ភ្នំពេញៈ គ្រូបង្វឹកវិសាខា លោក ហុក សុជីវ័ន បានចាត់ទុកការបើកទ្វារកីឡដ្ឋានវិសាខា ដើម្បីស្វាគមន៍ក្រុមបឹងកេតសម្រាប់ការប្រកួតលីកកំពូលកម្ពុជាឆ្នាំ ២០១៩ នៅចុងសប្តាហ៍នេះថា ជាពេលដែលក្រុមរបស់លោកត្រូវប្រឈមមុខជាមួយកីឡាករបរទេសមានកម្រិតលេងខ្ពស់ ដែលអាចនឹងបង្កគ្រោះថ្នាក់ដល់វិសាខា។
លោក ហុក សុជីវ័ន បាននិយាយថា៖ «យើងបានត្រៀមជាពិសេសសម្រាប់ជួបក្រុមបឹងកេត ព្រោះយើងបានដឹងហើយថា បឹងកេត មានសុទ្ធតែជាកីឡាករមានបទពិសោធច្រើន ដែលពួកគេធ្លាប់បានឆ្លងកាត់ទាំងការប្រកួតលីកក្នុងស្រុក និងប្រកួត AFC Cup ហើយបឹងកេតក៏សម្បូរទៅដោយធនធានយុវជនផងដែរ»។
គ្រូបង្វឹករូបនេះបានបន្ថែមថា៖ «ជាងនេះទៅទៀត បឹងកេត ជាក្រុមដែលមានកីឡាករបរទេសកម្រិតកំពូលនៅក្នុងស្រុកខ្មែរយើងផងដែរ គឺបើវាស់វែងពីកម្រិតសមត្ថភាពកីឡាករបរទេសនៅស្រុកខ្មែរ អត់ទាន់មានក្រុមណានៅលើគាត់ឡើយដែលអ្នកទាំងនោះអាចនឹងបង្កគ្រោះថ្នាក់ដល់ក្រុមយើង»។
ការវិលមកជួបគ្នារវាងក្រុមវិសាខា និងបឹងកេតនៅសប្តាហ៍នេះ វាបានក្លាយជាការប្រកួតដែលមានការចាប់អារម្មណ៍ខ្លាំងព្រោះ ៦ ប្រកួតកន្លងមកនេះក្រុមទាំង ២ នេះបានឈ្នះ ៤ ស្មើ ១ ចាញ់ ១ ប្រកួត និងមាន ១៣ ពិន្ទុស្មើគ្នា គ្រាន់តែ វិសាខា មានគ្រាប់បាល់ចំណាយច្រើនជាង ហើយបានឈរនៅលេខ ៣។
វិសាខាជាក្រុមដែលសម្បូរទៅដោយធនធានកីឡាករ និងមានទម្រង់លេងល្អ ប៉ុន្តែការយកឈ្នះលើក្រុមខ្លាំងក្រសួងការពារជាតិ (ទ័ព) ២-០ កន្លងមកនេះ ត្រូវបានលោក ហៅ សុជាតិ គ្រូបង្វឹកក្រុមបឹងកេតចាត់ទុកថាជាការផ្តល់កម្លាំងចិត្តធំមួយក្នុងការជំរុញឲ្យកូនក្រុមលោកខំប្រឹងកាន់តែខ្លាំង ដើម្បីត្រៀមជួបក្រុមខ្លាំងៗដូចជាវិសាខានេះ ហើយជំនួបនេះវាក៏ជាពេលដែលខ្សែការពារ សុខ សុវណ្ណ និង រស់ សំអឿន ដែលបានប្តូរទៅវិសាខាត្រូវប្រឈមមុខនឹងអតីតមិត្តរួមក្រុមនៅបឹងកេតផងដែរ។
លោក ហៅ សុជាតិ ធ្លាប់បានប្រាប់ភ្នំពេញប៉ុស្តិ៍ក្រោយឈ្នះក្រុមទ័ព ២-០ កន្លងមកថា៖ «ការឈ្នះក្រុមទ័ពជាចំណុចល្អមួយក្នុងការដាស់តឿនកីឡាករយើងឲ្យមានអារម្មណ៍កាន់តែខ្លាំងឡើង ព្រោះផ្លូវដែលត្រូវប្រជែងវានៅវែងឆ្ងាយ។ បើទោះបីជាយើងឈ្នះការប្រកួតនេះមែន ក៏យើងមិនប្រហែសដែរ គឺយើងកាន់តែរឹតបន្តឹង និង ខំប្រឹងបន្ថែមទៀតដើម្បីត្រៀមការប្រកួតក្រោយៗ»។
យ៉ាងណាក៏ដោយរវាងក្រុមទាំង ២ នេះទោះបីជាក្រុមណាឈ្នះ ក៏មិនរំពឹងអាចដណ្តើមយកលេខរៀងទី ២ របស់ក្រុមណាហ្គាវើលនោះដែរ ព្រោះនៅសប្តាហ៍នេះក្រុមមាន ១៥ ពិន្ទុ ណាហ្គាវើល ត្រូវប៉ះក្រុមអគ្គិសនីកម្ពុជាដែលពួកគេមានភាគរយខ្ពស់ក្នុងការឈ្នះ ៣ ពិន្ទុបន្ថែម។ ផ្ទុយទៅវិញរវាងវិសាខា និងបឹងកេត បើក្រុមណាចាញ់នឹងធ្លាក់ចេញពីតំបន់កំពូលតារាងជាមិនខាន ព្រោះក្រុមមាន ១២ ពិន្ទុ អង្គរថាយហ្គឺរ និងក្រុមមាន ១១ ពិន្ទុ ទ័ព កំពុងប្រជែងឡើងទៅឈរនៅតំបន់ទីតាំងនេះវិញ។
ចំណែកក្រុមណាហ្គាវើលក៏នឹងមិនអាចដណ្តើមយកតំបន់កំពូលតារាងពីក្រុមមាន ១៦ ពិន្ទុ ព្រះខ័នរាជស្វាយរៀងបាននោះដែរ ព្រោះលើកនេះ ស្វាយរៀង ត្រូវជួបក្រុមខេត្តកំពង់ចាមដែលពួកគេនឹងយកឈ្នះជាមួយគ្រាប់បាល់ច្រើនជាមិនខាន ខណៈកំពង់ចាមទើបចាញ់ក្រុមវិសាខា ១៤-០ នោះ៕
កម្មវិធីប្រកួតនៅថ្ងៃសៅរ៍
-ទ័ព v សាលាកីឡាបាល់ទាត់ជាតិ នៅកីឡដ្ឋានស្តាតចាស់ ម៉ោង ១៨:០០
-អគ្គិសនីកម្ពុជា v ណាហ្គាវើល កីឡ.អគ្គិសនីកម្ពុជា ១៥:៣០
-វិសាខា v បឹងកេត កីឡដ្ឋានវិសាខា ១៨:០០
៤ ប្រកួតនៅថ្ងៃអាទិត្យ
-ភ្នំពេញក្រោន v ប៉ូលិស កីឡដ្ឋាន RSN ១៨:០០
-ខេត្តកំពង់ចាម v ស្វាយរៀង ទីលានវិ.ប៊ុនរ៉ានីហ៊ុនសែនមេម៉ត់ ១៥:៣០
-អង្គរថាយហ្គឺរ v អាស៊ីអឺរ៉ុប កីឡដ្ឋានសៀមរាប ១៥:៣០
-គិរីវង់សុខសែនជ័យ v សូលទីឡូអង្គរនៅកីឡដ្ឋានគិរីវង់ ម៉ោង ១៥:៣០