លោក គីម ភក្តី ត្រូវបានកូនក្រុម ចាប់បោះឡើងលើ ក្រោយពិធីលើកពានលីគកំពូលកម្ពុជា ឆ្នាំ២០២០។ CNCC
.jpg)
ភ្នំពេញ៖ បើទោះបីជា លោក គីម ភក្តី ទើបបានដឹកនាំក្រុមបឹងកេតឱ្យឈ្នះពានលីគកំពូលកម្ពុជា ឆ្នាំ ២០២០ ជាមួយលទ្ធផលដ៏ល្អបំផុតក្ដី ប៉ុន្តែគ្រូបង្វឹករូបនេះ បានមើលឃើញថា ការប្រកួតរដូវកាលថ្មីឆ្នាំ ២០២១ ខាងមុខនេះ ក្រុមបឹងកេតអាចនឹងត្រូវធ្វើការងារកាន់តែខ្លាំង ដើម្បីប្រកួតប្រជែងជាមួយក្លិបធំៗ ដែលមានគ្រូបង្វឹកបរទេស និងមានសញ្ញាបត្រខ្ពស់ ដោយលោកបានប្រៀបប្រដូចចំពោះការត្រៀមខ្លួននេះថា បើក្លិបគេដើរ គឺក្លិបបឹងកេត ត្រូវតែរត់ហើយ ទើបតាមគេទាន់។
ក្នុងបទសម្ភាសរយៈពេលជាង ២ នាទី ហើយត្រូវបានបង្ហោះនៅលើផេចហ្វេសប៊ុកក្លិបបឹងកេត កាលពីថ្ងៃអង្គារ ម្សិលមិញនេះ លោក គីម ភក្តី បានបង្ហាញពីការប្រកួត ដែលលោកពេញចិត្តខ្លាំង និងផែនការ ដែលលោកកំពុងធ្វើ នឹងត្រូវធ្វើសម្រាប់ពង្រឹងគុណភាពលេងរបស់ក្រុមបឹងកេត នៅរដូវកាលថ្មីឆ្នាំ ២០២១។
លោក គីម ភក្តី បាននិយាយថា៖ «យើងបានដឹងហើយថា លីគកំពូលកម្ពុជារបស់យើងបានបញ្ចប់ ដោយក្រុមបឹងកេតបានទទួលពានរង្វាន់ ហើយការប្រកួតចុងក្រោយដ៏តានតឹងជាមួយក្រុមភ្នំពេញក្រោន ជាការប្រកួតដែលបានបញ្ចប់ទៅ ដោយយើងមានការរំភើប។ ចំណែកការប្រកួតដែលខ្ញុំពេញចិត្តជាងគេ គឺការប្រកួតជាមួយក្រុមណាហ្គាវើល នៅជើងទី២ ដែលពេលនោះ ខ្ញុំបានឃើញពីស្មារតីយកចិត្តទុកដាក់ និងប្រឹងប្រែងរបស់កីឡាករទាំងអស់»។
គួររំឭកថា សម្រាប់ការប្រកួតលីគកំពូលកម្ពុជា ឆ្នាំ ២០២០ នេះ ក្រុមបឹងកេតដែលដឹកនាំដោយគ្រូបង្វឹកបណ្តោះអាសន្នលោក គីម ភក្តី បានបញ្ចប់ការប្រកួតទាំង ១៧ លើក ដោយមិនស្គាល់ការចាញ់សោះ គឺឈ្នះ ១២ និងស្មើ ៥ ដង មាន ៤១ ពិន្ទុ ដោយក្នុងនោះ សម្រាប់ការប្រកួតទាំង ៥ លើក ក្នុងជើងទី២ រវាងក្រុម Top6 បឹងកេតបានស្មើ ក្រុមស្វាយរៀង ១-១ ឈ្នះក្រុមវិសាខា ៣-២ ស្មើក្រុមណាហ្គាវើល ១-១ ឈ្នះក្រុមទ័ព ២-០ និងស្មើក្រុមភ្នំពេញក្រោន ១-១ នៅថ្ងៃបិទរដូវកាល។
ដោយឡែក ចំពោះផែនការដែលត្រូវត្រៀមសម្រាប់ការប្រកួតរដូវកាលថ្មី ឆ្នាំ ២០២១ ម្ចាស់ពានរង្វាន់គ្រូបង្វឹកល្អប្រចាំឆ្នាំ ២០២០ លោក គីម ភក្តី បាននិយាយថា៖ «ខ្ញុំបានរៀបចំ និងសម្លឹងមើលកីឡាករ ហើយនៅក្នុងពេលសម្រាកនេះ ខ្ញុំបានមើលនូវរាល់វីដេអូ ដែលយើងបានលេងកន្លងមក ដើម្បីលម្អិតរាល់កីឡាករម្នាក់ៗ ថាតើគាត់នៅមានចំណុចខ្វះខាតអី ដើម្បីយើងត្រៀមអភិវឌ្ឍគាត់ក្នុងការត្រៀមរដូវកាលថ្មីនេះ។
ជាមួយគ្នានេះ លោក គីម ភក្តី ដែលទើបត្រូវបានតែងតាំងជាគ្រូបង្គោលពេញរបស់បឹងកេត ក៏នឹងផ្លាស់ប្តូរកីឡាករបរទេសមួយចំនួនផងដែរ។ «យើងក៏មានការផ្លាស់ប្តូរកីឡាករបរទេសមួយចំនួនដែរ ដើម្បីមកជួយក្រុមនៅរដូវកាលថ្មីនេះ ប៉ុន្តែយើងនៅមិនទាន់ច្បាស់ថា កីឡាកររូបណាដែលត្រូវចាកចេញ ហើយកីឡាកររូបណា ដែលយើងត្រូវផ្លាស់ប្តូរនោះទេ។ តែទោះបីជាយ៉ាងណា យើងនឹងជ្រើសរើសយកកីឡាករណា ដែលលេងត្រូវជាមួយរបៀបលេងរបស់ក្រុមយើងនៅឆ្នាំក្រោយនេះ»។
យ៉ាងណាក៏ដោយ លោក ភក្តី បានគិតទុកជាមុនថា ការប្រកួតរដូវកាលថ្មីនេះ បឹងកេតអាចរត់តាមក្លិបធំៗ ដែលមានគ្រូបង្វឹកបរទេស មានសញ្ញាបត្រខ្ពស់។ លោកបញ្ជាក់ថា៖ «យើងឃើញថា មានការកែប្រែរបស់ក្លិបធំៗមួយចំនួន ដែលមានគ្រូបង្វឹកល្អៗ និងជាគ្រូមានសញ្ញាបត្រកម្រិតខ្ពស់មកពីបរទេស ដើម្បីចូលរួមប្រកួតប្រជែងនៅក្នុងលីគកំពូលកម្ពុជា ចំណែកក្លិបបឹងកេត របស់យើងប្រើសុទ្ធតែធនធានគ្រូក្នុងស្រុក ដូច្នេះមានន័យថា គេដើរ យើងត្រូវតែរត់ហើយ។ តែទោះបីជាយ៉ាងណា ពួកយើងទាំងអស់គ្នា នឹងយកបទពិសោធ ដែលមានទាំងអស់ មកខំប្រឹងប្រកួតប្រជែងជាមួយគេ»៕
