ការប្រកួតធ្វើតេស្តទៅលើក្រុមជម្រើសជាតិតេក្វាន់ដូអាយធីអែហ្វកាលពីថ្ងៃសុក្រ។ ណន
.jpg)
ភ្នំពេញ: សហព័ន្ធកីឡាតេក្វាន់ដូអាយធីអែហ្វកម្ពុជាបានធ្វើការប្រឡងដំឡើងខ្សែក្រវាត់យកកម្រិតដាន់ទៅតាមក្រឹត្យក្រមនៃច្បាប់របស់សហព័ន្ធកីឡាតេក្វាន់អន្តរជាតិយ៉ាងច្បាស់លាស់ ព្រោះលោក កែវ រ៉េមី ជាប្រធានសហព័ន្ធ បានបញ្ជាក់ថា៖ «កីឡាតេក្វាន់ដូអាយធីអែហ្វគ្មានខ្សែក្រវាត់កិត្តិយស» នោះទេ។
លោក កែវ រ៉េមី ប្រធានសហព័ន្ធកីឡាតេក្វាន់ដូអាយធីអែហ្វកម្ពុជាបានថ្លែងក្រោយកម្មវិធីប្រឡងដំឡើងខ្សែក្រវាត់ដែលត្រូវបានធ្វើឡើងនៅមជ្ឈមណ្ឌលជាតិហ្វឹកហ្វឺនកីឡាកាលពីថ្ងៃសុក្រថា៖ «ជានយោបាយរបស់សហព័ន្ធកីឡាតេក្វាន់ដូអាយធីអែហ្វកម្ពុជាគឺមិនអនុញ្ញាតការផ្តល់ជាខ្សែក្រវាត់កិត្តិយសនោះទេ»។
លោកបានបន្ថែមថា៖ «ខ្សែក្រវាត់ដែលទទួលបានត្រូវតែជាខ្សែក្រវាត់ពិតប្រាកដ ហេតុនេះយើងត្រូវតែឲ្យពួកគាត់បង្ហាញសមត្ថភាពនៅក្នុងលក្ខណៈណាមួយ។ យើងមិនបង្ខំគាត់ទេ ព្រោះថ្នាក់ដឹកនាំមានកាយសម្បទាប្រែប្រួលគឺចាស់ហើយ មិនដូចក្មេងទេ តែយ៉ាងហោចណាស់ក៏ឲ្យគាត់ធ្វើអ្វីមួយដែរ»។
នៅក្នុងការប្រឡងខ្សែក្រវាត់កាលពីថ្ងៃសុក្រនោះគឺមានការប្រឡងពីខ្សែក្រវាត់កម្រិត Gup ឡើងទៅជាកម្រិត ១ ដាន់ចំនួន ១១ នាក់ពីកម្រិត ១ ដាន់ទៅ ២ ដាន់ចំនួន ១៣ នាក់ដំឡើងពីកម្រិត ២ ដាន់ទៅ ៣ ដាន់មាន ៦ នាក់ពី ៣ ដាន់ទៅ ៤ ដាន់ចំនួន ៣ នាក់ និងពីកម្រិត ៤ ដាន់ទៅ ៥ ដាន់មានតែ ១ នាក់ទេ គឺកីឡាករ ប៉ាល់ ជីវ័ន ហើយនៅក្នុងការប្រឡងខ្សែក្រវាត់នោះក៏មានថ្នាក់ដឹកនាំ មានងារជា «ឯកឧត្តម» ចំនួន ៤ នាក់ចូលរួមប្រឡងដំឡើងខ្សែក្រវាត់ពីកម្រិត ១ ដាន់ និង ២ ដាន់ដើម្បីយកកម្រិត ២ ដាន់ និង ៣ ដាន់ផងដែរ។
ការប្រកួតធ្វើតេស្តដល់ថ្នាក់ដឹកនាំតេក្វាន់ដូ ITF ដើម្បីដំឡើងខ្សែក្រវាត់ដាន់អន្តរជាតិ។ ណន
ជាមួយនឹងការរៀបចំឲ្យមានការប្រឡងយកខ្សែក្រវាត់កម្រិតដាន់អន្តរជាតិនេះ លោក កែវ រ៉េមី ក៏មានទស្សនៈវែងឆ្ងាយ ដើម្បីឈានទៅបណ្តុះបណ្តាលធនធានអាជ្ញាកណ្តាលចៅក្រមអន្តរជាតិផងដែរ ដើម្បីធ្វើឲ្យតេក្វាន់ដូអាយធីអែហ្វកម្ពុជាកាន់តែមានភាពកក់ក្តៅក្នុងការប្រកួតប្រជែងរកមេដាយ ទាំងក្នុងការប្រកួតកម្រិតអាស៊ាន អាស៊ី និងពិភពលោក។
លោក កែវ រ៉េមី បានថ្លែងថា៖ «ការរៀបចំឲ្យប្រឡងដំឡើងខ្សែក្រវាត់នៅពេលនេះទី ១ អត្តពលិក និងថ្នាក់ដឹកនាំរបស់យើងទទួលបានកម្រិតខ្សែក្រវាត់ដាន់ វាយូរសមល្មមគ្រប់គ្រាន់ ដើម្បីដំឡើងដាន់ដល់គាត់បន្ថែមទៀតហើយ ហើយអ្វីដែលជាទស្សនវែងឆ្ងាយរបស់ខ្ញុំគឺដើម្បីអាចបង្ហាត់បង្រៀនបាននៅតាមសាលាគុនផ្សេងៗយ៉ាងហោចណាស់ក៏មាន ៤ ដាន់ដែរ»។
លោក កែវ រ៉េមី ដែលជាប្រធានគណៈកម្មាធិការសិទ្ធិមនុស្សផងនោះបានបន្ថែមថា៖ «ម្យ៉ាងទៀតយើងនឹងជំរុញឲ្យកម្ពុជាចូលទៅក្នុងអាជ្ញាកណ្តាលចៅក្រមអន្តរជាតិ ហើយអាជ្ញាកណ្តាលចៅក្រមអន្តរជាតិត្រូវមានដាន់ខ្ពស់ ព្រោះកាលណាថ្នាក់ដឹកនាំរបស់យើងបញ្ជ្រាបចូលទៅក្នុងរចនាសម្ព័ន្ធនៃការដឹកនាំរបស់អាស៊ី អាស៊ាន និងពិភពលោកហើយ យើងក៏ត្រូវការដៃជើងរបស់យើងជាអាជ្ញាកណ្តាល ចៅក្រម ដើម្បីចូលរួមនៅក្នុងការប្រកួតជាលក្ខណៈតំបន់អាស៊ី ឬពិភពលោកផងដែរ ព្រោះបើអត់មានចៅក្រមយើង គឺមានតែចៅក្រមគេនឹងពិបាកហើយ»។
ជាមួយគ្នានោះសហព័ន្ធកីឡាតេក្វាន់ដូអាយធីអែហ្វកម្ពុជាក៏បានធ្វើតេស្តដល់ក្រុមជម្រើសជាតិផងដែរ។ លោក កែវ រ៉ាមី បានថ្លែងថា៖ «យើងបានធ្វើតេស្តក្រុមធំជម្រើសជាតិរបស់យើង ព្រោះយើងមិនអនុញ្ញាតឲ្យអ្នកជាប់ជម្រើសជាតិហើយ ហើយស្វ័យប្រវត្តិចេះតែជាប់បន្តទៀតទេ អ៊ីចឹងយើងត្រូវតែធ្វើតេស្ត ហើយបើកផ្លូវឲ្យអ្នកផ្សេងចូលរួមប្រកួតប្រជែងផងដែរ»៕
