ៉ៃបុកហ្នឹង អ៊ីចឹងយើងក៏ត្រូវដកពិសោធផងដែរ»។
នៅក្រៅការប្រកាសពីប្រមុខដឹកនាំប្រទេសនេះ លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ ក៏បានចេញសេចក្តីជូនដំណឹងមួយ កាលពីរសៀលថ្ងៃអង្គារ ដើម្បីប្រាប់ឲ្យគ្រប់ស្ថានីយ និងដៃគូអភិវឌ្ឍទាំងអស់រៀបចំឲ្យមានការប្រកួតប្រដាល់គុនខ្មែរឡើងវិញនៅសប្តាហ៍នេះផងដែរ។
លោក តែម ម៉ឺន បានប្រាប់កាលពីថ្ងៃអង្គារថា៖ «សហព័ន្ធ មន្ត្រីបច្ចេកទេស និងកីឡាករ បានត្រៀមខ្លួនដើម្បីប្រកួតឡើងវិញ តាមការអនុញ្ញាតដ៏ខ្ពង់ខ្ពស់របស់សម្តេច ហ៊ុន សែន ដោយយើងកាត់បន្ថយចំនួនមនុស្សមិនឲ្យលើសពី ៣០ នាក់ ហើយគិតត្រឹមល្ងាចថ្ងៃអង្គារ មានស្ថានីយទូរទស្សន៍ CNC បាយ័ន និងថោន បានបើកទាន់ក្នុងសប្តាហ៍នេះ ចំណែកសង្វៀនប៉ុស្តិ៍លេខ ៥ អាស៊ីអាគ្នេយ៍ និងសង្វៀន PNN សុំពេលវេលា ដើម្បីពិភាក្សាជាមួយថ្នាក់ដឹកនាំ និងដៃគូពាណិជ្ជកម្ម និងកីឡាករមួយចំនួនទៀត ព្រោះខ្លាចរៀបចំមិនទាន់ពេល អ៊ីចឹងយើងនឹងមានត្រៀមដំណើរការជាបន្តបន្ទាប់ទៅតាមសភាពជាក់ស្តែង»៕
