លោក ហ៊ុន សែន ពេលសំណេះសំណាលជាមួយប្រតិភូកីឡាកម្ពុជា នៅវិមានសន្តិភាព កាលពីល្ងាចថ្ងៃចន្ទ។ រូបថត សហការី
.jpg)
ភ្នំពេញ៖ លោកនាយករដ្ឋមន្រ្តី ហ៊ុន សែន បានក្រើនរំឭកជាថ្មី ទៅដល់ក្រុមអត្តពលិក ព្រមទាំងប្រតិភូកីឡាកម្ពុជា ដែលនឹងត្រូវធ្វើដំណើរទៅចូលរួមការប្រកួតស៊ីហ្គេម លើកទី ៣០ នៅប្រទេស ហ្វីលីពីន នាថ្ងៃទី ៣០ ខែវិច្ឆិកា ដល់ថ្ងៃទី ១១ ខែ ធ្នូ ឆ្នាំ ២០១៩ ខាងមុខនេះ ថាត្រូវការពារតម្លៃជាតិ និងកុំឲ្យការចង់ឈ្នះរបស់យើង ក្លាយទៅជាភាពអាម៉ាស់សម្រាប់ជាតិ និងប្រជាជនកម្ពុជា។
លោក ហ៊ុន សែន បានថ្លែងថា៖ «កីឡាបានក្លាយជាចលនារបស់ជាតិដ៏ធំ ដែលយើងអាចសង្កេតឃើញ ទៅតាមរយៈការប្រកួតម្តងៗ គឺមានការចូលរួមច្រើនពីសំណាក់ប្រជាជន យុវជន និងយុវនារី ពិសេសនៅពេលប្រកួតខ្នាតអន្តរជាតិ ទៅលើបាល់ទាត់ គឺមានអ្នកចូលរួមគាំទ្រច្រើនកុះករ ខុសពីមុនៗ ដែលមានចំនួនតិចតួចណាស់ ស្ទើរតែអ្នកកីឡា និងគ្រូបង្វឹក ច្រើនជាងអ្នកលើកទឹកចិត្តផង»។
យ៉ាងណាក៏ដោយ ជុំវិញការត្រៀមចេញទៅប្រកួតស៊ីហ្គេម លើកនេះ លោកនាយករដ្ឋមន្រ្តីបាននិយាយសង្កត់ធ្ងន់ថា៖ «ការឈ្នះចាញ់ គឺជារឿងធម្មតានៃវិស័យកីឡា អ៊ីចឹងយើងព្យាយាមយ៉ាងណា កុំឲ្យការចង់ឈ្នះរបស់យើង ក្លាយទៅជាភាពអាម៉ាស់សម្រាប់ជាតិ និងប្រជាជនកម្ពុជា»។
ការលើកឡើងរបស់លោកនាយករដ្ឋមន្រ្តីត្រូវបានធ្វើឡើង នៅពេលលោកបានជួបសំណេះសំណាលជាមួយថ្នាក់ដឹកនាំ ប្រតិភូ គ្រូបង្វឹក អត្តពលិក និងមន្ត្រីកីឡា ដែលត្រៀមទៅប្រកួតស៊ីហ្គេមចំនួន ៤៤៧ នាក់ នៅវិមានសន្តិភាព កាលពីល្ងាចថ្ងៃចន្ទ ហើយអ្នកទាំងនេះ ត្រូវបានលោក ហ៊ុន សែន ផ្តល់ថវិកាលើកទឹកចិត្តក្នុងម្នាក់ ៥០០ ដុល្លារដូចគ្នា ប៉ុន្តែលោកក៏បានគូសបង្ហាញពីចំណុចមិនល្អ ដែលក្រុមអត្តពលិកកម្ពុជាត្រូវចៀសវាងឲ្យខាងតែបានផងដែរ។
លោក ហ៊ុន សែន បានថ្លែងបន្ថែមថា៖ «ចំណុចដែលត្រូវចៀសវាង គឺទី ១ ត្រូវគោរពនូវបទដ្ឋានកីឡា កុំបំពានបទដ្ឋាន និងក្រឹត្យក្រមកីឡា ហើយនេះជាចំណុច ដែលយើងត្រូវចងចាំ កុំឲ្យមានភាសាណាមួយនិយាយថា ពួកខ្មែរនេះប្រកួតអាក្រក់ណាស់ និងកាច ហើយទី ២ កុំប្រើសារធាតុណា ដែលគេហាមឃាត់ ព្រោះវាជារឿងខុស ហើយវាធ្វើឲ្យខូចមុខមាត់ប្រទេស គឺវាមិនមែនខូចមុខមាត់តែកីឡាករ ឬកីឡាការិនី ដែលត្រូវបានគេរកឃើញថា បានប្រើសារធាតុហាមឃាត់នោះទេ»។
យ៉ាងណាក៏ដោយ លោក ហ៊ុន សែន បានបញ្ជាក់ប្រាប់ទៅមន្រ្តីជំនាញដឹកនាំការប្រកួតថា៖ «យើងក៏ត្រូវតែមើល ទៅលើការចោទប្រកាន់របស់គេដែរ មិនមែនគេចោទប្រកាន់ ហើយយើងចេះតែទទួលយកដោយមិនស្វែងរកការស្រាវជ្រាវឲ្យបានពិតប្រាកដនោះទេ ព្រោះវានឹងខូចឈ្មោះប្រទេសជាតិយើងផង និងខូចឈ្មោះកីឡាករ កីឡាការិនីយើងផង។ តម្លៃជាតិរបស់យើង ត្រូវតែការពារតាមរយៈសកម្មភាពកីឡា ហើយត្រូវធ្វើការប្រាស្រ័យទាក់ទងជាមួយអត្តពលិកមកពីបណ្តាប្រទេសផ្សេងៗឲ្យបានល្អ ទោះចាញ់ក៏ដោយ ឈ្នះក៏ដោយ»។
សម្រាប់ការប្រកួតស៊ីហ្គេម នៅប្រទេស ហ្វីលីពីន ខាងមុខនេះ កម្ពុជានឹងបញ្ជូនអត្តពលិកចំនួន ២៥៩ នាក់ លើ ៣០ ប្រភេទកីឡា ទៅចូលរួមប្រកួត ហើយកីឡាទាំង ៣០ ប្រភេទនោះមានតេក្វាន់ដូ WTF, ប៉េតង់, ជឺជិតស៊ូ, ប្រដាល់គុនខ្មែរ, សីដក់, ប្រដាល់សកល, វាយកូនបាល់, ចំបាប់, ល្បុក្កតោ, បាល់ទះលើក្តារ បាល់ទះឆ្នេរខ្សាច់, បាល់ទាត់ U22, បាល់បោះ, អត្តពលកម្ម ហែលទឹក កាយសម្ព័ន្ធ វាយកូនឃ្លីលើតុ វាយសី វាយកូនគោល គុនដាវ ប្រណាំងកង់ ទូកក្តោង ការ៉ាតេ យូដូ ទ្រីយ៉ាត្លុង កីឡារាំ ទូកប្រពៃណីកានូ សូហ្វតិន្នីស, កីឡាអេឡិចត្រូនិក និងហុកគី៕
