ក្រុងឡុងដ៍៖ លោក Mauricio Pochettino បាននិយាយថា គាត់ចង់ធ្វើការនៅក្របខ័ណ្ឌអង់គ្លេស Premier League ម្ដងទៀត ខណៈដែលអតីតគ្រូបង្វឹកក្លិប Tottenham រូបនេះ កំពុងបន្តមានទំនាក់ទំនងជាមួយក្រុម Man Utd។
លោក Pochettino បានដឹកនាំក្រុម Tottenham ឡើងទៅដល់វគ្គផ្ដាច់ព្រ័ត្រ Champions League កាលពីរដូវកាលមុន ប៉ុន្តែត្រូវបានបណ្ដេញចេញកាលពីខែវិច្ឆិកា ហើយគាត់ត្រូវបានជំនួសដោយលោក Jose Mourinho។
ក្លិប Barcelona បានក្លាយជាគោលដៅដែលអាចមានសម្រាប់លោក Pochettino រហូតដល់ម្ចាស់ជើងឯក LaLiga នេះបានងាកទៅយកលោក Quique Setien ប៉ុន្តែទោះយ៉ាងណា ទំនាក់ទំនងជាមួយក្លិប Man Utd ហាក់មិនទាន់ស្ងប់ស្ងាត់នៅឡើយទេ។
លោក Pochettino ត្រូវបានគេរបាយការណ៍ថា បានចាប់អារម្មណ៍នឹងការងារនៅក្លិប Man Utd ស្របពេលដែលលោក Ole Gunnar Solskjaer កំពុងតស៊ូនៅកីឡដ្ឋាន Old Trafford ជាទីដែលក្រុមបិសាចក្រហមនេះ កំពុងឈរនៅចំណាត់ថ្នាក់ទី ៨ ដោយតាមពីក្រោយ ៦ ពិន្ទុ នៃក្រុមដែលឈរនៅកំពូលទាំង ៤។
លោក Pochettino បាននិយាយតាមប្រព័ន្ធ In The Pink ថា៖ «និយាយដោយស្មោះត្រង់ទៅ ខ្ញុំចង់ធ្វើការនៅក្របខ័ណ្ឌ Premier League»។
គ្រូបង្វឹករូបនេះបានបន្ថែមថា៖ «ខ្ញុំដឹងថា វានឹងមានការលំបាក ហើយឥឡូវនេះវាដល់ពេលដែលត្រូវរង់ចាំសិន ហើយយើងនឹងឃើញមានអ្វីកើតឡើងនៅពេលខាងមុខ»។
លោក Pochettino បានបន្ថែមទៀតថា៖ «វាជាពេលវេលាត្រូវសម្រាកយកកម្លាំង គិតពីខ្លួនឯងបន្តិច និងត្រៀមខ្លួនជាស្រេចព្រោះនៅក្នុងបាល់ទាត់តែងតែមានអ្វីកើតឡើង ហើយអ្នកត្រូវតែត្រៀមខ្លួនជាមុន»។
គ្រូបង្វឹកសញ្ជាតិអាហ្សង់ទីនរូបនេះបានបន្តថា៖ «ខ្ញុំបានត្រៀមខ្លួនរួចជាស្រេចដើម្បីរង់ចាំបទពិសោធថ្មីមួយ។ ខ្ញុំមានជំនឿចិត្តថា បទពិសោធថ្មីនឹងពិតជាអស្ចារ្យណាស់»។
លោក Pochettino បានបន្ថែមថា៖ «ខ្ញុំធ្លាប់នៅប្រទេស អាហ្សង់ទីន នៅប្រទេស កាតា នៅប្រទេស អេស្ប៉ាញ ហើយខ្ញុំក៏ធ្លាប់មាន Jesus (Perez) ជាគ្រូជំនួយរបស់ខ្ញុំនៅក្លិប Spurs ដែលកំពុងតាមដានព័ត៌មានខ្លះៗផងដែរ ប៉ុន្តែខ្ញុំកត់សម្គាល់ចំពោះពាក្យចចាមអារ៉ាមនេះ»។
គ្រូបង្វឹកវ័យ ៤៧ ឆ្នាំរូបនេះបានបន្តថា៖ «បុគ្គលិកជាគ្រូបង្គោលទាំងអស់ទទួលស្គាល់ថា មានពាក្យចចាមអារ៉ាម។ យើងនឹងដោះស្រាយជាមួយពាក្យចចាមអារ៉ាមតាមបែបធម្មជាតិ»។
បុរសអាហ្សង់ទីនរូបនេះបានបន្តទៀតថា៖ «មនុស្សទូទៅត្រូវការធម្មជាតិ និងមនុស្សសាមញ្ញ ហើយយើងមិននិយាយថា យើងខុសប្លែកពីគេនោះទេ ប៉ុន្តែយើងមិនមែនជាអ្នកសម្ដែង ហើយយើងក៏មិនធ្វើអ្វីដែលយើងមិនជឿនោះដែរ»។
លោក Pochettino បានបន្ថែមដែរថា៖ «ប្រសិនបើយើងទៅតំបន់អឺរ៉ុប គឺយើងនឹងបាត់បង់ឱកាសនៅប្រទេស អង់គ្លេស ហើយ»៕ AFP/SN