Dominic Calvert-Lewin (ឆ្វេង) របស់ Everton តែតបាល់ប្រជែងនឹងខ្សែការពារ Luke Shaw ក្នុងប្រកួតPremier League។ AFP
.jpg)
ក្រុងប៉ារីស៖ វិស័យបាល់ទាត់បានឈានដល់កាលឈរទ្រឹង ដោយសារវិបត្តិវីរុសកូរ៉ូណា ហើយការបារម្ភភ្លាមៗ គឺតែងមានជាធម្មតាពីសំណាក់ក្លិបជាច្រើន ព្រោះវាប៉ះពាល់ដល់ចំណូលរបស់ពួកគេ ប៉ុន្តែក្ដីសង្ឃឹមនៅតែមានដែលជឿថាការប្រកួតទូទាំងពិភពលោកអាចលេចរូបរាងឡើងវិញយ៉ាងល្អប្រសើរនៅទីបំផុត ក្រោយស្ថានការណ៍ដ៏អាក្រក់នេះបញ្ចប់ទៅ។
គ្រូបង្វឹករបស់ក្រុម Everton លោក Carlo Ancelotti បាននិយាយទៅកាន់កាសែតកីឡានៅអ៊ីតាលី Corriere dello Sport ថា៖ «យើងកំពុងឆ្លងកាត់បញ្ហា ដែលគ្មានអ្នកណាម្នាក់ធ្លាប់ជួបពីមុនឡើយ ហើយក៏ជាបញ្ហាដែលនឹងផ្លាស់ប្ដូរពួកយើងយ៉ាងខ្លាំងមែនទែន»។
គិតចាប់តាំងពីសង្គ្រាមលោកលើកទី ២ (World War II) វីស័យកីឡានៅប្រទេស ក្នុងតំបន់អឺរ៉ុប មិនដែលត្រូវបានលុបចោលឡើយ តែការផ្អាកភ្លាមៗ បានបង្ហាញឲ្យឃើញនូវប្រព័ន្ធមួយដែលកំពុងវិលវល់ដោយសារបាត់នូវចំណូលយ៉ាងច្រើនសន្ធឹកសន្ធាប់។
លោក Ancelotti បាននិយាយទៅកាន់កាសែតនោះបន្តទៀតថា៖ «ប្រាក់ចំណូលរបស់ក្រុមហ៊ុនទូរទស្សន៍នឹងធ្លាក់ចុះ ហើយកីឡាករ និងគ្រូបង្វឹកទាំងឡាយនឹងថយប្រាក់ខែ។ សំបុត្រនឹងធ្លាក់ថ្លៃ ព្រោះមនុស្សទូទៅមិនសូវសម្បូរលុយ។ សេដ្ឋកិច្ចនឹងផ្លាស់ប្ដូរ ហើយបាល់ទាត់ក៏អ៊ីចឹងដែរ។ តែជឿថា គ្រប់យ៉ាងអាចប្រសើរឡើងវិញ»។
«ដូចបញ្ហាជាច្រើនផ្សេងទៀតដែរ គ្រប់វិបត្តិតែងមានឱកាសក្នុងហ្នឹង»។ នេះជាសម្ដីរបស់អ្នកនិពន្ធសៀវភៅបាល់ទាត់ «The Age of Football» លោក David Goldblatt បាននិយាយប្រាប់ AFP មុននឹងអ្នកប្រវត្តិវិទូបាល់ទាត់រូបនេះ ធ្វើនូវការព្រមានជាក្រោយ។
បែងចែកប្រាក់ដោយយុត្តិធម៌?
ពេលនេះ ការគ្រប់គ្រងលុយកាក់កំពុងស្ថិតក្នុងដៃបុគ្គលកំពូលៗដែលមានសំណាងមួយចំនួន បើទោះបីជាពួកគេកំពុងទទួលរងផលប៉ះពាល់ក៏ដោយ។ បញ្ហាទាំងនោះ ទំនងអាចជះឥទ្ធិពលដល់ទីផ្សារទិញដូរកីឡាករ និងការចំណាយដ៏ច្រើនសន្ធឹកសន្ធាប់លើកីឡាករ ដែលអាចជាបញ្ហាមួយនាពេលកន្លងមក។
អតីតគ្រូបង្វឹករបស់ក្លិបនៅអាល្លឺម៉ង់ Bayern Munich លោក Uli Hoeness បាននិយាយដោយទទូចថា៖ «ក្នុងរយៈពេល ២ ឬក៏ ៣ ឆ្នាំ វាមិនមានការចំណាយច្រើន ដែលយើងកំពុងឃើញនេះ ព្រោះថាគ្រប់ប្រទេសទាំងអស់នឹងទទួលរងផលប៉ះពាល់។ ជាមួយនឹងគ្រប់លទ្ធភាពទាំងអស់ នឹងមានពិភពបាល់ទាត់ថ្មីមួយលេចឡើង ក្រោយពីនេះ»។
ប៉ុន្មានថ្ងៃកន្លងទៅនេះ ក្លិបមួយក្នុងចំណោមក្លិបសម្បូរលុយបំផុតលើលោក គឺក្រុមអ្នកមានបុណ្យ Barcelona របស់ប្រទេស អេស្ប៉ាញ បានប្រកាសឲ្យដឹងថា ខ្លួនទទួលបានការយល់ព្រមពីកីឡាករទាំងអស់រួចរាល់ហើយ ក្នុងការកាត់ ៧០ ភាគរយ នៃប្រាក់ខែរបស់ពួកគេ ខណៈក្លិបដទៃទៀតនៅអឺរ៉ុប ក៏កំពុងអនុវត្តវិធានការរបៀបគ្នានេះដែរ។
ការប្រកួតកាន់តែតិច
វាប្រហែលដល់ពេលដែលត្រូវរៀបចំពេលប្រកួតឡើងវិញ ដោយគំនិតបន្ថែមក្រុមក្នុងកម្មវិធីប្រកួតផ្សេងៗ ដូចជាមាន ៤៨ ក្រុម ក្នុងព្រឹត្តិការណ៍ World Cup និង ២៤ ក្រុម សម្រាប់កម្មវិធីប្រកួត Club World Cup ជាដើម ប្រាកដណាស់វាមិនមាននិរន្តរភាពទេ។
ជាមួយគ្នានេះ ប្រធានសហព័ន្ធបាល់ទាត់ពិភពលោក (FIFA) លោក Gianni Infantino បានទទួលយកនូវការអំពាវនាវឲ្យមានការកែប្រែ ដោយលោកបានថ្លែងទៅកាន់កាសែត La Gazzetta dello Sport ថា៖ «ប្រហែលជាពួកយើងត្រូវធ្វើកំណែទម្រង់វិស័យបាល់ទាត់ពិភពលោក ដោយការថយក្រោយមួយជំហាន។ ជាមួយនឹងការមានរបៀបផ្សេងៗ។ កម្មវិធីប្រកួតកាន់តែតិច ឬសូម្បីការបន្ថយចំនួនក្រុម ប៉ុន្តែត្រូវមានតុល្យភាពជាងមុន»។
ពាក់ព័ន្ធនឹងបញ្ហានេះ អ្នកនិពន្ធខាងលើ លោក Goldblatt ពេលនេះមានជំនឿថា FIFA ត្រូវតែពិនិត្យឡើងវិញនូវផែនការដែលចង់បន្ថែមក្រុមឡើងដល់ ៤៨ ក្រុម ក្នុងព្រឹត្តិការណ៍ World Cup ឆ្នាំ ២០២៦ ដែលគ្រោងធ្វើទូទាំងប្រទេសនៅអាមេរិកខាងជើង (North America)។
ផែនការនោះ រួមទាំងកម្មវិធីប្រកួតដណ្ដើមពានរង្វាន់ European Championship ដែលសហព័ន្ធបាល់ទាត់អឺរ៉ុប (UEFA) ចង់រៀបចំក្នុងក្រុងទាំង ១២ ទូទាំងទ្វីប គឺវាកំពុងត្រូវបានបង្កើតឡើងក្នុងកាលៈទេសៈ ដែលមើលទៅហាក់ដូចជាផ្ទុយនឹងតម្រូវការចាំបាច់សម្រាប់ដោះស្រាយនឹងការគំរាមកំហែងផ្សេងទៀត មានដូចជាការប្រែប្រួលអាកាសធាតុជាដើម។
លោក Goldblatt បាននិយាយចុងក្រោយថា៖ «ប្រសិនបើបានរៀនសូត្រពីអ្វីដែលបានកើតឡើងប៉ុន្មានខែចុងក្រោយនេះ យើងគួរតែស្ដាប់អ្នកជំនាញ។ យើងត្រូវតែធ្វើការបញ្ឈប់គ្រប់យ៉ាង ហើយពិចារណាឡើងវិញឲ្យបានហ្មត់ចត់»៕ AFP/VN
