លោកស្រី ប៉ែន ស្រីមុំ (កណ្តាល) ថតជុំគ្នាជាមួយក្រុមការងារ។ ពន្លក
.jpg)
ភ្នំពេញ៖ សមាគមកីឡាកង់កម្ពុជា មានឈ្មោះថា Cambodia Cycling Academy (CCA) បានបើកប្រជុំវិសាមញ្ញជាបន្ទាន់មួយ កាលពីល្ងាចថ្ងៃពុធ នៅទីស្នាក់ការរបស់ខ្លួនភ្នំពេញ ដើម្បីពិនិត្យ និងធ្វើកំណែទម្រង់សមាសភាពថ្នាក់ដឹកនាំឡើងវិញ ព្រមទាំងដាក់ផែនការសម្រាប់ការហ្វឹកហាត់ជាថ្មី ត្រៀមប្រកួតព្រឹត្តិការណ៍អន្តរជាតិនានា បន្ទាប់ពីខកខានធ្វើសកម្មភាពដោយបញ្ហាកូវីដ ១៩ ឆ្លងរាលដាល។
ជាមួយគ្នានេះ ប្រធានចាស់ លោក ប្រាក់ ចាន់មុន្នី បានអវត្តមាន និងបោះបង់ការងារ ហើយអង្គប្រជុំសម្រេចសម្រួលសមាជិកប្រតិបតិ្តថ្មីតាមមុខងារ និងជ្រើសតាំង លោកស្រី ប៉ែន ស្រីមុំ ពីអនុប្រធានឱ្យឡើងជាប្រធាន CCA ក្នុងអាណត្តិទី១ ដដែល។ បន្ថែមពីលើនេះសមាជិកចាស់មាន ១១ នាក់ អង្គប្រជុំបានបន្ថែមសរុបដល់ ១៣ នាក់ ក្នុងនោះក៏មានគ្រូបង្វឹកជម្រើសជាតិចំនួន ៤ រូបផងដែរ។
លោកស្រី ប៉ែន ស្រីមុំ បានថ្លែងថា៖ «បញ្ហាកូវីដ ១៩ យើងទទួលស្គាល់ថា មានផលប៉ះពាល់ខ្លាំងធ្វើឱ្យខកខាន និងខាតគ្រប់យ៉ាង ប៉ុន្តែសកម្មភាពរបស់សមាគមយើង គប្បីធ្វើសកម្មភាពឡើងវិញ ដោយត្រូវគោរពតាមគោលការណ៍អនាម័យរបស់ក្រសួងអប់រំ យុវជន និងកីឡា, ក្រសួងសុខាភិបាល ជាពិសេសសហព័ន្ធផ្ទាល់តែម្តង ដែលណែនាំ»។
លោកស្រីបន្ថែមថា៖ «សមាគម មានផែនការជាចម្បង និងគោលដៅធំបំផុត គឺចង់ឱ្យអត្តពលិកជម្រើសជាតិកីឡាទោចក្រយានកម្ពុជា បានចេញទៅហ្វឹកហាត់ នៅប្រទេសបារាំង ទៅតាមលទ្ធភាពសមត្ថភាពរបស់អត្តពលិក ដើម្បីត្រៀមការប្រកួតលក្ខណៈអន្តរជាតិនានា ដោយក្នុងនោះចង់ឃើញទង់ជាតិរបស់ព្រះរាជាណាចក្រកម្ពុជាមានវត្តមានក្នុងពេលប្រកួតអន្តរជាតិ ហេតុនេះសមាគមនឹងប្រឹងប្រែងជួយ ដើម្បីឱ្យប្រណាំងកង់កម្ពុជា មានវត្តមានប្រកួតលើឆាកអន្តរជាតិ និងមានចំណាត់ថ្នាក់ល្អ»។
នៅក្នុងអង្គប្រជុំ កាលពីថ្ងៃពុធនោះសមាគម CCA បានសម្រេចជាឯកច្ឆន្ទនូវសមាសភាពចំនួន ១៣ នាក់ សម្រាប់បំពេញការងារទៅតាមតួនាទី ទី១ លោកស្រី ប៉ែន ស្រីមុំ ជាប្រធាន ២ លោក អូរីញ៉ាក់ ប៉ាទ្រីក ជាអនុប្រធាន ទី៣ លោក អូម៉ា ឌីលែន ជាអ្នកគ្រប់គ្រង ទី៤ លោក ខ្លូត ករណី ជាអគ្គលេខាធិការ ទី៥ លោក ហី សិលា ជាអគ្គហេរញ្ញិក ទី៦ លោក សាំង សំណាង ជាជំនួយការប្រធាន ទី៧ លោក ផេង ប៉ូលីន ជាអ្នកគ្រប់គ្រងកីឡាករ ទី៨ លោក អ៊ុច សុខវិសាល ជាគ្រូបង្វឹក ទី៩ កញ្ញា ស្រី បញ្ញា ជាអ្នកជំនាញធ្វើម្ហូប ទី១០ លោក សេង ប៊ុនណេត ជាអ្នកជំនាញជួសជុលកង់ ទី១១ លោក អេង ផល្លា អ្នកជំនាញជួសជុលកង់ ទី១២ ហ្សង់ ចេហ្សូ ជំនាញម៉ាស្សាសាច់ដុំ និងទី១៣ លោក វើហ្គានី អូរីលែន ជាមេធាវីប្រចាំសមាគម។
លោក នូ ចំរើន អគ្គលេខាធិការសហព័ន្ធខ្មែរកីឡាទោចក្រយានបានប្រាប់ថា៖ «សហព័ន្ធគាំទ្រនូវសកម្មភាពរបស់ក្លិប និងសមាគម ព្រមទាំងលើកទឹកចិត្តចំពោះក្លិបផ្សេងៗទៀត ឱ្យមកចុះបញ្ជីក្រោមការគ្រប់គ្រងរបស់សហព័ន្ធ និងស្វែងរកអត្តពលិកល្អ និងឆ្នើមៗសម្រាប់បញ្ជូនទៅបណ្តុះបណ្តាលបន្ត។ ក្នុងនាមសហព័ន្ធនឹងខិតខំជួយលើកទឹកចិត្ត និងគាំទ្រដល់ក្លិប ឬសមាគម ដែលមានសកម្មភាព និងបញ្ជូនសំណើឱ្យថ្នាក់លើ ទទួលស្គាល់ជាផ្លូវការតាមច្បាប់កីឡា»៕
