ខ្សែប្រយុទ្ធ Messi បានស៊ុតបាល់បញ្ចូលទី នៅពេល Barcelona ជួបក្រុម Valencia ក្នុងពាន King's Cup 2019។ រូបថត AFP
.jpg)
ក្រុងម៉ា្រឌីដ៖ លោក Ernesto Valverde ជឿថា ពាក្យសម្ដីរបស់កីឡាករ Lionel Messi ពីអនាគតរបស់រូបគេនៅក្លិប Barcelona មិនជាអ្វីមួយធំដុំនោះទេ ដោយលោកបានអះអាងថា គ្មានការសង្ស័យពីការប្ដេជ្ញាចិត្តរបស់ខ្សែប្រយុទ្ធអាហ្សង់ទីនរូបនេះទេ។
ក្នុងបទសម្ភាសជាមួយ SPORT ដែលផ្សាយនៅសប្ដាហ៍នេះ កីឡាករ Messi ដែលមិនបានបង្ហាញខ្លួនក្នុងការប្រកួតមួយចំនួននោះបាននិយាយថា រូបគេគ្មានបំណងនឹងចាកចេញពីក្លិបនេះទេ បើទោះជាការប្ដេជ្ញាចិត្តរបស់រូបគេ បានកើតឡើងក្នុងស្ថានភាពនៃជោគជ័យជាបន្តបន្ទាប់ក៏ដោយ។
កីឡាករ Messi បានចុះកុងត្រារយៈពេល ៤ ឆ្នាំ នៅឆ្នាំ ២០១៧ ប៉ុន្តែកុងត្រានេះបានរួមបញ្ចូលទាំងខមាត្រាមួយ ដែលអនុញ្ញាតឲ្យរូបគេមានជម្រើសចាកចេញ ក្នុងការដោះដូរ ដោយគ្មានតម្លៃខ្លួន នៅចុងរដូវកាលនីមួយៗផងដែរ។ ទោះយ៉ាងណាក៏ដោយ លោក Valverde បាននិយាយថា ពាក្យសម្ដីរបស់កីឡាករ Messi ត្រូវបានគេបកស្រាយមិនត្រឹមត្រូវ បើទោះជាគ្រូបង្វឹករូបនេះបានទទួលស្គាល់ថា គាត់មិនអាចគ្រប់គ្រងអ្វីដែលកីឡាករបាននិយាយតាមប្រព័ន្ធផ្សព្វផ្សាយក៏ដោយ។
នៅពេលត្រូវបានសួរថា តើពាក្យសម្ដីរបស់កីឡាករ Messi បានបង្ហាញពីបញ្ហារវាងតារាបាល់ទាត់រូបនេះ និងថ្នាក់គ្រប់គ្រងក្លិប Barcelona ឬក៏យ៉ាងណានោះលោក Valverde បានឆ្លើយតបនៅក្នុងសន្និសីទកាសែតថា៖ «ខ្ញុំមិនចង់យល់ឲ្យស៊ីជម្រៅពីពាក្យសម្ដីនេះទេ ហើយខ្ញុំដឹងពីអ្វីដែលកីឡាករ Messi ត្រូវនិយាយ។ គាត់បាននិយាយពីខ្លួនគាត់ជាធម្មតា ប៉ុន្តែមនុស្សមួយចំនួនមានបំណងបកស្រាយពីអ្វីដែលគាត់បាននិយាយ មិនត្រឹមត្រូវទៅវិញ»។
គ្រូបង្វឹករបស់ក្លិប Barcelona រូបនេះបានបន្តទៀតថា៖ «អ្វីដែលគាត់និយាយបានធ្វើឲ្យមនុស្សព្យាយាមគិតស៊ីជម្រៅខ្លាំងពេកពីពាក្យសម្ដីរបស់គាត់។ ខ្ញុំគិតថា គាត់កំពុងព្យាយាមបង្ហាញរឿងរ៉ាវធម្មតា ហើយខ្ញុំមិនគិតថា មានអ្វីគួរឲ្យព្រួយបារម្ភនោះទេ»។
លោក Valverde បានបន្ថែមទៀតថា៖ «ខ្ញុំមិនគិតថា មានចំណុចសង្ស័យពាក់ព័ន្ធនឹងអនាគតរបស់គាត់ទេ ព្រោះមានតែក្លិបទេ ជាអ្នកសម្រេចថា តើកីឡាករនឹងត្រូវរក្សាទុក និងមួយណាដែលត្រូវដកចេញ? ប៉ុន្តែជាការពិតខ្ញុំគ្មានកង្វល់ពីបញ្ហានេះទេ»។
កីឡាករ Messi ត្រូវគេរំពឹងថា នឹងជាសះស្បើយពីការរងរបួសកំភួនជើង និងអាចចូលរួមការប្រកួតនៅពេលខាងមុខនេះ ប៉ុន្តែលោក Valverde ព្រួយបារម្ភថា របួសរបស់រូបគេមានស្ថានភាពធ្ងន់ធ្ងរជាងការរំពឹងទុកទៅទៀត ដោយ Messi ទំនងជាមិនអាចលេងក្នុងការប្រកួតជាមួយក្រុម Borussia Dortmund ក្នុងក្របខ័ណ្ឌ Champions League នៅថ្ងៃអង្គារសប្ដាហ៍នេះទេ។
លោក Valverde បាននិយាយថា៖ «យើងមានការព្រួយបារម្ភខ្លះដែរ នៅពេលគ្មានរូបគាត់ ដូច្នេះហើយគេបានប្រាប់យើងថា យើងត្រូវតែមានការប្រុងប្រយ័ត្នបន្តិច។ ខ្ញុំគិតថា គាត់នឹងឆាប់ជាធូរស្បើយ និងអាចលេងជាថ្មីម្ដងទៀត ប៉ុន្តែនៅថ្ងៃអង្គារខាងមុខនេះ ខ្ញុំមិនទាន់ច្បាស់នៅឡើយទេ ប្រហែលជាអត់ភាគច្រើន»។
គ្រូបង្វឹករូបនេះបានបញ្ជាក់ថា៖«ជាការពិត គាត់ជាកីឡាករសំខាន់បំផុតសម្រាប់យើង គឺខ្ញុំមិនអាចបដិសេធបាននោះទេ ប៉ុន្តែមានពេលវេលាផ្សេងទៀត ដែលគាត់មិនបានលេង តែយើងបានឆ្លងកាត់ដោយជោគជ័យ។ គាត់ជាកីឡាករល្អបំផុតក្នុងពិភពលោក ដូច្នេះយើងចង់ឲ្យគាត់ឆាប់ជាសះស្បើយក្នុងពេលឆាប់ៗនេះ ប៉ុន្តែយើងចង់ឲ្យគាត់មានសុខភាពល្អដូចដើមច្រើនជាង មិនមែនចង់ឲ្យគាត់ចូលលេងភ្លាមៗនោះទេ»៕ SN
